Nehemiya 1:1-11
1 Awa akiko mazu ahanjikile Nehemiya*+ mwanaHakaliya: Ami Nehemiya ngwapwile muzuvo yakukola* muShushane*+ mukakweji Kishileve* mumwaka wakusokesa 20.
2 Halwola kanelu ndumbwami Hananyi+ ejile navakwavo malunga kufuma kuYuta, kaha ngwavehwile vyachiyoyelo chavaYuleya vaze vafumine muufunge,+ nomu yapwile nganda yaYelusalema.
3 Vakiko vangulwezele ngwavo: “VaYuleya vaze vali kungalila yaYuta, vaze vayovokele muufunge vali nakumona vihuli vyavinene, kaha vali nakwivwa sonyi.+ Kembwe yaYelusalema yinapuzuka,+ kaha vikolo vyayo nawa vanavyocho nakakahya.”+
4 Omu ngwevwile mazu kana, ngwatwamine hamavu, ngwalilile nakulishona hamakumbi amavulu, kaha ngwalijilikile kulya,+ ngwalombele kuli Kalunga wamelu.
5 Ngwambile ngwami: “Ove Yehova Kalunga wamelu, ove Kalunga wamunene wakwivwisa woma, ove weji kulamanga lushiko lwove nakusolola zangi yakwilila kuli vaze vakuzanga nakulama jishimbi jove,+
6 tona meso ove, tengeleka matwitwi ove wivwilile kukulomba chayami ngamba yove, echi nguli nakulomba kuli ove ufuku namusana+ kutalisa kuli vangamba jove vaIsalele. Nguli nakulitavila jishili jize vaIsalele vanavulumuna kumeso ove. Ami navaze vakuzuvo yatata tunalingi shili tuvosena.+
7 Tunalingi chuma chachipi kumeso ove,+ mwomwo katwalamine jishimbi jove, najindongi jove, namazu ove akuyula aze wahanyine ngamba yove Moseko.+
8 “Anuka mazu ove walwezele* ngamba yove Mose ngwove: ‘Kachi nge kamweshi kushishikako, kaha nangukamimwangila muli vatu veka naveka.+
9 Oloze nge namukakinduluka kuli ami nakulama jishimbi jami nakujikavangiza, kaha vatu jenu numba ngukavamwangila tuhu kusongosongo yamavu, nangukavafumisako+ nakuvaneha muchihela chize ngunasakula mangana vakavulukilengamo lijina lyami.’+
10 Ava vanapu hivangamba jove, hivatu jove vaze wasokwele nangolo jove jajinene, nalivoko lyove lyangolo.+
11 Shikaho ove Yehova, tengeleka matwitwi ove kukulomba chayami ngamba yove, nakukulomba chavangamba jove vaze veji kwivwanga woma lijina lyove. Ngukafwe ami ngamba yove mangana vyuma vipwenga kanawa likumbi lyalelo, kaha ou mwangana angwivwile keke.”+
Ami ngwapwile ngumuka-kuhana lupasa kuli mwangana.+
Kwinyikila Chamwishi
^ Ulumbunwiso, “Ya Eji Kuvendejekanga.”
^ Chipwe “munganda yamwangana; muchihela chakukola.”
^ Chipwe “muSusa.”
^ Tala Chihande B15.
^ Chipwe “mazu aze wahuhumwine.”
