Nehemiya 2:1-20
2 Jino mukakweji waNyisane,* mumwaka wakusokesa 20+ wachiyulo chaMwangana Alatakaseleke,+ ngwambachile vinyo vize vatumbikile kumeso aMwangana nakumuhanavyo nge muze ngwalingilenga makumbi osena.+ Oloze halikumbi lize ngwahombele kumeso enyi.
2 Jino mwangana angwambile ngwenyi: “Ika unahombela ngana okunyi kaweshi nakuvizako? Kuli vimwe vili nakukuyanjisa kumuchima.” Ngocho ngwevwile woma chikuma.
3 Jino ngwambile kuli mwangana ngwami: “Ove mwangana yoyanga haya myaka yosena. Nanguhonena ikaze kuhomba okunyi nganda yize vafunda vakakuluka jami yinalyenyeka, kaha vikolo vyayo nawa vanavyocho?”+
4 Mwangana ambile kuli ami ngwenyi: “Vyuma muka uli nakusaka?” Hahaze vene ngwalombele kuli Kalunga wamwilu.+
5 Kaha ngwambile kuli mwangana ngwami: “Kachi nge chinawahe kumeso ove, kaha nawa unangwivwila ami ngamba yove uselewa, ngwitavise nguyenga kuYuta, kunganda yize vafunda vakakuluka jami mangana ngukayitungulule.”+
6 Kaha mwangana angwihwile oku lisano lyenyi natwame kwakamwihi naikiye ngwenyi: “Ungeji wove naupwa wamakumbi angahi? Kaha naukakinduluka likumbi muka?” Ngocho mwangana angwitavishile,+ kaha ngwamulwezele makumbi nangukatwamako.+
7 Jino ngwambile kuli mwangana ngwami: “Kachi nge chinawahe kuli ove mwangana, kaha nguhane mikanda mangana ngukahane vanguvulu vamungalila yaMusali yaKalwiji*+ vakangwitavise kuhita mungalila yavo swi nomu nangukaheta kuYuta.
8 Nguhane nawa mukanda ngukahane Asafwe muka-kulama Milemba yaMwangana mangana akanguhane vitondo vyakusonga vipamba vyakaposhi+ kaZuvo,* nevi vyakembwe yanganda,+ nazuvo eyi nanguya nakutungulula.” Mwangana anguhanyine yize mikanda+ mwomwo livoko lyaKalunga lyapwilenga hali ami.+
9 Jino ngwahetele kuli vanguvulu vamungalila yaMusali yaKalwiji, kaha ngwavahanyine yize mikanda yafumine kuli mwangana. Mwangana anguhanyine natupitau twamaswalale navaka-kutambukila hatuvalu mangana nguyenga navo.
10 Omu Sanavalate+ wakuHolone, naToviya+ chilolo* wavaAmone+ vevwile ngwavo mutu umwe neza nakulingila vaIsalele vyuma vyamwaza, vapihililile chikuma.
11 Kutwala muze ngwahetele kuYelusalema, kaha ngwatwamine makumbi atatu.
12 Jino ngwakatukile naufuku namalunga vamwe, kangwalwezele mutu numba umwe vyuma ahakile Kalunga mumuchima wami mangana nguvilinge kunganda yaYelusalemako. Kaha katwapwile nachimuna wekako shina uze kaha ngwatambukililenga ami.
13 Kaha ngwahichile kuChikolo chaChinema+ kulutwe lwaKaselwoke kaLinoka Wamunene swi nomu ngwahetele kuChikolo chaMilumba yaUto.+ Ngwakekesele kembwe yaYelusalema yize yapuzukile navikolo vyayo vize vochele nakakahya.+
14 Ngwahichile nawa nakuChikolo chaKaselwoke+ nakuChijiva chaMwangana, oloze kakwapwile fwashi yayinene yakuhita kanyama uze ngwapwile nakutambukilahoko.
15 Chipwe ngocho, ngwayilenga lika mukulo yachinema*+ naufuku uze, kaha ngwakekesele lika yize kembwe. Kufumaho ngwahilukile nakwingilila muChikolo chaChinema nakukinduluka.
16 Mihato javatwamina+ kavatachikijile okwo ngwayile, novyo ngwayile nakulingako mwomwo vaYuleya, navapilishitu, navatu vavalemu, namihato javatwamina, navaka-kuzata milimo kangwavalwezele chuma numba chimweko.
17 Ngocho ngwambile kuli vakiko ngwami: “Munalimwena enu vavene ukalu tuli nawo, omu nganda yaYelusalema yinalyenyeka nomu vikolo vyayo vanavyocho nakakahya. Shikaho tuyenu tutungulule kembwe yaYelusalema mangana sonyi yitufume.”
18 Ngwavalwezele omu livoko lyaKalunga kami lyapwilenga nayami,+ ngwavalwezele nawa mazu ahanjikile mwangana kuli ami.+ Vakiko vambile ngwavo: “Tuyenu tuyitungulule.” Ngocho valikolezezele mangana vazate mulimo kana.+
19 Omu Sanavalate wakuHolone, naToviya+ chilolo* wavaAmone,+ naNgesheme wakuAlavya+ vevwile chuma kana, vaputukile kututoleka+ nakutulumbilisa nakwamba ngwavo: “Vyuma muka muli nakulinga? Uno kamweshi nakulikanga kuli mwanganako tahi?”+
20 Oloze ngwavakumbulwile ngwami: “Kalunga wamelu ikiye mwatukafwa,+ kaha etu vangamba jenyi natuyitungulula. Enu kamweshi nachazano chipwe nalisesa chipwe chuma chakumyanukilaho muYelusalemako.”+
Kwinyikila Chamwishi
^ Tala Chihande B15.
^ Chipwe “yaMusali yaYufwalate.”
^ Chipwe “kaTembele.”
^ Hepe., “ngamba.”
^ Chipwe “yamwanakalwiji.”
^ Hepe., “ngamba.”
