Samwele 1 15:1-35
15 Jino Samwele ambile kuli Saulu ngwenyi: “Yehova angutumine ngukuwavise mangana upwenga umwangana wavatu jenyi vaIsalele.+ Shikaho ivwilila vyuma nahanjika Yehova.+
2 Yehova wamayongomena nambe ngwenyi, ‘Nangusopesa vaAmaleke mwomwo vemanyinyine vaIsalele nakole omu vafumine muEjipitu.+
3 Ngocho yako ujihe vaAmaleke+ nakuvanongesela+ kumwe navyuma vyavo vyosena. Kanda nauvatetelako, oloze uvajiha vosena,+ malunga namapwevo, vanyike navakemba, vangombe namikoko, vangamela navimbulu.’”+
4 Shikaho Saulu asanyikile vatu, kaha avalavile kuTelaime. Maswalale vakutambuka hamavu vapwile 200,000, kaha malunga vavaYuta vapwile 10,000.+
5 Kufumaho, Saulu ayile kunganda yavaAmaleke, avaswaminyinyine kuchinema.*
6 Jino Saulu ambile kuli vaKene+ ngwenyi: “Katukenu, fumenu muli vaAmaleke kuchina nanguminongesela kumwe navakiko.+ Mwomwo enu mwasolwelele vaIsalele+ vosena zangi yakwilila omu vafumine muEjipitu.” Ngocho vaKene vafumine muli vaAmaleke.
7 Kufumaho, Saulu ajihile vaAmaleke+ kufuma kuHavila+ palanga nakuShule,+ kwakamwihi naEjipitu.
8 Akwachile Angange,+ mwangana waAmaleke, oloze vatu vosena avanongesele napoko yamukwale.+
9 Saulu navatu jenyi kavanongesele Angange, namikoko vamwaza, navangombe vamwaza, navizamba jamikoko vamwaza, navimuna veka vakununa, navyuma vyamwaza vyosenako.+ Oloze vyuma vyamokomoko vyosena navize kavasakileko vavinongesele.
10 Jino Yehova ahanjikile kuli Samwele ngwenyi:
11 “Ngunevu kupihya* hakutongola Saulu kupwa mwangana, mwomwo nakane kungukavangiza, keshi nakulinga mwaya mazu amiko.”+ Ngocho Samwele apihililile chikuma hachuma echi, kaha atetele kuli Yehova ufuku wosena.+
12 Jino Samwele amenekele chimenemene mangana aliwane naSaulu. Oloze vamulwezele ngwavo: “Saulu ezanga kuKalamele,+ kaha emikanga lilolwa lyakumwanukilaho.+ Kufumaho ayanga kuNgilingale.”
13 Samwele alihumanganyine naSaulu. Kaha Saulu ambile kuli Samwele ngwenyi: “Yehova akukisule. Ngunalingi mwaya mazu aYehova.”
14 Oloze Samwele ambile ngwenyi: “Nyi ovo mikoko navangombe nguli nakwivwa vaka?”+
15 Saulu ambile ngwenyi: “Tuneza navo kufuma kuli vaAmaleke. Mikoko navangombe vamwaza kavavajihileko mangana vapwenga wana wakulumba kuli Yehova Kalunga kove. Oloze vyuma vyosena tunavinongesa.”
16 Ngocho Samwele ambile kuli Saulu ngwenyi: “Mana ngukulweze vyuma angulwezanga Yehova naufuku.”+ Kaha Saulu ambile kuli Samwele ngwenyi: “Hanjika.”
17 Samwele ambile ngwenyi: “Ove kawalimwene kupwa uwamundende+ omu vakutongwele kupwa utwamina wamiyachi yavaIsalele, nomu Yehova akuwavishile upwenga umwangana wavaIsaleleko nyi?+
18 Jino Yehova akutumanga, akwambanga ngwenyi, ‘Yako ukanongese+ vaAmaleke vaka-shili. Kalwe navo jita palanga nomu naukavalalisa vosena.’+
19 Ngocho ikaze walupukilanga kuvyuma vyakupukula+ nakulinga jino mwamupi kumeso aYehova mukutela kwononoka mulizu lyaYehova?”
20 Oloze Saulu ambile kuli Samwele ngwenyi: “Ami ngunononoka mulizu lyaYehova. Ngwayanga nakuzata mulimo angutumanga Yehova, kaha nawa ngunanehe Angange mwangana wavaAmaleke. VaAmaleke vosena nawa ngunavanongesa.+
21 Oloze havyuma vyakupukula, vatu vambatangaho mikoko navangombe vamwaza vaze vatelanga kunongesa. Vavambatanga mangana vapwenga wana wakulumba kuli Yehova Kalunga kove kuNgilingale.”+
22 Oloze Samwele amwambile ngwenyi: “Kutala Yehova eji kwivwilanga kuwaha mawana akulumba navimuna vakuvatula+ kuhambakana kwononoka mulizu lyenyi nyi? Tala! Kwononoka Yehova chinawahe kuhambakana vimuna vakuvatula.+ Kaha nawa kwivwilila chinawahe kuhambakana maji+ avizamba jamikoko.
23 Mwomwo kulikanga+ chineseka hamwe nashili yakutaha,+ kaha vilinga vyakazamuzamu vineseka hamwe nakuzachisa visava nakulemesa makombelo.* Hakuwana nge unakane kwononoka mulizu lyaYehova,+ ngocho nakukane kupwa umwangana.”+
24 Kaha Saulu ambile kuli Samwele ngwenyi: “Ngunalingi shili, mwomwo ngunazomboka lizu lyaYehova nalizu lyove. Ngwevwanga vatu woma, shikaho ngwevwililanga mulizu lyavo.
25 Oloze ngukonekele shili yami, ngwitavise nguyenga hamwe nayove mangana ngukalifukule kuli Yehova.”+
26 Jino Samwele ambile kuli Saulu ngwenyi: “Kangweshi kuya hamwe nayoveko mwomwo unakane kwivwilila mulizu lyaYehova, ngocho Yehova nakukane kupwa umwangana wavaIsalele.”+
27 Omu Samwele anyingulukile ngwenyi ayenga, Saulu amukwachile kusongo yandeleji yenyi yakuzeneka mavoko, kaha yapulikile.
28 Shikaho Samwele amwambile ngwenyi: “Likumbi lyalelo Yehova nakutambula* wangana waIsalele, kaha mwauhana kuli mukwenu weka uze nawahe kukuhambakana ove.+
29 Kaha nawa ou Wamulemu waIsalele+ keshi kwongako+ chipwe kwalumuna vishinganyeka vyenyi,* mwomwo kapwa mutuko numba alumune vishinganyeka vyenyi.”*+
30 Saulu ambile ngwenyi: “Ngunalingi shili. Oloze ngunakulembelela, nguvumbike kumeso avakulwane javatu jami nakumeso avaIsalele. Tuyenga hamwe mangana ngukalifukule kuli Yehova Kalunga kove.”+
31 Ngocho Samwele ayile hamwe naSaulu, amukavile munyima, kaha Saulu akalifukwile kuli Yehova.
32 Kufumaho, Samwele ambile ngwenyi: “Nehenu Angange mwangana waAmaleke kuno kuli ami.” Kaha Angange ayile kuli Samwele oku ali nakuseswangila,* mwomwo kunyima alyambilenga ngwenyi: “Ngunayovoka lyehi kukufwa.”
33 Oloze Samwele ambile kuli Angange ngwenyi: “Nganomu mapwevo vafwishile vana vavo omu wavajihilenga napoko yove yamukwale, mukiko mwafwisa nanoko.” Ngocho Samwele atetele Angange vihanda vihanda kumeso aYehova kuNgilingale.+
34 Kufumaho, Samwele ayile kuLama, Saulu nawa ayile kuzuvo yenyi kuNgiveya.
35 Samwele kalimwene cheka naSauluko palanga nakulikumbi afwile, kaha alishonene chikuma hali Saulu.+ Yehova evwile kupihya hakutongola Saulu kupwa mwangana wavaIsalele.+
Kwinyikila Chamwishi
^ Chipwe “kumwanakalwiji.”
^ Chipwe “Ngunaliveye.”
^ Hepe., “vatelafwime,” kulumbununa, tulunga vamutanga; tuponya.
^ Hepe., “napulu.”
^ Chipwe “kuliveya.”
^ Chipwe “aliveye.”
^ Chipwe pamo, “oku nawahilila.”