Samwele 1 13:1-23
13 Saulu apwile namyaka yakusemuka . . .* omu aputukile kuyula,+ kaha ayulile vaIsalele hamyaka yivali.
2 Saulu asakwile malunga 3,000 hali vaIsalele. Hamalunga kana ambachileho 2,000 vapwenga naikiye kuMikimashe namungalila yajipili yaMbetele. Ambachileho nawa malunga 1,000 vapwenga naYonatane+ kuNgiveya,+ nganda yavaMbenjamine. Oloze vatu vasalileho avasuwile vayenga mutu himutu kumbalaka yenyi.
3 Jino Yonatane ajihile maswalale javaFwilishite+ vaze vapwile kuNgeva.+ Ngocho vaFwilishite vevwile mujimbu kana. Kaha Saulu embile luneta+ mulifuchi lyosena nakwamba ngwenyi: “Enu vaHepeleu, ivwililenu!”
4 VaIsalele vosena vevwile mujimbu uno ngwavo: “Saulu najihi maswalale javaFwilishite, ngocho vaIsalele navavahunga jino kuli vaFwilishite.” Shikaho vatu vavalwezele vakavangize Saulu kuNgilingale.+
5 VaFwilishite navakiko valikungulwile mangana valwenga jita navaIsalele. Vapwile namatemba ajita 30,000, navaka-kutambukila hatuvalu 6,000, namaswalale vavavulu kwijiva nge usekeseke wakungenge yakalungalwiji.+ Kaha vayile nakutunga chilombo chavo muMikimashe kumututuko waMbete-avene.+
6 Kaha malunga vavaIsalele valizakaminyine chikuma mwomwo vamwene ngwavo vali muukalu. Ngocho vatu vaswaminenga mumena akusendeveka,+ namutupila, nakumalolwa, namutupete vamumavu, namumashima.
7 VaHepeleu vamwe vazaukile naYotau nakuchinyina kuNgate nakuNgileyate.+ Oloze Saulu apwile lika kuNgilingale, kaha vatu vaze vamukavangijilenga vosena valichikiminyinenga.
8 Saulu avandaminyine makumbi 7 palanga nomu lwahetele lwola luze ambile kwiza Samwele. Oloze Samwele kejile washi kuNgilingaleko, ngocho vatu vaputukile kulimwanga nakumuseza Saulu.
9 Kaha Saulu ambile ngwenyi: “Ngunehelenu chimuna wakuvatula wakulumba namawana akusolola kuunda.” Ngocho alumbile uze chimuna wakuvatula.+
10 Jino omu akumishile kulumba chimuna wakuvatula, Samwele ejile. Kaha Saulu amusesele mangana amukisule.
11 Samwele ambile ngwenyi: “Ika unalingila chuma kana?” Saulu akumbulwile ngwenyi: “Ngwamonanga vatu vali nakulimwanga,+ ove nawa kawezanga halwola wangulwezangako. Kaha nawa vaFwilishite vanalikungulwila kuMikimashe.+
12 Shikaho ngwalyambanga ngwami, ‘VaFwilishite navangulukuka jino kuno kuNgilingale, oloze ami kanda ngulombe kuli Yehova angwivwile uselewa.’ Ngocho ngwachimonanga kupwa chakutamo kulumba chimuna wakuvatula.”
13 Jino Samwele ambile kuli Saulu ngwenyi: “Unalingi vyuma vyauleya. Kawononokele lushimbi lwaYehova Kalunga kove luze akuhanangako.+ Nge wononokanga, kachi Yehova nazamisa wangana wove mangana uyulenga vaIsalele haya myaka yosena.
14 Oloze wangana wove kaweshi kushimbulako.+ Yehova mwawana mutu weka uze nevwila kuwaha kumuchima.+ Yehova mwamutongola apwenga twamina yavatu jenyi+ mwomwo ove kawakavangijile vyuma akulwezanga Yehovako.”+
15 Kaha Samwele afumine kuNgilingale nakuya kuNgiveya, nganda yavaMbenjamine. Jino Saulu alavile vatu, kaha vaze asalile navo vapwile kafwe malunga 600.+
16 Saulu, namwanenyi Yonatane, navatu vaze vapwile navo vatwamine lika kuNgeva,+ nganda yavaMbenjamine. VaFwilishite vatungile chilombo chavo kuMikimashe.+
17 Jino vaka-kupupa vafuminenga muchilombo chavo chavaFwilishite mumazavu atatu. Lizavu limwe lyatalikishilenga mujila yakuya kuOfwola kulifuchi lyaShuwale.
18 Lizavu likwavo lyatalikishilenga mujila yakuya kuMbete-holone,+ kaha lizavu lyeka lyatalikishilenga mujila yakuya kungiza yize yalihachile nachinema chaZevowime kwakamwihi napambo.
19 Jino mulifuchi lyavaIsalele kamwapwile fuli numba umweko, mwomwo vaFwilishite vambile ngwavo: “Kanda namupwa fuliko kuchina vaHepeleu navafulanga jipoko jamikwale namakunga.”
20 Ngocho vaIsalele vosena vayilenga kuli vaFwilishite mangana vakavasambwilenga matemo avo avangombe, najipiki, najingimbu, najichekeshi.
21 Ndando yakusambwisa litemo lyavangombe, napiki, nachinoma chamazo atatu, nangimbu, nandando yakuwahishisa mumba yapwilenga pimu* yimwe.
22 Kahomu lyahetele likumbi lyajita, vatu vosena vaze vapwile naSaulu naYonatane+ kavapwile najipoko jamikwale chipwe makungako. Saulu namwanenyi Yonatane vakiko kaha vapwile navitwa.
23 Jino maswalale javaFwilishite vayile kujila yapwilile kuchinema chakuMikimashe.+
Kwinyikila Chamwishi
^ Muvisoneka vyachiHepeleu kavavulukamo myaka yenyi yakusemukako.
^ Chipezaliso chakushikulu chakweseka kafwe muvimbwa vivali vyashekele vyakusokesa muvimbwa vitatu.
