Samwele 1 1:1-28
1 Kwapwile lunga umwe atwaminenga kuLamataime-zofwime,*+ kungalila yajipili yaEfwalime.+ Lijina lyenyi ikiye Elekana+ mwanaYelohame, Yelohame mwanaElihu, Elihu mwanaTohu, Tohu mwanaZufwe.
2 Ou lunga ambachile mapwevo vavali. Umwe lijina lyenyi ikiye Hana, kaha mukwavo ikiye Penyina. Penyina apwile navana, oloze Hana kapwile navanako.
3 Kaha mwaka himwaka ou lunga afuminenga munganda yenyi, ayilenga kuShilo+ nakulemesa* Yehova wamayongomena nakumuhana vimuna vakuvatula. Oku kukiko vana vaEli vavali, Hofwonyi naFwinehase+ vazachililenga Yehova mulimo waupilishitu.+
4 Jino likumbi limwe, omu Elekana ahanyine chimuna wakuvatula, ahanyine vyazano vyachimuna kana kuli pwevo lyenyi Penyina navana venyi vamalunga navava vamapwevo vosena.+
5 Oloze Hana amuhanyine chazano chakulipwila mwomwo amuzangile chikuma, oloze Yehova kamuhanyine lusemoko.*
6 Muhalika wenyi amutolekelenga chikuma mangana amwivwise kumuchima kupihya, hakuwana nge Yehova kamuhanyine lusemoko.
7 Amutolekelenga mwaka himwaka. Omu Hana ayilenga kuzuvo yaYehova,+ amutolekelenga lika, kaha alililenga nakulitwamina kulya.
8 Lunga lyenyi Elekana amwambile ngwenyi: “Ove Hana, ikaze uli nakulila? Ikaze unalitwamina kulya? Ikaze unahombela?* Ami kumana kangwalemeneko kuhambakana vana vamalunga 10 nyi?”
9 Kahomu vakumishile kulya nakunwa muShilo, Hana emanyine. Halwola kana, kapilishitu Eli atwamine hachitwamo kuchikolo chatembele*+ yaYehova.
10 Hana alyonyingile chikuma mumuchima, kaha alombele kuli Yehova+ nakulila chikuma.
11 Alishikile lushiko ngwenyi: “Ove Yehova wamayongomena, kachi nge nautala havihuli vyayami ngamba yove nakungwalakana, kachi nge kaweshi kunguvulyama ami ngamba yoveko, oloze naunguhana mwana walunga,+ kaha nangukakuhanayo ove Yehova akakuzachilenga mukuyoya chenyi chosena. Kumutwe wenyi kakweshi kukahita yembeko.”+
12 Omu atwalileho lika kulomba kumeso aYehova, Eli apwile nakumushishika kukanwa.
13 Hana apwile nakuhanjikila mumuchima, mivumbo yenyi yikiko kaha yapwile nakuchikima, oloze lizu kalyevwakanyineko. Ngocho Eli amwene ngwenyi napende.
14 Kaha Eli amwambile ngwenyi: “Ove, hanga unapendela? Ulitwamine kunwanga vinyo.”
15 Hana amukumbulwile ngwenyi: “Kangwapendeleko, ove mwata wami. Nguli nakulyonyinga mumuchima. Kangwanwine vinyo chipwe wala wekako, oloze nguli nakulweza Yehova vyuma vili mumuchima wami.+
16 Kanda naungumona ami ngamba yove kupwa nguwamokomokoko. Nguli nakulihanjikisa mwomwo yakulyonyinga chamuchima wami navihuli nguli nakumona.”
17 Kaha Eli amwambile ngwenyi: “Yakonga mukuunda. Kalunga kaIsalele akuhane vyuma unamulombo.”+
18 Hana ambile ngwenyi: “Ngwivwile uselewa ami ngamba yove.” Ngocho akatukile nakuya, akalile vyakulya, kaha kahombele chekako.
19 Vahindukile chimenemene, valifukwile kumeso aYehova. Kufumaho vakindulukile kuzuvo yavo kuLama.+ Jino Elekana alisavalile napwevo lyenyi Hana, kaha Yehova amwalakanyine.+
20 Mumwaka vene uze,* Hana emichile lijimo, kaha asemene mwana walunga. Amulukile lijina+ ngwenyi Samwele,* mwomwo ambile ngwenyi, “ngunamulombo kuli Yehova.”
21 Kutwala muze, Elekana ayile natanga yenyi yosena kuShilo mangana akahane Yehova+ chimuna wakuvatula uze ahanyinenga mwaka himwaka, nakuhana nawa wana walushiko lwenyi.
22 Oloze Hana kayileko.+ Ambile kuli lunga lyenyi ngwenyi: “Nge mwana nasumuka, kaha nangukamutwala akasoloke kumeso aYehova. Mwakatwamanga kuze mukuyoya chenyi chosena.”+
23 Lunga lyenyi Elekana amwambile ngwenyi: “Linga mweshomwo unamono ngwove mwakwoloka. Sala hembo palanga nomu naumusumuna. Yehova akulingile vyuma unahanjika.” Ngocho Hana asalile hembo nakulela mwanenyi palanga nomu amusumwine.
24 Kahomu amusumwine, ayile nenyi kuShilo. Ambachile kuji yangombe wamyaka yitatu, nalifwa* limwe lyaunga, namulondo waunene wavinyo,+ kaha ahetele nayou mwana kuzuvo yaYehova kuShilo.+
25 Vajihile uze kuji yangombe, kaha vanehele uze mwana kuli Eli.
26 Hana ambile ngwenyi: “Ove mwata wami, omu wayoya tu, ami yami uze pwevo emanyine nayove muno muchihela nakulomba kuli Yehova.+
27 Ngwalombele Yehova anguhane mwana, kaha ikiye ou nanguhane.+
28 Ngocho ngunamuhane kuli Yehova. Ngunamuhane apwenga waYehova hamakumbi osena mwayoyanga.”
Kaha Elekana alifukwile kuli Yehova.
Kwinyikila Chamwishi
^ Chipwe “kuLama, kaZufwe.”
^ Chipwe “nakulifukula kuli.”
^ Hepe., “asokele mujimo lyenyi.”
^ Chipwe “Ikaze uli nakwivwila kupihya kumuchima?”
^ Ikiko tavanaku.
^ Chipwe pamo, “Mukuhita chamakumbi.”
^ Ulumbunwiso, “Lijina lyaKalunga.”
^ Kafwe jilita 22. Tala Chihande B14.
