Samwele 1 12:1-25
12 Jino Samwele ambile kuli vaIsalele vosena ngwenyi: “Talenu, ami ngunamilingila* vyuma vyosena vize mwangulwezanga kumilingila. Ngunamitongwela mwangana amiyule.+
2 Shikaho ou ikiye mwangana mwamitwaminyinanga.*+ Ami ngunakolo lyehi najivwi jami. Vana vami vali hamwe nayenu.+ Ami ngunamitwaminyinanga kufuma kuunyike wami palanga nakulelo.+
3 Yami uno. Ngupayisenu kumeso aYehova nakumeso ayou wenyi awavisa.+ Ngombe yeya chipwe chimbulu cheya ngwatambwile?+ Iya ngwalyapwile chipwe kushinyinyika? Kulivoko lyeya ngwatambwile maswekeza* mangana ngulinge mwakuhenga?+ Nge ngwalingile ngocho, kaha nangumihilwishila vyuma kana.”+
4 VaIsalele vambile ngwavo: “Kawatulyapwileko chipwe kutushinyinyika. Kaha kawatambwile chuma kulivoko lyamutu numba umweko.”
5 Ngocho ambile kuli vakiko ngwenyi: “Yehova napu chinjiho wakumipayisa, kahou wenyi awavisa nawa napu chinjiho likumbi lyalelo mwomwo kamwawanyine chuma numba chimwe chakunguhanyina mulongako.”* Vakiko vambile ngwavo: “Eyo, napu chinjiho.”
6 Jino Samwele ambile kuli vatu ngwenyi: “Yehova uze azachishile Mose naAlone, uze alowele vakakuluka jenu mulifuchi lyaEjipitu+ napu chinjiho.
7 Shikaho imanenu kulu mangana ngumisopese kumeso aYehova kweseka navyuma vyakwoloka vyosena vize Yehova amilingilile enu navakakuluka jenu.
8 “Omu Yakova ahetele muEjipitu,+ nomu nawa vakakuluka jenu vaputukile kuteta kuli Yehova avakafwe,+ Yehova atumine Mose+ naAlone mangana valovole vakakuluka jenu muEjipitu nakuvaneha mulifuchi lino vatwamemo.+
9 Oloze vakakuluka jenu vavulyamine Yehova Kalunga kavo, ngocho avahanyine+ mumavoko aShisela,+ kapitau kamaswalale vakuHazole, namumavoko avaFwilishite,+ namumavoko amwangana waMowave,+ kaha valwile navo jita.
10 Shikaho vatetele kuli Yehova avakafwe.+ Vambile ngwavo, ‘Tunalingi shili,+ mwomwo tunakuseze ove Yehova nakulemesa vaMbale+ navifwanyisa vyaAshatolete.+ Tupululule mumavoko avaka-kole jetu mangana tukuzachilenga.’
11 Jino Yehova atumine Yelumbale,+ naMbetane, naYefweta,+ naSamwele,+ kaha amipululwile mumavoko avaka-kole jenu vaze vamijingilikile, ngocho mwapwilenga vakukingiwa.+
12 Omu mwamwene Nahashe,+ mwangana wavaAmone neza nakulwa nenu jita, mwambilenga kuli ami ngwenu, ‘Katute, tuli nakusaka mwangana atuyule,’+ okunyi Yehova Kalunga kenu ikiye Mwangana wenu.+
13 Shikaho ou ikiye mwangana wenu munalisakwila, ou munalombo. Talenu! Yehova namitongwela mwangana amiyule.+
14 Kachi nge namwivwanga Yehova+ woma, nakumuzachilanga,+ nakwivwililanga mulizu lyenyi,+ kachi nge enu namwangana uze mwamiyula namukavangizanga Yehova Kalunga kenu, kachi nge kamweshi kulikanga kumazu aYehovako, kaha nachiwaha.
15 Oloze kachi nge kamweshi kwivwilila mulizu lyaYehovako, kachi nge namulikanga kumazu aYehova, kaha Yehova mwamizangamisa enu namasenu.+
16 Shikaho imanenu kulu mumone chuma chachinene mwalinga Yehova hameso enu.
17 Yino hingonde yakwaha tiliku, nyi mweka? Oloze nangulomba Yehova anehe mikalateta navula. Ngocho namutachikiza ngwenu munalingi upi waunene kumeso aYehova hakulomba vamihane mwangana.”+
18 Samwele alombele kuli Yehova, kaha Yehova anehele mikalateta navula halikumbi lize. Ngocho vatu vevwile Yehova naSamwele woma.
19 Kaha vatu vosena vambile kuli Samwele ngwavo: “Tulombeleko etu vangamba jove+ kuli Yehova Kalunga kove kuchina natufwa. Mwomwo kujishili jetu tunahakilako upi hakulomba vatuhane mwangana.”
20 Jino Samwele ambile kuli vatu ngwenyi: “Kanda namwivwa womako. Chikupu vene munalingi upi waunene chikuma. Oloze enu kanda namulitwamina kukavangiza Yehovako,+ zachilenunga Yehova namichima yenu yosena.+
21 Kanda namupyapumuka nakukavangiza vyuma vyamokomoko,+ vyakuzeneka nganyo,+ vize kavyeshi kuhasa kumipulululako, mwomwo vinapu vyamokomoko.
22 Yehova keshi kukaseza vatu jenyiko+ mwomwo yalijina lyenyi lyalinene.+ Yehova nasake ngwenyi mupwenga muvatu jenyi.+
23 Ami nawa kangweshi kuhasa kulinga shili kuli Yehova hakulitwamina kumilombelako. Nanguminangula lika mangana mulingenga mwamwaza, mwakwoloka.
24 Enu ivwenunga Yehova+ woma nakumuzachilanga nakashishi,* namichima yenu yosena. Achitalenu vyuma vyavinene namilingila.+
25 Oloze nge namuzunguma nakulinga vyuma vyavipi, kaha navamilalishila kumwe+ namwangana wenu.”+
Kwinyikila Chamwishi
^ Hepe., “ami ngunevwilila mulizu lyenu kutalisa.”
^ Hepe., “mwatambukanga kulutwe lwenu.”
^ Chipwe “majika kanwa.”
^ Hepe., “kamwawanyine chuma chimwe mulivoko lyamiko.”
^ Chipwe “mumuchano.”
