Samwele 1 18:1-30
18 Omu Ndavichi akumishile kuhanjika naSaulu, Yonatane+ alikwachile usepa naNdavichi,* kaha amuzangile chikuma nganomu alizangile ivene.*+
2 Kufuma vene halikumbi lize, Saulu atwaminenga lika naNdavichi, kamwitavishile akinduluke kuzuvo yaiseko.+
3 Yonatane naNdavichi valikashile chivwasano+ mwomwo Yonatane azangile chikuma Ndavichi nganomu alizangile ivene.*+
4 Kaha Yonatane ambachile ndeleji yenyi yakuzeneka mavoko, ayihanyine Ndavichi. Amuhanyine nawa uvwalo weka, napoko yenyi yamukwale, nauta wenyi wamanana, namuhya wenyi.
5 Ndavichi ayilenga kweshokwo amutuminenga Saulu, kaha afukililenga.*+ Ngocho Saulu amutongwele kupwa kapitau kamalunga vaka-jita.+ Kahechi chasuulwishile vatu vosena navangamba jaSaulu.
6 Omu Ndavichi navatu veka vakindulukilenga kufuma kuze vayilenga nakujiha vaFwilishite, mapwevo valovokelenga mujinganda josena jamuIsalele nakusesa Mwangana Saulu oku vali nakwimba myaso+ nakukina. Vembilenga tungoma,+ navisaji vyamikole yitatu, kaha vawahilililenga.
7 Mapwevo kana vembilenga ngwavo:“Saulu najihi makombakaji,Ndavichi najihi tununu natununu.”+
8 Ngocho Saulu apihililile chikuma+ hakwivwa mwaso kana, mwomwo ambile ngwenyi: “Vali nakwamba ngwavo Ndavichi najihi tununu natununu, oloze ami ngwavo ngunajihi makombakaji kaha. Kunasale jino kumuhana wangana.”+
9 Kufuma vene halikumbi lize, Saulu ashinganyekelelenga Ndavichi vyuma vyavipi.
10 Lichako, shipilitu yayipi yakufuma kuli Kalunga yejile hali Saulu,+ kaha aputukile kutambangila* muzuvo yenyi oku Ndavichi ali nakumwimbila kalyalya+ ngana muze alingilenga makumbi osena. Jino Saulu apwile nalikunga mulivoko lyenyi,+
11 kaha alyashile Ndavichi.+ Alyambile mumuchima wenyi ngwenyi: “Nangumwasa likunga limutuvasane nakwingila hambango.” Oloze Ndavichi alipekelelyo hamapapa osena avali amwashile.
12 Ngocho Saulu evwilenga Ndavichi woma mwomwo Yehova apwilenga naNdavichi.+ Oloze Kalunga ombile nyima Saulu.+
13 Shikaho Saulu afumishile Ndavichi kuzuvo yenyi, amutongwele kupwa kapitau kalikombakaji. Kaha Ndavichi atwaminyinyinenga maswalale kujita.*+
14 Ndavichi afukililile*+ muvyuma vyosena alingilenga, kaha Yehova apwilenga naikiye.+
15 Omu Saulu amwene ngwenyi Ndavichi ali nakufukila chikuma, amwivwilenga woma.
16 Oloze vaIsalele vosena navaYuta vosena vazangile Ndavichi mwomwo avatwaminyinyinenga kujijita.
17 Kutwala muze, Saulu ambile kuli Ndavichi ngwenyi: “Mwanami wamukulwane Melave+ owe. Nangukuhanayo apwenga pwevo lyove.+ Chipwe ngocho, ngunasake upwenga lika uwakumika nakulwa jijita jaYehova.”+ Saulu ahanjikile ngocho mwomwo alyambile mumuchima wenyi ngwenyi: ‘Kanda nangumujiha amiko, oloze vakamujihe vaFwilishite.’+
18 Jino Ndavichi ambile kuli Saulu ngwenyi: “Ami yami iyaze? Mokomoko vausoko wami, vaka-tanga yatata vakiko veyaze muIsalele numba ngupwenga nguisewenu yamwangana?”+
19 Oloze omu lwahetele lwola lwakuhana Melave kuli Ndavichi, vawanyine nge Melave vamuhana lyehi kuli Atalyele+ kaMehola kupwa pwevo lyenyi.
20 Jino Mikale+ mwanaSaulu azangile chikuma Ndavichi. Ngocho Saulu vamulwezele mujimbu kana, kaha awahililile.
21 Saulu alyambile ngwenyi: “Nangumuhanayo mangana apwenga muheto kuli ikiye, kaha vaFwilishite navamujiha.”+ Shikaho Saulu ambile cheka kuli Ndavichi ngwenyi: “Likumbi lyalelo nangukuhana ou pwevo mangana upwenga utatawenu.”
22 Kufumaho Saulu alwezele vangamba jenyi ngwenyi: “Hanjikenu naNdavichi kupenge mumulweze ngwenu, ‘Tala! Mwangana nakwivwila kuwaha, kaha vangamba jenyi vosena nawa vanakuzange. Shikaho, mbata mwanamwangana mangana upwenga uisewenu.’”
23 Omu vangamba jaSaulu valwezele Ndavichi mazu kana, Ndavichi ambile ngwenyi: “Kutala chinapu chuma chachindende ami kumbata mwanamwangana okunyi nguchihutu, kaha nawa kangweshi naulemuko nyi?”+
24 Ngocho vaze vangamba valwezele Saulu ngwavo: “Awa akiko mazu nahanjika Ndavichi.”
25 Jino Saulu avambile ngwenyi: “Yenunga mumulweze Ndavichi ngwenu, ‘Mwangana keshi nakusaka umuhane matemoko,+ oloze ali nakusaka umunehele mivumbo 100 yakuulunga+ wavaFwilishite mangana ulinge sambanjinga kuli vaka-kole jamwangana.’” Saulu apwile nakusaka Ndavichi vamujihe kuli vaFwilishite.
26 Ngocho vaze vangamba jaSaulu vakalwezele Ndavichi mazu ahanjikile mwangana, kaha Ndavichi awahililile hakwivwa mujimbu wakumbata mwanamwangana.+ Jino shimbu kanda lwola vamutongwelele luhete,
27 Ndavichi ayile navatu jenyi kujita, kaha akajihile malunga vavaFwilishite 200. Ngocho anehele yize mivumbo yosena vamulwezele kuneha kuli mwangana mangana ambate mwanamwangana. Shikaho Saulu amuhanyine mwanenyi Mikale apwenga pwevo lyenyi.+
28 Jino Saulu amwene ngwenyi Yehova ali naNdavichi,+ kaha nawa mwanenyi Mikale nazange Ndavichi.+
29 Shikaho Saulu evwilenga chikuma Ndavichi woma, kaha Ndavichi apwile muka-kole waSaulu mukuyoya chenyi chosena.+
30 Jino vilolo javaFwilishite vejilenga nakulwa jita. Oloze heshoho vejilenga nakulwa jita, Ndavichi avafungulwilenga* kuhambakana vangamba jaSaulu vosena.+ Ngocho lijina lyaNdavichi lyayile fuma.+
Kwinyikila Chamwishi
^ Chipwe “nganomu azangile mwono wenyi.”
^ Chipwe “mwono waYonatane walipanjikile namwono waNdavichi.”
^ Chipwe “nganomu azangile mwono wenyi.”
^ Chipwe “kaha alingilenga mwamangana.”
^ Chipwe “aputukile kuhanjika nge kapolofweto.”
^ Hepe., “alovokelenga nakwingila kumeso avatu.”
^ Chipwe “alingile mwamangana.”
^ Chipwe “alingilenga mwamangana chikuma.”
