Samwele 1 10:1-27
10 Jino Samwele ambachile saji yamaji, awahingunwinyine hamutwe waSaulu.+ Amusweswenyele nakwamba ngwenyi: “Yehova nakuwavisa upwenga utwamina+ yauswana wenyi.+
2 Omu naufuma kuno lelo, nauwana malunga vavali kwakamwihi nachimbumbe chaLakele+ kuZeleza mungalila yavaMbenjamine. Navamba kuli ove ngwavo, ‘Vaze vimbulu wayanga nakutonda vanavawane lyehi. Iso navulyama lyehi chihande chavimbulu,+ nalizakamina jino hali ove. Ali nakwamba ngwenyi: “Nangulinga ngachilihi omu nalingi mwanami hanga ayilanga?”’
3 Kufuma haze, uyenga lika palanga nomu nauheta hamutondo waunene kuTavole, kuze nauwana malunga vatatu vali nakukanduka kuMbetele+ vakalemese Kalunga wamuchano. Nauwana umwe nambate vana vavapembe vatatu, mukwavo nambate jimbolo jitatu, weka nambate mulondo waunene wavinyo.
4 Navakwihula chihindu chove nakukuhana jimbolo jivali, kaha ujitambula.
5 Kufuma kuze nauheta kupili yaKalunga wamuchano kuze kuli maswalale javaFwilishite. Kahomu nauheta munganda, naulihumangana nalizavu lyavapolofweto vali nakufuma kuchihela chakulunduka. Kulutwe lwavo kuli vatu vali nakwimba chisaji chamikole, nakangoma, napanda, nakalyalya oku vakiko vali nakupolofweta.
6 Shipilitu yaYehova nayikuhana ngolo,+ ngocho nayove nauputuka kupolofweta hamwe navakiko, kaha nawalumuka nge umutu weka.+
7 Omu navisoloka vinjikizo kanevi, linga vyeshovyo nausaka kulinga mwomwo Kalunga wamuchano ali nayove hamwe.
8 Kaha ulivanga kuNgilingale,+ ami nangukakukava munyima mangana ngukalumbe vimuna vakuvatula nakuhana mawana akusolola kuunda. Ukanguvandamina hamakumbi 7 kuze palanga nomu nangukeza, kaha nangukakulweza vyuma naukalinga.”
9 Omu Saulu anyingulukile nakuseza Samwele, hahaze vene Kalunga alumwine muchima wenyi nakumulingisa kupwa nge mutu weka. Kaha vinjikizo vyosena vize vamulwezele vyasolokele halikumbi vene lize.
10 Ngocho vafumine kuze, vakahetele kupili. Saulu alihumanganyine nalizavu lyavapolofweto. Hahaze vene shipilitu yaKalunga yamuhanyine ngolo,+ kaha aputukile kupolofweta+ hamwe navakiko.
11 Omu vatu vaze vamutachikijile vamwene ali nakupolofweta hamwe navapolofweto, valyambile ngwavo: “Vyuma muka vinamuwane ou mwanaKishe? Kumana Saulu naikiye hikapolofweto?”
12 Lunga umwe ambile ngwenyi: “Nyi ava vapolofweto vakwavo masevo veya?” Kufuma haze, vatu vahanjikilenga jino kashimutwiji* kano ngwavo: “Kumana Saulu naikiye hikapolofweto?”+
13 Omu Saulu akumishile kupolofweta, ayile kuchihela chakulunduka.
14 Jino ndumbwaise ambile kuli ikiye namuka-kumukafwa ngwenyi: “Mwayanga kulihi?” Ikiye akumbulwile ngwenyi: “Twayanga nakutondatonda vimbulu,+ oloze katwavawanangako. Ngocho twahetanga kuli Samwele.”
15 Uze ise amuhulishile ngwenyi: “Ngulweze, vyuma muka namilweze Samwele?”
16 Saulu amukumbulwile ngwenyi: “Atulwezanga ngwenyi vimbulu vanavawane lyehi.” Oloze kamulwezele chihande chawangana ahanjikile Samweleko.
17 Jino Samwele akungulwilile vatu kuli Yehova kuMijipa.+
18 Ambile kuli vaIsalele ngwenyi: “Yehova Kalunga kaIsalele nambe ngwenyi, ‘Enu vaIsalele, ami yami ngwamilowele muEjipitu,+ yami ngwamipululwile mumavoko avaEjipitu nakumawangana osena aze amiyanjishilenga.
19 Oloze lelo munangukane ami Kalunga kenu,+ ami ngwamipululwile mulupi lwenu namuluyando lwenu. Muli nakwamba ngwenu: “Katute, tutongwele mwangana atuyule.” Imanenu jino kumeso aYehova kweseka namiyachi yenu namakombakaji* enu.’”
20 Ngocho Samwele alwezele miyachi yavaIsalele yosena yipandame kwakamwihi,+ kaha asakwileho muyachi waMbenjamine.+
21 Alwezele jino muyachi waMbenjamine upandame kwakamwihi kweseka najitanga jamuyachi kana, kaha asakwileho tanga yavaMatale. Ngocho asakwileho Saulu mwanaKishe.+ Oloze omu vamutondeletondele kavamuwanyineko.
22 Shikaho vehwile Yehova+ ngwavo: “Ou lunga neza lyehi kuno tahi?” Kaha Yehova avakumbulwile ngwenyi: “Uze ali haze, naswame haviteli.”
23 Vamulahilile, vakamusakile haze haviteli aswamine. Kahomu emanyine mukachi kavatu, apwile wamusuku chikuma kuhambakana vatu vosena.*+
24 Jino Samwele ambile kuli vatu vosena ngwenyi: “Munamono ou mutu nasakula Yehova nyi?+ Kakweshi mutu weka wakufwana nge ou havatu vosenako.” Kaha vatu vosena valikuwile ngwavo: “Mwangana ayoyenga lika!”
25 Ngocho Samwele alwezele vatu vyuma navasakanga vamyangana,+ avisonekele mumukanda, kaha autulikile kumeso aYehova. Kufumaho Samwele asuwile vatu vosena vayenga mutu himutu kuzuvo yenyi.
26 Saulu naikiye ayile kuzuvo yenyi kuNgiveya. Ayile hamwe navaka-kulwa jita vaze Yehova akunywile.
27 Oloze vatu vamwe vatuvihu vambile ngwavo: “Ouze mwatulwila ngachilihi?”+ Ngocho valumbilishile Saulu, kaha kavamunehelele wanako.+ Oloze ikiye kahanjikileho chuma numba chimweko.*
Kwinyikila Chamwishi
^ Chipwe “chishimo.”
^ Chipwe “navisaka.”
^ Hepe., “apwile wamusuku chikuma kuhambakana vatu vosena kufuma havifwiji vyenyi nakuya kwilu.”
^ Hepe., “Oloze ikiye apwile nge kamama.”
