Samwele 1 11:1-15
11 Jino Nahashe kaAmone+ ejile nakulwa jita navatu vakuYaveshe+ muNgileyate. Ngocho malunga vakuYaveshe vosena vambile kuli Nahashe ngwavo: “Likase chivwasano* nayetu mangana tukuzachilenga.”
2 Kaha uze Nahashe kaAmone avambile ngwenyi: “Nangulikasa chivwasano nayenu kuvanga nge namwitavila ngumilinge chuma chino: ngumituve meso enu akuchilyo osena. Nangumilinga ngocho mangana ngwinyise vaIsalele vosena.”
3 Vakulwane vakuYaveshe vambile kuli ikiye ngwavo: “Tuhane makumbi 7 mangana tutume valuwa mungalila yavaIsalele yosena. Kachi nge katweshi kuwanamo umwe wakutupulululako, kaha natulisuula tupwenga mumavoko ove.”
4 Jino vaze valuwa vakatukile, vakahetele kuNgiveya,+ kwimbo lyaSaulu. Vambulile mujimbu kuvatu, kaha vatu vosena vaputukile kulila namazu akukanguka.
5 Jino Saulu apwile nakufuma muchipapa nautanga wenyi wavangombe. Ambile ngwenyi: “Vyuma muka vinasoloka? Vatu vali nakulila ika?” Kaha vamwambulilile mujimbu uze vejile nawo malunga vakuYaveshe.
6 Shipilitu yaKalunga yahanyine Saulu+ ngolo omu evwile mujimbu kana, kaha apihililile chikuma.
7 Ngocho ambachile vakuji javangombe vavali, avatetele vipuka vipuka. Kaha avihanyine valuwa vavihichise mungalila yavaIsalele yosena nakwamba ngwavo: “Weshowo mwazeneka kukavangiza Saulu naSamwele, vangombe jenyi navavalinga nganomu vanalingi ava.” Shikaho vatu vevwile Yehova woma, kaha valinungile hamwe* nakwiza kuli Saulu.
8 Omu alavile vatu kana kuMbezeke, vaIsalele vapwile 300,000, kaha malunga vavaYuta vapwile 30,000.
9 Saulu navava vatu jenyi vambile kuli vaze valuwa vejile ngwavo: “Mulweza vatu vakuYaveshe muNgileyate ngwenu, ‘Hamene, omu likumbi nalikaheta hamulungu, natukamilwila.’” Ngocho vaze valuwa vayile, vakambulwile ou mujimbu kuli vatu vakuYaveshe. Kaha vatu kana vawahililile chikuma.
10 Jino vatu vakuYaveshe vambile kuli Nahashe ngwavo: “Hamene natulisuula tupwenga mumavoko ove, kaha utulinga mweshomwo unasake.”+
11 Lichako, Saulu ahandunwine vaze vatu mumazavu atatu. Vengilile muchilombo chavaAmone hachilo chamakumishilo,* kaha vajihile vaAmone+ palanga nomu likumbi lyahetele hamulungu. Vaze vayovokeleho vavamwangile, kaha vosena vachinyine ou namwenyi ou namwenyi.
12 Kaha vatu vambile kuli Samwele ngwavo: “Veya vaze vapwanga nakwamba ngwavo, ‘Saulu vene apwenga mwangana wetu?’+ Tuhanevo mangana tuvajihe.”
13 Oloze Saulu ambile ngwenyi: “Kanda namujiha mutu numba umwe likumbi lyaleloko,+ mwomwo Yehova napululula vaIsalele.”
14 Kufumaho Samwele alwezele vatu ngwenyi: “Tuyenu kuNgilingale+ tukaswanyise cheka Saulu hawangana.”+
15 Ngocho vatu vosena vayile kuNgilingale, kaha vakahakile Saulu hawangana kumeso aYehova. Kufumaho vahanyine mawana akusolola kuunda kumeso aYehova,+ kaha Saulu namalunga vavaIsalele vosena valile nakunwa nakuwahilila chikuma.+
Kwinyikila Chamwishi
^ Chipwe “Lishike lushiko.”
^ Hepe., “kaha valovokele nge mutu umwe.”
^ Kafwe kufuma na 2:00 yaufuku nakuheta ku 6:00 yachimene.
