Nehemiya 4:1-23
4 Omu Sanavalate+ evwile ngwavo tuli nakutungulula kembwe, apihililile chikuma, kaha ahendelenga lika vaYuleya.
2 Kaha ahanjikile kumeso avandumbwenyi namaswalale vakuSamaliya ngwenyi: “Vyuma muka vali nakulinga ava vaYuleya vakuhehela? Uno navahasa kuzata mulimo kanou ukawavo numba? Uno navahana vimuna vakuvatula tahi? Kutala navakumisa mulimo kana mulikumbi lyangongo numba? Uno kumalala amalolwa awa analyenyeka nakakahya vanahase kufumisako malolwa amwaza akutungisa numba?”+
3 Jino Toviya+ kaAmone+ uze emanyine kwakamwihi naikiye ambile ngwenyi: “Kembwe yamalolwa vali nakutunga numba nge nahanyina mumbwe nayipuzuka.”
4 Jino Nehemiya alombele ngwenyi: “Ove Kalunga ketu ivwilila, mwomwo vatu ava vali nakutulumbilisa.+ Echa mazu avo akututoleka akinduluke hamitwe yavo,+ kaha veche vavambate nge vyuma vyakupukula mulifuchi lyaufunge.
5 Kanda ufwika milonga yavo chipwe kujimbangana shili yavoko,+ mwomwo vanatukana vaka-kutunga.”
6 Ngocho twatwalileho nakutunga kembwe, kaha twanungasanyine kembwe yosena nakukatula chimbwa chayo. Vatu vosena vahakile michima yavo kukuzata mulimo.
7 Jino Sanavalate, naToviya,+ navaAlavya,+ navaAmone, navaAshatote+ vapihililile chikuma omu vevwile ngwavo mulimo wakutungulula kembwe yaYelusalema uli nakuzovoloka, kaha mahanya ayo nawa vanawajiki lyehi.
8 Kaha valikashile hamwe mangana vezenga nakuzungisa vaYuleya muYelusalema nakuvaluwanganyisa.
9 Ngocho twalombele kuli Kalunga ketu, kaha twahakile vaka-kulama muvihela mangana vatukinge kuli vaka-kole ufuku namusana.
10 Oloze vaYuta vambilenga ngwavo: “Vaka-kutunga* ngolo jinavakumu, kaha malala akembwe eyi yinapuzuka nawa anavulu. Ngocho katweshi kuhasa kutunga kembweko.”
11 Vaka-kole jetu nawa vambilenga ngwavo: “Shimbu kanda vatachikize vyuma tuli nakusaka kulinga chipwe kutumona, tuyenu tuvalukuke nakuvajiha, kaha mulimo nawimana.”
12 Omu vaYuleya vaze valihachile navaka-kole jetu vejilenga nakutunga, vatulwezelenga mapapa kakavulu* ngwavo: “Vaka-kole jetu naveza nakutulukuka kumitamba yosena.”
13 Ngwahakile malunga vaka-kulama kunyima yakembwe, kuvihela vyakunekama kuze kwapwile kwapelupelu, kaha ngwavahakilenga kweseka navisaka vyavo oku vanambate jipoko javo jamikwale, namakunga avo, namata avo amanana.
14 Omu ngwamwene ngwami vatu vali nawoma, ngwahanjikile kuli vilolo,+ namihato javatwamina, navatu vosena ngwami: “Kanda namuvevwa womako.+ Anukenu ngwenu Yehova apwa wamunene, wakwivwisa woma.+ Shikaho lwilenu vandumbwenu, navana venu vamalunga, navava vamapwevo, namembo enu.”
15 Omu vaka-kole jetu vevwile ngwavo tunatachikiza vyuma vasakanga kulinga, kaha nawa ngwavo Kalunga wamuchano nahonesa vyuma vajinanga kulinga, tuvosena twahilukile kumulimo wetu wakutungulula kembwe.
16 Kufuma vene halikumbi lize, chimbwa chimwe chavatu jami chazachilenga mulimo,+ kaha chimbwa chikwavo chakwachilenga makunga, najikepwe, namata amanana, natuhuma vavikungo. Kaha vilolo+ vosena vemanyine kunyima yavaYuleya nakuvakundwiza
17 oku vali nakutunga kembwe. Jino vaze vambachilenga vyuma vyakutungisa, mutu himutu azachishilenga livoko limwe, kaha livoko likwavo akwachilenga chitwa.*
18 Vaka-kutunga nawa vahakile mutu himutu poko yamukwale hambunda yenyi oku vali nakutunga. Kaha muka-kwimba luneta+ emanyine kwakamwihi nayami.
19 Jino ngwambile kuli vilolo, namihato javatwamina, navatu vosena ngwami: “Mulimo tuli nakuzata waunene chikuma, kuno kukembwe tunemana nawa tunalihandununa kuli umwe namukwavo.
20 Ngocho omu namwivwa chivumo chaluneta, muvosena mulikungulwile hano tuli. Kalunga ketu mwatuzungila jita.”+
21 Shikaho twazachilenga lika mulimo wakutunga, kaha chimbwa chimwe chakwachile makunga kufuma kukututuka chalikumbi swi nakuufuku omu vamunyikilenga vatanganyika.
22 Jino ngwambile kuli vatu vosena ngwami: “Mutu himutu namuka-kumukafwako vasavalenga mukachi kanganda yaYelusalema, kaha navatulamanga naufuku, kuheta namusana navazatanga milimo.”
23 Ami, navandumbwami, navaka-kungukafwa,+ navaka-kulama vaze vangukavangijilenga, katwazulilenga uvwalo wetuko, kaha mutu himutu apwilenga nachitwa chenyi mulivoko lyachilyo.
