Nehemiya 13:1-31
13 Halikumbi lize, vatangile mukanda waMose kumeso avatu,+ kaha vawanyine lushimbi lwakwamba ngwavo muchikungulwilo chaKalunga wamuchano+ kanda mukapwa vaAmone navaMowaveko,+
2 mwomwo kavahanyine vaIsalele vyakulya nameyako, oloze vakambile Mbalame angule vaIsalele.+ Chipwe ngocho, Kalunga ketu alumwine vyangu vyavo kupwa jikisu.+
3 Omu vevwile mazu aJishimbi, vaputukile kuhandununa vatu vaze vapwile vakumafuchi eka+ kuli vaIsalele.
4 Shimbu kanda vyuma evi visoloke, kapilishitu Elyashive+ ikiye apwile mukulwane kutupete vakutulikila* vakuzuvo* yaKalunga ketu,+ kaha apwile kausoko kaToviya.+
5 Elyashive ahanyine Toviya kapete kakutulikila* kakanene kaze vahakilenga wana wamanona hakavanga, nalavona, navinoma vyakuzachisa, navize vyakusokesa mumakumi vyamanona, navinyo vyavihya, namaji+ vize vahanyinenga vaLevi,+ navaka-kwimba, navaka-kulama kuvikolo, nawana uze vahanyinenga vapilishitu.+
6 Jino halwola kana, ami kangwapwilenga muYelusalemako. Mwomwo mumwaka wakusokesa 32+ wachiyulo chaAlatakaseleke+ mwangana waMbavilone ngwakindulukile kuli mwangana. Kahomu mwahichile makumbi amwe ngwamulombele anguhane lisesa lyakuya cheka kuYelusalema.
7 Omu ngwahetele kuYelusalema, ngwawanyine chuma chachipi chize alingile Elyashive.+ Ahanyine Toviya+ kapete kakutulikila kaze kakuchipango chakuzuvo yaKalunga wamuchano.
8 Chuma kanechi changwivwishile kumuchima kupihya, ngocho ngwatutulwile vitenga vyaToviya mukapete kakutulikila.*
9 Ngwalwezele vatu vatomese tupete vakutulikila,* ngocho vatutomesele. Kaha ngwakindulwishilemo vinoma vyakuzachisa muzuvo yaKalunga wamuchano,+ nawana wamanona, nalavona.+
10 Ngwawanyine nawa nge vatu kavahanyinenga vaLevi+ vyazano vyavoko,+ ngocho vaLevi, navaka-kwimba vaze vazachilenga milimo vayilenga mutu himutu nakuzata kuwande wenyi.+
11 Kaha ngwatenukilile mihato javatwamina,+ ngwavehwile ngwami: “Mwomwo ika munasuvilila zuvo yaKalunga wamuchano?”+ Ngocho ngwakungulwile vaLevi nakuvakindulwisa kumilimo yavo.
12 Kaha vaYuta vosena vatwalilenga vyakusokesa mumakumi+ vyamanona, navinyo vyavihya, namaji mutupete vakutulikila.+
13 Kaha ngwatongwele kapilishitu Shelemiya, namuka-kunungulula mazu* Zatoke, naPetaya kaLevi vapwenga vakulwane kutupete vakutulikila. Jino Hanane mwanaZakule, Zakule mwanaMatanyiya ikiye apwile muhato wavo, mwomwo vosena ava vapwile malunga vakashishi. Vakiko vapwilenga namulimo wakupangila vandumbwavo vyazano vyavo.
14 Shikaho ove Kalunga kami, ngwanukenga+ hachuma kanechi. Kanda naujimbangana vilinga vyami vyazangi evi ngunalingi kuzuvo yayove Kalunga kami, nakumilimo yayoko.+
15 Hamakumbi aze ngwamwene vatu muYuta navakamuna vinyo kuvikamwino halikumbi lyaSambata.+ Vambachilenga jimbuto javo jamanona nakujilongejeka havimbulu javo. Vambachilenga nawa vinyo, namihako yamivinyo, najikuyu, navyuma vyeka vyakulisezaseza nakuvineha kuYelusalema halikumbi lyaSambata.+ Ngocho ngwavakanjile kulanjisanga evi vyuma halikumbi kana.*
16 Kaha vaka-Tule vaze vatwaminenga munganda vanehelenga vaishi navyuma vyeka vyakulisezaseza nakuvilanjisa halikumbi lyaSambata+ kuli vaYuta muYelusalema.
17 Ngocho ngwatenukilile vatu vavalemu vamuYuta nakuvamba ngwami: “Vyuma muli nakulinga vyavipi, muli nakujilulula likumbi lyaSambata.
18 Omu mukiko valingile navakakuluka jenu, ngocho Kalunga ketu anehele lupi lwosenelu hali etu nahanganda yino. Oloze enu nawa muli nakusangumuna matoto aKalunga hali vaIsalele mwomwo yakujilulula Sambata.”+
19 Omu kwaputukile kwilava, shimbu kanda Sambata, ngwalwezele vatu vasoke kuvikolo vyakembwe yaYelusalema. Ngwavalwezele nawa ngwami kanda navasokolola kuvikoloko kuvanga omu nayilinga sambata yinahichi lyehi. Kaha ngwahakile vangamba jami vamwe kuvikolo kuchina vatu navengisa vyuma vyavo munganda halikumbi lyaSambata.
20 Ngocho vaka-kusekasana navaka-kulandulula vyuma vasavalilenga haweluka waYelusalema likumbi limwe chipwe avali.
21 Kaha ngwavahuhumwine, ngwavambile ngwami: “Mwomwo ika muli nakusavalila kuweluka wakembwe? Kachi nge namukahilukilamo cheka, nangukamindandumuna.” Kufuma vene haze, kavejilenga cheka halikumbi lyaSambatako.
22 Jino ngwalwezele vaLevi ngwami valitomesenga lwola lwosena nakwiza nakulama kuvikolo mangana likumbi lyaSambata lipwenga lyajila.+ Shikaho ove Kalunga kami, ngwanukenga hachumechi nawa, ngwivwile keke nge kutesa nazangi yove yakwilila.+
23 Hamakumbi aze ngwamwene nawa vaYuleya vaze vambachilenga mapwevo+ vakuAshatote,+ navaAmone, navaMowave.+
24 Vana vavo vamwe vahanjikilenga lilimi lyavaka-Ashatote namalimi avaka-mafuchi eka, oloze naumwe wauchi ahanjikilenga lilimi lyavaYuleya.
25 Ngocho ngwavatenukilile nakuvangula. Kaha ngwavetele vamwe+ nakuvatukula jikambu javo jakumitwe nakuvashingisa Kalunga ngwami: “Kanda namukahangisa vana venu vamapwevo kuli vana vavo vamalunga chipwe kumbachila vana venu vamalunga vana vavo vamapwevoko.+
26 Echi chikiko chalingishile Solomone mwangana wavaIsalele alinge shili. Muli vaka-mafuchi kamwapwile mwangana wakufwana nge ikiyeko.+ Kalunga amuzangile+ shikaho amutongwele kupwa mwangana wavaIsalele vosena. Oloze mapwevo jenyi vakumafuchi eka vamulingishile alinge shili.+
27 Shikaho kachawahileko kuli enu kulinga chuma kanechi chachipi kuli Kalunga ketu kumbatanga mapwevo vakumafuchi eka.”+
28 MwanaYoyata,+ Yoyata mwanakapilishitu wakulitulaho Elyashive+ ambachile mwanaSanavalate+ wakuHolone. Ngocho ngwamuhangile kumeso ami.
29 Shikaho ove Kalunga kami, kanda nauvavulyamako mwomwo vanapihisa upilishitu, nakuhokola lushiko lwaupilishitu,+ nalwelu lwavaLevi.+
30 Ngocho ngwavatomesele kuvyuma vyavipi vyavaka-mafuchi eka, ngwahanyine milimo kuli vapilishitu navaLevi, mutu himutu namulimo wenyi,+
31 kaha ngwavalwezele vanehenga jikunyi+ halwola vatongola, namihako yakulivanga kuhya.
Ove Kalunga kami+ ngwanukenga nakungulinga mwamwaza.
Kwinyikila Chamwishi
^ Chipwe “kutupete vakulila.”
^ Chipwe “vakutembele.”
^ Chipwe “kapete kakulila.”
^ Chipwe “mukapete kakulila.”
^ Chipwe “tupete vakulila.”
^ Chipwe “namuka-kusoneka.”
^ Chipwe pamo, “ngwavakanjile halikumbi lize ngwami kanda navalanjisanga vyumako.”
