Nehemiya 8:1-18
8 Jino vatu vosena valikungulwilile hamwe kuchihela chasanga kulutwe lwaChikolo chaMeya,+ kaha valwezele muka-kunungulula mazu* Ezela,+ anehe mukanda waJishimbi jaMose+ jize Yehova ahanyine vaIsalele.+
2 Ngocho halikumbi lyatete lyakakweji wakusokesa 7,+ kapilishitu Ezela anehele mukanda waJishimbi kulizavu+ lyamalunga namapwevo, navosena vaze vahashile kwivwilila kujishimbi kana nakuvalumbunukila.
3 Kaha atangilile helu jize jishimbi+ kulizavu lyamalunga namapwevo, navosena vaze vahashile kwivwilila kujishimbi kana nakuvalumbunukila. Ajitangilile kuchihela chasanga kulutwe lwaChikolo chaMeya kufuma kukututuka chalikumbi swi nahamulungu, kaha vosena vevwililile+ omu atangile uze mukanda waJishimbi.
4 Ezela muka-kunungulula mazu* emanyine hautenda wavitondo uze vatungililile kuliwana kanechi. Kulivoko lyenyi lyachilyo kwemanyine Machichiya, naShema, naAnaya, naUliya, naHilikiya, naMaseya. Kaha kulivoko lyenyi lyachimoswe kwemanyine Petaya, naMishayele, naMalakiya,+ naHashume, naHashavatana, naZekaliya, naMeshulame.
5 Ezela avungulwile uze mukanda, kaha vatu vosena vaumwene mwomwo apwile helu. Vatu vosena vemanyine omu avungulwile uze mukanda.
6 Jino Ezela alishile Yehova Kalunga, wamuchano, wangolo, kaha vatu vosena vazundwile mavoko avo helu nakwamba ngwavo: “Amene!* Amene!”+ Kaha vafukamine chameso hamavu nakulifukula kuli Yehova.
7 Jino Yeshuwa, naMbanyi, naSheleviya,+ naYamine, naAkuve, naShevetai, naHochiya, naMaseya, naKelita, naAzaliya, naYozavate,+ naHanane, naPelaya vaze vapwile vaLevi valumbunwinyine vatu Jishimbi+ oku vatu hanga vanemanyina.
8 Vatangilenga uze mukanda waJishimbi jaKalunga wamuchano nalizu lyakutambakana, vajilumbunwinenga kanawa nakushindakanya omu jatalikisa. Ngocho vakafwile vatu mangana vyuma vavatangililile vivalumbunukile.+
9 Jino Nehemiya uze apwile nguvulu* halwola luze, nakapilishitu Ezela+ muka-kunungulula mazu,* navaLevi vaze vanangwilenga vatu, vambile kuli vatu ngwavo: “Likumbi lyalelo linapu lyajila kumeso aYehova Kalunga kenu.+ Kanda namulishona chipwe kulilako.” Mwomwo vatu vosena vapwile nakulila omu vevwile aze mazu ajishimbi.
10 Nehemiya ambile kuli vakiko ngwenyi: “Yenu mukalye vyakulya vyamwaza,* nakunwa vyuma viyema, kaha kahanenuko vimwe+ kuli vaze kaveshi navyoko, mwomwo likumbi lyalelo linapu lyajila kuli Mwata wetu. Shikaho kanda namulishonako, mwomwo kuwahilila chakufuma kuli Yehova chinapu nge hichihela chenu chakukola.”*
11 VaLevi vaholesele vatu vosena ngwavo: “Holenu kulu, mwomwo likumbi lyalelo linapu lyajila. Kanda namulishonako.”
12 Ngocho vatu vosena vayile nakulya nakunwa, vahanyineko vyakulya vimwe kuli vaze kavapwile navyoko, kaha vawahililile chikuma+ mwomwo mazu vavatangilile avalumbunukilile.+
13 Kaha likumbi lyakavangijileho, vatwamina vosena vakujizuvo javakakuluka javatu, navapilishitu, navaLevi valikungulwilile kuli Ezela muka-kunungulula mazu* mangana valinangule vyuma vikwavo vyamuJishimbi.
14 Ngocho haJishimbi jize Yehova ahanyine Mose vawanyineho lushimbi lwakuvuluka nge vaIsalele vakatwamenga muvisakila hachiwanyino mukakweji wakusokesa 7.+
15 Kaha nawa vakavilike luvila+ mujinganda javo josena, namuYelusalema mwosena ngwavo: “Yenu kungalila yajipili mukanehe mitango yamilive, namitango yamipinyi, namitango yamiluta, namitango yamikoma, namitango yamitondo yeka yakutungisa visakila nge muze vasoneka.”
16 Ngocho vatu vayile, vanehele mitango yakutungisa visakila vyavo. Mutu himutu atungilile helu lyamulungu wazuvo yenyi, namuvipango vyavo, namuvipango vyakuzuvo yaKalunga wamuchano,+ namuchihela chasanga chakuChikolo chaMeya,+ nachechi chakuChikolo chaEfwalime.+
17 Ngocho vosena vaze vafumine muundungo vatungile visakila nakutwamamo. VaIsalele kavatungile visakila kana kufuma kumakumbi aYoshuwa+ mwanaNune palanga nakulikumbi lizeko, kaha vatu vawahililile chikuma.+
18 Kaha hakumbi hakumbi vatangilenga mukanda waJishimbi jaKalunga wamuchano+ kufuma kulikumbi lyakulivanga swi nakulikumbi lyamakumishilo. Valingile chiwanyino hamakumbi 7, kaha halikumbi lyakusokesa 8 vapwile nakukunguluka chajila nge muze vavalwezele mujishimbi.+
Kwinyikila Chamwishi
^ Chipwe “muka-kusoneka.”
^ Chipwe “muka-kusoneka.”
^ Chipwe “Chipwenga vene ngocho.”
^ Chipwe “muka-kusoneka.”
^ Chipwe “Tishata,” vulukiso yavaPeleja vavulukilenga nguvulu walifuchi.
^ Hepe., “vyakulya vyamaji.”
^ Chipwe “chinapu ngolo jenu.”
^ Chipwe “muka-kusoneka.”
