Samwele 1 21:1-15
21 Jino Ndavichi ejile kuli kapilishitu Ahimeleke kuNove.+ Kaha Ahimeleke aputukile kulichikimina omu alihumanganyine naNdavichi. Ambile ngwenyi: “Ika uli nakutambukila uka wove chakuzeneka vatu?”+
2 Ndavichi ambile kuli kapilishitu Ahimeleke ngwenyi: “Mwangana nangutumu kuzata mulimo umwe, kaha nangwambe ngwenyi, ‘Mulimo ngunakutumu kuzata, najindongi ngunakulweze kanda nauvilweza mutu wekako.’ Kaha ngunalishiki navakweze jami tukaliwanyine kuchihela chimwe.
3 Kachi nge uli najimbolo jitanu, kaha nguhanejo, chipwe nguhane vyeshovyo uli navyo.”
4 Oloze uze kapilishitu ambile kuli Ndavichi ngwenyi: “Kangweshi najimbolo jekako shina eji jajila+ kaha. Ngunahase kukuhanajo chikalu kaha nge vakweze jove kavalisavalile namapwevoko.”+
5 Kaha Ndavichi ambile kuli uze kapilishitu ngwenyi: “Pundu vene katwalisavalile namapwevoko, mwomwo namakumbi akunyima vene katweshi kulisavala namapwevo nge natuya kujitako.+ Jino kachi nge ava vakweze jami vanajilinga omu tunayinga kumilimo yeka, kahanyi lelo vanajili chikuma.”
6 Ngocho uze kapilishitu amuhanyine jize jimbolo jajila,+ mwomwo kakwapwile jimbolo jekako shina jize jakuhana Kalunga kaha, jize vafumishile kumeso aYehova nakujishishisa najimbolo jeka jakakahya halikumbi vajifumishileko.
7 Jino halikumbi kana, ngamba yaSaulu umwe apwile kuze, vamukwachile nakumutumbika kumeso aYehova. Lijina lyenyi apwile ikiye Ndowenge+ kaEtome,+ mukulwane watufunga twaSaulu.
8 Ndavichi ambile kuli Ahimeleke ngwenyi: “Uli nalikunga chipwe poko yamukwale nyi? Ami kangwambatanga poko yamukwale chipwe vitwa vyamiko, mwomwo ungeji nangutumu mwangana unapu wawashiwashi.”
9 Uze kapilishitu ambile ngwenyi: “Kuli kaha poko yamukwale yaNgolyate,+ uze kaFwilishite wajihile kuChinema* chaEla.+ Vanayivungila halihina, kaha vanayitumbika kunyima yalipunu.+ Nge unayisake, yimbate, mwomwo yikiko kaha yiliko.” Ndavichi ambile ngwenyi: “Kakweshi poko yeka yahambakana poko kanako. Nguhaneyo.”
10 Jino Ndavichi akatukile, atwalilileho naungeji wenyi wakuchina+ Saulu halikumbi lize, kaha ahetele kuli Akishe, mwangana waNgata.+
11 Vangamba jaAkishe vambile kuli mwangana ngwavo: “Ou keshi ikiye Ndavichi mwangana walifuchi nyi? Keshi ikiye uze vatu vembilenga oku vali nakukina ngwavo,
‘Saulu najihi makombakaji,
Ndavichi najihi tununu natununu’ nyi?”+
12 Ndavichi ashinganyekele hamazu kana, kaha evwile chikuma woma+ Akishe, mwangana waNgata.
13 Ngocho alyongele kuzaluka+ kumeso avo,* aputukile kulinga nge mutu wakuzaluka. Apwile nakufunjejeka havikolo nakulizezela kuwevu.
14 Jino Akishe ambile kuli vangamba jenyi ngwenyi: “Enu munamono ngwenu ou mutu azaluka, nyi munamunehela ika kuno kuli ami?
15 Kutala nguli nakutonda vatu vakuzaluka numba mungunehele ou mutu wakuzaluka nyi? Kutala natemo kwingila muzuvo yami nyi?”
