Nehemiya 6:1-19
6 Omu Sanavalate, naToviya,+ naNgesheme kaAlavya,+ navaka-kole jetu vakwavo vevwile ngwavo ngunatungulula kembwe,+ kaha kakweshi mahanya analituluko, (numba tuhu halwola luze mapito akembwe apwile kanda nguwahakeko),+
2 Sanavalate naNgesheme vangutuminyine mazu ano ngwavo: “Tutongole lwola mangana tuliwanyine kumembo akuChinema chaOno.”+ Oloze vatu kana vapwile nakusaka ngwavo vangulemeke.
3 Ngocho ngwavatuminyine tunganda ngwami: “Nguli nakuzata mulimo waulemu, kaha kangweshi kuhasa kwizako. Mwomwo nge nanguseza mulimo kana, kaha kaweshi kukumako.”
4 Oloze vangutuminyine mazu wowamwe mapapa kawana, kaha ami nawa ngwavakumbulwilenga mwomumwe.
5 Sanavalate angutuminyine ngamba yenyi kamuchitanu namazu wowamwe, amutumine namukanda wakuvungulula mulivoko lyenyi.
6 Uze mukanda wapwile namazu akwamba ngwawo: “Mujimbu unevwakana muli vaka-mafuchi ngwavo ove navaYuleya muli nakusaka kulikanga,+ shikaho muli nakutungila kembwe. Omu mukiko nahanjika naNgesheme.+ Kaha nawa ngwavo uli nakusaka upwenga umwangana wavaYuleya.
7 Kaha unalitongwela nawa vapolofweto mangana vavilike muYelusalema mwosena ngwavo, ‘MuYuta muli mwangana!’ Ijiva ngwove mujimbu kana nauheta kuli mwangana. Ngocho twaya tushimutwile chihande kana.”
8 Oloze ngwamukumbulwile ngwami: “Vyuma uli nakuhanjika kavyeshi vyamuchanoko. Uli nakulinga kaha vyakutaka mumuchima wove.”
9 Vatu kana vapwile nakutwivwisa woma, vambilenga ngwavo: “Ava vatu navazeya, kaha mulimo kaveshi kuhasa kuuzatako.”+ Ngocho ngwalombele ngwami: “Ove Kalunga kolezeza mavoko ami.”+
10 Jino ngwayile kuzuvo yaShemaya mwanaNdelaya, Ndelaya mwanaMehetavele uze alisokelelele muzuvo yenyi. Shemaya ambile ngwenyi: “Tutongole lwola mangana tuliwanyine kuzuvo yaKalunga wamuchano, mukachi katembele nakulisokelelamo, mwomwo naveza nakukujiha. Naveza naufuku nakukujiha.”
11 Oloze ngwamulwezele ngwami: “Ami kangweshi kuhasa kuchinako. Mutu wakufwana nge ami keshi kuhasa kwingila mutembele nakuyoyako.+ Kangweshi kwingilamoko.”
12 Jino ngwatachikijile ngwami kumana keshi Kalunga namutumuko, oloze Toviya naSanavalate+ vakiko vanamutumu ahanjike upolofweto wamakuli hali ami.
13 Vamukambile angwivwise woma mangana ngulinge shili mangana vawanyineho jila yakupihishilamo lijina lyami nakungutoleka.
14 Kaha ngwalombele ngwami: “Ove Kalunga kami, kanda nauvulyama vyuma vyosenevi vanalingi vaToviya+ naSanavalate, naNowachiya kapolofweto wapwevo, navapolofweto vekako vaze vanangwivwisanga woma.”
15 Kaha kembwe vayikumishile kuyitunga halikumbi lyakusokesa 25 lyakakweji waElule.* Yambachile makumbi 52.
16 Omu vaka-kole jetu vosena vevwile mujimbu kana, nomu vaka-mafuchi vaze vatujingilikile vayimwene, vevwile sonyi chikuma.+ Kaha vatachikijile ngwavo Kalunga ketu ikiye natukafwe numba tukumise kuzata mulimo kana.
17 Hamakumbi aze, vatu vavalemu+ vamuYuta vatuminenga mikanda yayivulu kuli Toviya, kaha Toviya avakumbulwilenga.
18 Vatu vavavulu muYuta valyononwene kuli Toviya mwomwo apwile isewenu yaShekanyiya, Shekanyiya mwanaAla.+ Kaha Yehohanane mwanaToviya ambachile mwanaMeshulame,+ Meshulame mwanaMbelekiya.
19 Vangulwezelenga kaha vyuma vyamwaza hali ikiye, vakiko nawa vamulwezelenga mazu ngwahanjikilenga hali ikiye. Ngocho Toviya angutuminyinenga mikanda yakungwivwisa woma.+
Kwinyikila Chamwishi
^ Tala Chihande B15.