Samwele 1 20:1-42
-
Yonatane mwashishika kuli Ndavichi (1-42)
20 Jino Ndavichi achinyine kuNayote muLama. Ayile kuli Yonatane, amwambile ngwenyi: “Ngunalingi ika?+ Mulonga muka ngunavulumuna? Shili muka ngunalingi kuli iso numba asake kungujiha?”
2 Kaha Yonatane amwambile ngwenyi: “Nduma,+ kaweshi kufwako. Tata keshi kulinga chuma chimwe chakuzeneka kungulweza amiko, numba chuma kana chipwa chachindende chipwe chachinene. Tata mwanguswekela ngachilihi chuma kanechi? Chuma kana kacheshi kulingiwako.”
3 Oloze Ndavichi alishingile cheka nakwamba ngwenyi: “Iso natachikiza ngwenyi ove unangwivwila uselewa.+ Shikaho mwamba ngwenyi, ‘Chihande kana kanda namuchilweza Yonataneko kuchina mwapihilila.’ Oloze omu ayoya Yehova tu, nomu wayoya ove tu, ami kalinwomu ngufwenga.”+
4 Kaha Yonatane ambile kuli Ndavichi ngwenyi: “Vyeshovyo naungulweza, nangukulingila.”
5 Ngocho Ndavichi ambile kuli Yonatane ngwenyi: “Hamene nakukapwa chiwanyino chakumweka chakakweji,+ shikaho ngwatela kukatwama hamwe namwangana nakulya vyakulya. Oloze ngusuule nguyenga ngukaswame muchipapa palanga nahamenyauze chingoloshi.
6 Kachi nge iso mwakangutonda, kaha ukamulweza ngwove, ‘Ndavichi angulombanga lisesa ngwenyi alahile kunganda yenyi kuMbetelema+ mwomwo kuli chilika chatanga chakuhana chimuna wakuvatula chize veji kulinganga mwaka himwaka.’+
7 Kachi nge mwakahanjika ngwenyi, ‘Ukalu wauchi,’ kaha tachikiza ngwove ami ngamba yove nangutwama mukuunda. Oloze nge mwakapihilila, kaha tachikiza ngwove nangufunyina kungulemeka.
8 Ngusolwele zangi yakwilila ami ngamba yove,+ mwomwo unalikase chivwasano nayami ngamba yove kumeso aYehova.+ Kachi nge nguli namulonga,+ kaha ngujihe vene yove. Ikaze naungusuwila kuli iso angujihe ikiye?”
9 Yonatane ambile kuli ikiye ngwenyi: “Kangweshi kuhasa kulinga chuma kana kuli oveko. Nanguhonena ikaze kukulweza kachi nge ngunamono ngwami tata nakufunyina kukulemeka?”+
10 Jino Ndavichi ambile kuli Yonatane ngwenyi: “Iya mweza nakungulweza kachi nge iso mwakukumbulula nautenu?”
11 Yonatane ambile kuli Ndavichi ngwenyi: “Tuyenga muchipapa.” Kaha vosena vayile muchipapa.
12 Jino Yonatane ambile kuli Ndavichi ngwenyi: “Yehova Kalunga kaIsalele apwenga chinjiho. Nanguya nakulohwelela tata hamene halwola nge luno, chipwe hamenyauze. Kachi nge nangukamona ngwami nakwivwila kuwaha, kaha nangukakutumina mazu nakukulweza.
13 Oloze nge nangukamona ngwami tata nakufunyina kukulemeka, kaha Yehova akanguzangamise mwamunene kachi nge kangweshi kukakulwezako nakukusuula ukaye mukuunda. Yehova apwenga nayove+ ngana muze apwile natata.+
14 Ngusolwele zangi yakwilila ngana yize eji kusololanga Yehova. Ngusolwele zangi kana shimbu nguchili nguwamutonyi nomu nawa nangukafwa.+
15 Kanda naukalitwamina kusolwela vaze vakuzuvo yami+ zangi yove yakwililako numba nge Yehova mwakanongesa vaka-kole jove vosena hano hamavu.”
16 Ngocho Yonatane alishikile lushiko navaze vakuzuvo yaNdavichi ngwenyi, “Yehova mwakazangamisa vaka-kole jaNdavichi.”
17 Shikaho Yonatane alwezele Ndavichi alishinge cheka mwomwo yazangi azangile Yonatane. Amuzangile chikuma ngana muze alizangile ivene.*+
18 Yonatane ambile kuli Ndavichi ngwenyi: “Hamene nakukapwa chiwanyino chakumweka chakakweji,+ ngocho navakakutonda mwomwo hachitwamo chove kaheshi kukapwa mutuko.
19 Hamenyauze hakikonyi navakakutonda chikuma. Ukeza kuno kuchihela waswamine lize likumbi, kaha ukatwama kwakamwihi nalilolwa eli.
20 Nangukasa mivwi yitatu kusali yimwe yalyeli lilolwa kwijiva nge nguli nakwasa chuma chimwe.
21 Kufumaho nangukatuma muka-kukafwa ngwami, ‘Yako utondetonde yize mivwi ngunase.’ Jino nge nangukamba kuli uze muka-kukafwa ngwami, ‘Mivwi oyo yinaholokela okwo, yimbate,’ kaha tachikiza ngwove unahase kukinduluka. Omu ayoya Yehova tu, nautwama mukuunda, kaweshi kufwako.
22 Oloze nge nangukamulweza ngwami, ‘Mivwi yinaholokela kulutwe lwove,’ kaha tachikiza ngwove watela kuya mwomwo Yehova nakusuula uyenga.
23 Yehova apwenga nayetu haya myaka yosena+ mwomwo yalushiko elu tunalishiki ami nayove.”+
24 Ngocho Ndavichi ayile nakuswama muchipapa. Kahomu chiwanyino chakumweka chakakweji chahetele, mwangana atwamine hachitwamo chenyi alyenga vyakulya.+
25 Mwangana Saulu atwaminyine kumbango hachitwamo chenyi atwaminenga makumbi osena, kaha alitalasanyine naYonatane. Avanele+ atwaminyine kuluhachi lwamwangana, oloze hachitwamo chaNdavichi kahapwile mutuko.
26 Saulu kahanjikile chuma chimwe halikumbi lizeko mwomwo alyambile mumuchima wenyi ngwenyi: ‘Kuli vyuma vimwe vinasoloka kuli Ndavichi vize vinamulingisa apihye.+ Kaha napihi vene.’
27 Likumbi lyakavangijileho kufuma halikumbi eli lyakumweka chakakweji, hachitwamo chaNdavichi kahapwile lika mutuko. Shikaho Saulu ahulishile mwanenyi Yonatane ngwenyi: “Mwomwo ika mwanaYese+ nahonena kwiza kukulya lelo nazau?”
28 Yonatane amukumbulwile ngwenyi: “Ndavichi angulombanga lisesa ngwenyi ayenga kuMbetelema.+
29 Ambanga ngwenyi, ‘Ngwitavise nguyenga, mwomwo tuli nachilika chatanga chakuhana chimuna wakuvatula munganda. Ndumbwami nangusanyika ngupwengako. Kachi nge unangwivwila uselewa, kaha ngwitavise nguyenga nakutala vandumbwami.’ Shikaho nahonena kupwa kumesa yayove mwangana.”
30 Jino Saulu apihililile naYonatane, amwambile ngwenyi: “Ove mwana wakusema kuli pwevo wakulikanga, ove unashinganyeka ngwove kangwatachikijile ngwami uli nakukundwiza mwanaYeseko nyi? Naulisawisa ove ivene nakusawisa nawa noko.*
31 Kachi nge mwanaYese mwayoyanga lika hano hamavu, kahove kaweshi kuzamako, nawangana wove nawa kaweshi kuzamako.+ Shikaho tuma mutu akamusake mangana anguneheleyo, mwomwo atela kufwa.”*+
32 Oloze Yonatane ambile kuli ise Saulu ngwenyi: “Naumujihila ika?+ Uno nalingi ika?”
33 Kaha Saulu ashile likunga Yonatane mangana amujihe.+ Ngocho Yonatane atachikijile ngwenyi ise ali nakufwila kujiha Ndavichi.+
34 Hahaze vene, Yonatane afumine kumesa oku napihilila. Kaha kalile vyakulya halikumbi lize lyamuchivali kufuma halikumbi lyakumweka chakakwejiko, mwomwo evwile kupihya hali Ndavichi+ hakuwana nge ise amusawile.
35 Lichako nachimene, Yonatane ayile muchipapa mangana akaliwane naNdavichi kweseka nomu valishikile. Ayile hamwe nakanyike muka-kumukafwa.+
36 Yonatane ambile kuli uze muka-kumukafwa ngwenyi: “Laha ukatonde mivwi yize nangwasa.” Uze muka-kumukafwa alahile, kaha Yonatane ashile mwivwi kulutwe lwayauze muka-kumukafwa.
37 Omu muka-kumukafwa ahetele haze waholokelele uze mwivwi, Yonatane amutambakanyine ngwenyi: “Mwivwi uli kulutwe lwove.”
38 Yonatane amutambakanyine cheka ngwenyi: “Zangulako! Yako washiwashi, kanda naulangisako!” Uze muka-kumukafwa ambachile yize mivwi nakukinduluka kuli mwata wenyi Yonatane.
39 Uze muka-kumukafwa katachikijile mwalumbunukilile vyuma kanako. Yonatane naNdavichi kaha vakiko vatachikijile.
40 Kufumaho, Yonatane ahanyine vitwa vyenyi kuli uze muka-kumukafwa, amulwezele ngwenyi: “Yako uvitwale munganda.”
41 Omu ayile uze muka-kumukafwa, Ndavichi afumine kuchihela aswamine chize chapwilile kumutamba wakusulo. Afukamine chameso hamavu, alifukwile mapapa katatu. Kaha valisweswenyele nakulila, oloze Ndavichi ikiye alilile chikuma.
42 Jino Yonatane ambile kuli Ndavichi ngwenyi: “Yakonga mukuunda hakuwana nge tunalishingi lushingo+ mulijina lyaYehova ngwetu, ‘Yehova apwenga nayami nayove, apwenga nawa navaka-tanga* yami navaka-tanga* yove haya myaka yosena.’”+
Kufumaho, Ndavichi akatukile nakuya. Kaha Yonatane nawa akindulukile munganda.
Kwinyikila Chamwishi
^ Chipwe “azangile mwono wenyi.”
^ Hepe., “nakusaula nawa usonyi wanoko.”
^ Hepe., “mwomwo napu mwanakufwa.”
^ Hepe., “nambuto.”
^ Hepe., “nambuto.”
