Nehemiya 5:1-19
5 Jino malunga vamwe namapwevo javo vayayavalile chikuma hali vandumbwavo vaYuleya.+
2 Vamwe vambilenga ngwavo: “Tunapu tuvavavulu navana vetu vamalunga navava vamapwevo. Twatela kumbata vyakulya kuchina natufwa kuzala.”
3 Veka vambilenga ngwavo: “Tuli nakuhana mande etu ajimbuto jamanona, nawawa amivinyo, najizuvo jetu kupwa vijikilo mangana tuwane vyakulya mulwola lwazala.”
4 Vakwavo vambilenga ngwavo: “Tunalevana jimbongo jakuhana mwangana milambu+ hamande etu ajimbuto jamanona nawawa amivinyo.
5 Etu tunapu tuvausoko wavo vahalinyinga, kaha vana vetu vanapu nge hivana vavo, oloze tunahane vana vetu vamalunga navava vamapwevo kupwa vandungo, kaha vana vetu vamwe vamapwevo vali lyehi muundungo.+ Etu katweshi nangolo jakuhonesa chuma kanako, mwomwo mande etu ajimbuto jamanona nawawa amivinyo anapu lyehi ambala.”
6 Omu ngwevwile mazu avo akuyayavala, ngwapihililile chikuma.
7 Ngocho ngwahunananyine hachihande kana, kaha ngwahanjikile navilolo, namihato javatwamina ngwami: “Muli nakulevanyisa vandumbwenu nakufwila kutambula saku kuli vakiko.”+
Kufumaho ngwakungulwile vatu vavavulu mwomwo yachihande kanechi.
8 Jino ngwambile kuli vakiko ngwami: “Tunazate nangolo mangana tusokole vandumbwetu vaYuleya vaze valanjishile kuli vaka-mafuchi eka. Uno namusaka mulanjise vandumbwenu+ mangana tuvasokole cheka nyi?” Ngocho vaholele kulu, kavapwile namazu akukumbululako.
9 Ngwambile nawa ngwami: “Vyuma muli nakulinga kavyawahileko. Uno kamwatela kumwivwa Kalunga ketu woma,+ mangana ava vaka-mafuchi vaze vapwa vaka-kole jetu valitwamine kututolekako nyi?
10 Kaha ami, navandumbwami, navaka-kungukafwa tuli nakulevanyisa vatu jimbongo namanona chakuzeneka kutambula saku. Shikaho, tulitwaminenu tato kaneyi yakutambulanga saku.+
11 Ngocho likumbi lyalelo vakindulwishilenu mande avo ajimbuto jamanona,+ nawawa amivinyo, najilive javo, najizuvo javo, nachimbwa chajimbongo chakusokesa muvimbwa 100, nachechi chajimbuto jamanona, nawala wavinyo, namaji, evi muli nakutambwilaho saku kuli vakiko.”
12 Omu vevwile mazu kana vahanjikile ngwavo: “Natuvakindulwishila vyuma kana, kaha katweshi kutambula cheka vimwe kuli vakikoko. Natulinga vene nge omu unambe.” Ngocho ngwasanyikile vapilishitu nakuvashingisa valame lushiko kanelu.
13 Ngwalakumwine vyuma vyapwile mujisweko jauvwalo wami nakwamba ngwami: “Weshowo mwakahona kutesamo lushiko kanelu, Kalunga wamuchano akamulakumune kuzuvo yenyi nakuvikumba vyenyi. Mutu kana vakamulakumune mujila kaneyi nakumuseza chakuzeneka vyuma.” Jino vatu vosena vambile ngwavo: “Amene.”* Kaha vamwalishile Yehova nakulinga nge muze valishikile.
14 Jino hamyaka 12 yize yahichilemo kufuma kulikumbi lize vangutongwele kupwa ngunguvulu+ yavatu mulifuchi lyaYuta, kufuma mumwaka wakusokesa 20+ nakuheta mumwaka wakusokesa 32+ wachiyulo chaMwangana Alatakaseleke,+ ami navandumbwami katwalile vyakulya vyatela vanguvuluko.+
15 Oloze vanguvulu vaze vapwileko shimbu kanda ami, vayanjishilenga vatu, kaha hakumbi hakumbi vatambwilenga jishekele* japalata 40 kuvatu mangana valande vyakulya vyavo navinyo. Vaka-kukafwa vanguvulu navakiko vayanjishilenga vatu, oloze ami kangwalingile ngochoko+ mwomwo ngwevwilenga Kalunga woma.+
16 Ngwazanyine nawa mumulimo wakutungulula eyi kembwe. Katwapwile namandeko,+ kaha vaka-kungukafwa vosena vejilenga nakuzata milimo.
17 VaYuleya vakuheta ku 150, namihato javatwamina, navaka-mafuchi vaze vejilenga kuli etu valilenga vyakulya kumesa yami.
18 Hakumbi hakumbi vatuwahishililenga ngombe umwe wakuji, namikoko vakununa 6, natujila. Kaha twanwinenga vinyo vyakulisezaseza kamwe hamakumbi 10. Chipwe ngocho katwalwezele vatu vatuhanenga vyakulya vyatela vanguvuluko, mwomwo vatu vapwile lyehi namulimo waunene wakutunga.
19 Ngocho ngwalombele ngwami: “Ove Kalunga kami ngwanuke havyuma vyosena evi ngunalingila vatu kana ava.”+
Kwinyikila Chamwishi
^ Chipwe “Chipwenga vene ngocho.”
^ Shekele yimwe yapwile jingalamu 11.4. Tala Chihande B14.
