Nehemiya 12:1-47
12 Ava vakiko vapilishitu navaLevi vaze vakindulukile kufuma muufunge naZeluvavele+ mwanaSheyalachele,+ naYeshuwa.+ Vapwile Selaya, naYelemiya, naEzela,
2 naAmaliya, naMaluke, naHatushe,
3 naShekanyiya, naLehume, naMelemote,
4 naIto, naNginetowi, naAviya,
5 naMiyamine, naMataya, naMbilinga,
6 naShemaya, naYoyalive, naYetaya,
7 naSalu, naAmoke, naHilikiya, naYetaya. Ava vakiko vapwile vatwamina javapilishitu navandumbwavo mumakumbi aYeshuwa.
8 VaLevi vapwile Yeshuwa, naMbinuwi, naKatamiyele,+ naSheleviya, naYuta, naMatanyiya+ uze atwaminyinenga kwimba myaso yakusakwilila Kalunga navandumbwenyi hamwe.
9 Kaha vandumbwavo vaMbakavukiya naUnyi vemanyine kuze kwakulitalasana navakiko nakuzata milimo yavo yaulama.
10 Yeshuwa asemene Yoyakime, Yoyakime asemene Elyashive,+ Elyashive asemene Yoyata.+
11 Kaha Yoyata asemene Yonatane, Yonatane asemene Yatuwa.
12 Hamakumbi aYoyakime, ava vakiko vapwile vapilishitu, vatwamina vakujizuvo javakakuluka javatu: Melaya emanyinyineko vaze vakuzuvo yaSelaya,+ Hananyiya emanyinyineko vaze vakuzuvo yaYelemiya.
13 Meshulame emanyinyineko vaze vakuzuvo yaEzela,+ Yehohanane emanyinyineko vaze vakuzuvo yaAmaliya.
14 Yonatane emanyinyineko vaze vakuzuvo yaMaluki, Yosefwe emanyinyineko vaze vakuzuvo yaShevanyiya.
15 Atana emanyinyineko vaze vakuzuvo yaHalime,+ Helekai emanyinyineko vaze vakuzuvo yaMelayote.
16 Zekaliya emanyinyineko vaze vakuzuvo yaIto, Meshulame emanyinyineko vaze vakuzuvo yaNginetone.
17 Jikili emanyinyineko vaze vakuzuvo yaAviya,+ kaha . . .* emanyinyineko vaze vakuzuvo yaMinyamine, Pilitai emanyinyineko vaze vakuzuvo yaMowachiya.
18 Shamuwa emanyinyineko vaze vakuzuvo yaMbilinga,+ Yehonatane emanyinyineko vaze vakuzuvo yaShemaya.
19 Matenai emanyinyineko vaze vakuzuvo yaYoyalive, Uji emanyinyineko vaze vakuzuvo yaYetaya.+
20 Kalai emanyinyineko vaze vakuzuvo yaSalai, Evele emanyinyineko vaze vakuzuvo yaAmoke.
21 Hashaviya emanyinyineko vaze vakuzuvo yaHilikiya, Netanele emanyinyineko vaze vakuzuvo yaYetaya.
22 Hamakumbi aElyashive, naYoyata, naYohanane, naYatuwa,+ vaLevi navapilishitu vavasonekele kupwa vatwamina vakujizuvo javakakuluka javatu swi namuchiyulo chaNdaliu mwangana waPeleja.
23 VaLevi vaze vapwile vatwamina vakujizuvo javakakuluka javatu vavasonekele mumukanda wamijimbu yamumakumbi aze, swi nakumakumbi aYohanane mwanaElyashive.
24 Vatwamina javaLevi vapwile Hashaviya, naSheleviya, naYeshuwa+ mwanaKatamiyele.+ Kaha vandumbwavo vemanyine nakulitalasana navakiko mangana vembenga myaso yakwalisa Kalunga nakumusakwilila nge kutesa najindongi jaNdavichi,+ mutu waKalunga wamuchano. Kaha lizavu limwe lyavaka-kulama lyemanyine kuluhachi lwalizavu likwavo lyavaka-kulama.
25 Matanyiya,+ naMbakavukiya, naOvachiya, naMeshulame, naTalamone, naAkuve+ vakiko vapwile vaka-kulama kuvikolo,+ valaminenga jizuvo jakutulikila jakuvikolo.
26 Malunga kana vazachilenga mumakumbi aYoyakime mwanaYeshuwa,+ Yeshuwa mwanaYozatake, namumakumbi anguvulu Nehemiya, nakapilishitu Ezela,+ muka-kunungulula mazu.*
27 Jino hakukunjika kembwe yaYelusalema vatondele vaLevi kuvihela vyosena vatwaminenga mangana vezenga kuYelusalema kuchilika chakukunjika kembwe nakwimba myaso yakusakwilila Kalunga+ najingunga, navisaji vyamikole, natulyalya.
28 Kaha vaka-kwimba* valikungulwilile hamwe, vafumine kungalila yamwakamwihi,* nakujingalila jajingilikile Yelusalema josena, nakumembo avaNetofwa,+
29 nakuMbete-ngilingale,+ nakujingalila jakuNgeva+ nakuAzamavete+ mwomwo vaka-kwimba vatungilenga membo avo kujingalila jajingilikile Yelusalema.
30 Kaha vapilishitu, navaLevi valitomesele vavene, vatomesele nawa vatu,+ navikolo,+ nakembwe.+
31 Jino ngwatwalile vilolo javaYuta nakuvemika hakembwe. Kaha ngwasakwile mazavu avali amanene avaka-kwimba myaso nachendo chavatu vaze vavakavangijile munyima. Lizavu limwe lyahichile kuchilyo hakembwe nakuya kuChikolo chaMilumba yaUto.+
32 Kaha Hoshaya nachimbwa chavilolo javaYuta vavakavangijile munyima,
33 hamwe naAzaliya, naEzela, naMeshulame,
34 naYuta, naMbenjamine, naShemaya, naYelemiya.
35 Hali vakiko hapwile navana vavapilishitu vaze vambachile jineta.+ Vapwile Zekaliya mwanaYonatane, Yonatane mwanaShemaya, Shemaya mwanaMatanyiya, Matanyiya mwanaMikaya, Mikaya mwanaZakule, Zakule mwanaAsafwe,+
36 navandumbwenyi vaShemaya, naAzalele, naMilalai, naNgilalai, naMai, naNetanele, naYuta, naHananyi oku vanambate visaji vyaNdavichi,+ mutu waKalunga wamuchano, kaha Ezela+ muka-kunungulula mazu* apwile kulutwe lwavo.
37 Kahomu vahetele kuChikolo chaKaselwoke,+ vakandukile haJindondelo+ jakuNganda yaNdavichi+ kumukandu wakembwe helu lyaZuvo yaNdavichi mbwe nakuChikolo chaMeya+ kumututuko.
38 Lizavu likwavo lyavaka-kwimba myaso yakusakwilila Kalunga lyalivangile kulutwe, kahami ngwavakavile munyima hakembwe, nachimbwa chavatu vamwe nakuheta kuKaposhi kaJifwolonyi+ swi nakuKembwe Yayinene,+
39 nakuChikolo chaEfwalime,+ nakuChikolo chaNganda yaMwaka,+ nakuheta kuChikolo chaVaishi,+ nakuKaposhi kaHananele,+ nakuKaposhi kaHameya swi nakuChikolo chaMikoko.+ Kaha vejile nakwimana kuChikolo chaVaka-kulama.
40 Kutwala muze, mazavu avali avaka-kwimba myaso yakusakwilila Kalunga vemanyine kulutwe lwazuvo yaKalunga wamuchano. Kaha nayami ngwemanyine kuze nachimbwa chamihato javatwamina.
41 Kwemanyine nawa vapilishitu, Elyakime, naMaseya, naMinyamine, naMikaya, naEliyowenai, naZekaliya, naHananyiya oku vanakwate jineta,
42 naMaseya, naShemaya, naEleyaza, naUji, naYehohanane, naMalakiya, naElame, naEzele. Kaha vaka-kwimba vosena vaze vatwaminyinyine kuli Yezelahiya vembile namazu akukanguka.
43 Halikumbi lize, vawahililile+ nakuhana vimuna vakuvatula vavavulu mwomwo Kalunga wamuchano avalingishile vawahilile chikuma. Mapwevo navanyike navakiko vawahililile,+ ngocho kuwahilila vapwile nacho vatu muYelusalema chevwakanyine nakujingalila jakwakusuku.+
44 Jino vatongwele malunga valamenga jizuvo jakutulikila+ mawana,+ najimbuto jakulivanga,+ navyakusokesa mumakumi.+ Mujizuvo kana vakungulwililemo vyazano vyajimbuto jize jafumine mumande amujinganda mangana vajihane vapilishitu navaLevi+ nge kutesa nomu vahanjikile muJishimbi.+ Kaha vatu vosena muYuta vawahililile mwomwo vapilishitu navaLevi vapwile nakuzata milimo yavo.
45 Vapilishitu navaLevi vaputukile kuzata milimo yavo kuli Kalunga nakukavangiza lushimbi lwakupandama kukutomesa. Kaha vaka-kwimba navaka-kulama kuvikolo navakiko vazachile milimo yavo nge kutesa najindongi jaNdavichi namwanenyi Solomone.
46 Kushikulu, kumakumbi aNdavichi naAsafwe, kwapwilenga vakulwane vavaka-kwimba myaso, navaze vatumbwilenga myaso yakwalisa Kalunga nakumusakwilila.+
47 Hamakumbi aZeluvavele+ naNehemiya vaIsalele vosena vahanyinenga vaka-kwimba+ navaka-kulama kuvikolo+ vyazano kweseka navyuma vyasakiwilenga hakumbi hakumbi. Vahanyinenga nawa vyazano kuli vaLevi,+ kaha vaLevi nawa vahanyinengako vyazano vimwe kuli vana vaAlone.
Kwinyikila Chamwishi
^ Chasoloka nge muvisoneka vyachiHepeleu hano kavasonekaho lijinako.
^ Chipwe “muka-kusoneka.”
^ Chipwe “vaze vananguka kwimba myaso.”
^ Ikiko ngalila yakuYotau.
^ Chipwe “muka-kusoneka.”
