Samwele 1 19:1-24
19 Kutwala muze, Saulu alwezele mwanenyi Yonatane navangamba jenyi vosena ngwenyi mwajiha Ndavichi.+
2 Hakuwana nge Yonatane, mwanaSaulu azangile chikuma Ndavichi,+ ngocho alwezele Ndavichi ngwenyi: “Tata Saulu ali nakusaka kukujiha. Shikaho hamene nachimene ukazangame. Ukaye nakuswama kuchihela chakuhengama.
3 Jino ami nangukaya natata muchipapa, kuchihela kuze naukaswama, kaha nangukemana kwakamwihi naikiye nakuhanjika vyayove. Kachi nge mwakahanjika vimwe hali ove, kaha nangukeza nakukulweza.”+
4 Jino Yonatane alwezele ise Saulu vyuma vyamwaza alingile Ndavichi.+ Ambile ngwenyi: “Ove mwangana, kanda naulinga chuma chachipi kuli ngamba yove Ndavichiko, mwomwo kavulumwine mulonga kuli oveko. Vyuma nakulingila vinakunganyalisa chikuma.
5 Ahakile mwono wenyi muponde hakujiha uze kaFwilishite,+ ngocho Yehova alwilile vaIsalele vosena. Chuma kana wachimwene nameso ove kapu, kaha wawahililile chikuma. Shikaho ikaze naulingila shili hakujiha Ndavichi nakumwanga jino manyinga amutu wakuzeneka mulonga?”+
6 Ngocho Saulu evwililile mulizu lyaYonatane, kaha alishingile ngwenyi: “Omu ayoya Yehova tu, kangweshi kumujihako.”
7 Kufumaho, Yonatane asanyikile Ndavichi, amulwezele vyuma vyosenevi. Jino Yonatane anehele Ndavichi kuli Saulu, kaha Ndavichi azachililenga Saulu ngana muze alingilenga kunyima.+
8 Kutwala muze, jita yepukile cheka navaFwilishite, kaha Ndavichi ayile nakulwa navo. Ajihile vaFwilishite vavavulu, kaha veka vachinyine.
9 Jino shipilitu yayipi yakufuma kuli Yehova yejile hali Saulu+ omu atwamine muzuvo yenyi oku nakwate likunga mulivoko lyenyi. Halwola kana, Ndavichi apwile nakumwimbila kalyalya.+
10 Kaha Saulu ashile Ndavichi likunga mangana limutuvasane nakwingila hambango, oloze Ndavichi alipekelelyo, kaha lyengilile hambango. Ngocho Ndavichi achinyine ufuku vene uze.
11 Kufumaho, Saulu atumine valuwa jenyi vakalame kuzuvo yaNdavichi mangana kuheta nachimene vamujihe.+ Oloze Mikale alwezele lunga lyenyi Ndavichi ngwenyi: “Kachi nge kaweshi kuchina* ufuku unoko, hamene naufwa.”
12 Hahaze vene, Mikale alowelele Ndavichi munjanena mangana achine.
13 Kufumaho, Mikale ambachile telafwime,* amuhakile hakahela. Ambachile nawa chikuto chamangona avapembe, achihakile haze asachililenga Ndavichi mutwe, kaha afwikile uze telafwime lihina.
14 Jino Saulu atumine valuwa vakasake Ndavichi. Oloze Mikale avalwezele ngwenyi: “Ali nakuviza.”
15 Ngocho Saulu atumine cheka vaze valuwa kuli Ndavichi, avambile ngwenyi: “Ngunehelenuyo hakahela kenyi mangana ngumujihe.”+
16 Omu vaze valuwa vengilile muzuvo yaNdavichi, vawanyine hakahela hali telafwime,* kaha nawa haze asachililenga Ndavichi mutwe hali chikuto chamangona avapembe.
17 Ngocho Saulu ambile kuli Mikale ngwenyi: “Ika unangulelevekela nakwechelela muka-kole wami+ achine?” Oloze Mikale akumbulwile Saulu ngwenyi: “Angulwezanga ngwenyi, ‘Ngweche nguyenga, nge chiku nangukujiha.’”
18 Jino Ndavichi achinyine, ayile kuli Samwele kuLama.+ Kaha amuhichililemo vyuma vyosena vize amulingile Saulu. Kufumaho Ndavichi naSamwele vayile nakutwama kuNayote.+
19 Kutwala muze, Saulu evwile ngwavo: “Ndavichi ali kuNayote muLama.”
20 Hahaze vene, atumine valuwa jenyi vakakwate Ndavichi. Omu vamwene vapolofweto vavakulwane vali nakupolofweta, kaha nawa Samwele nemana, ali nakuvatwaminyina, shipilitu yaKalunga yejile hali ava valuwa jaSaulu, ngocho navakiko vaputukile kulinga nge muze valingilenga vapolofweto.
21 Omu vakalwezele Saulu vyuma kana, hahaze vene Saulu atumine valuwa veka, oloze navakiko nawa vaputukile kulinga nge muze valingilenga vapolofweto. Atumine cheka lizavu lyamuchitatu lyavaluwa, kaha navakiko nawa vaputukile kulinga nge muze valingilenga vapolofweto.
22 Kutwala muze, Saulu naikiye ayile kuLama. Omu ahetele kulishima lyalinene lyakuSeku, ahulishile vatu ngwenyi: “Samwele naNdavichi vali kulihi?” Vakiko vamulwezele ngwavo: “Vali kuNayote+ muLama.”
23 Omu Saulu afumine kuze nakuya kuNayote muLama, shipilitu yaKalunga yejile hali ikiye, kaha ayilenga mujila oku ali nakulinga nge muze valingilenga vapolofweto palanga nomu akahetele kuNayote muLama.
24 Azulile uvwalo wenyi, kaha atwalileho lika kulinga nge muze valingilenga vapolofweto omu apwile kumeso aSamwele. Asavalile kuze uselesele* musana wosena naufuku wosena. Shikaho vatu vahanjikililenga kashimutwiji kano ngwavo: “Kumana Saulu naikiye hikapolofweto?”+
Kwinyikila Chamwishi
^ Chipwe “Kachi nge kaweshi kuchinyisa mwono wove.”
^ Chipwe “kalunga wamutanga; kaponya.”
^ Chipwe “kalunga wamutanga; kaponya.”
^ Chipwe “chakuhona kuvwala kanawa.”
