Samwele 1 23:1-29
23 Kutwala muze Ndavichi vamulwezele ngwavo: “VaFwilishite vali nakulwa jita navatu vamuKeila,+ kaha vali nakupupa vizungwilo.”
2 Ngocho Ndavichi ehwile Yehova+ ngwenyi: “Uno nguyenga nakujiha vaFwilishite tahi?” Yehova amukumbulwile ngwenyi: “Yakonga ujihe vaFwilishite nakupululula vatu vamuKeila.”
3 Oloze vatu jenyi vambile kuli ikiye ngwavo: “Muno muYuta+ tuli nakutwama nachiwomawoma, nyi ngachilihi nge natuya kuKeila tukalwe jita namazavu amaswalale javaFwilishite?”+
4 Shikaho Ndavichi ehwile cheka Yehova.+ Kaha Yehova amukumbulwile ngwenyi: “Katuka, yako kuKeila mwomwo nanguhana vaFwilishite mulivoko lyove.”+
5 Jino Ndavichi ayile navatu jenyi kuKeila, vakalwile jita navaFwilishite. Ajihile vatu vavavulu chikuma, kaha ambachile vimuna javo. Ndavichi apululwile vatu vamuKeila.+
6 Omu Aviyatale+ mwanaAhimeleke achinyinyine kuli Ndavichi muKeila, ambachile lipunu.
7 Jino Saulu vamulwezele ngwavo: “Ndavichi neza muKeila.” Kaha ambile ngwenyi: “Kalunga nanguhaneyo mumavoko ami,*+ mwomwo nafu jino mumuheto hakwingila munganda yikwechi vikolo natupachiso.”
8 Shikaho Saulu asanyikile vatu vosena vayenga kuKeila nakulwa jita mangana vahake Ndavichi navatu jenyi muchingombela.
9 Omu Ndavichi evwile ngwavo Saulu ali nakusaka kwiza amujihe, ambile kuli kapilishitu Aviyatale ngwenyi: “Ngunehele lipunu.”+
10 Jino Ndavichi ambile kuli Kalunga ngwenyi: “Ove Yehova Kalunga kaIsalele, ami ngamba yove ngunevu ngwavo Saulu ali nakusaka kwiza kuno mangana anongese nganda yaKeila mwomwo yayami.+
11 Uno vatwamina* vamuKeila navanguhana mumavoko aSaulu tahi? Kutala Saulu ali nakwiza nganomu ngunevu ami ngamba yove tahi? Ove Yehova Kalunga kaIsalele, ngulweze ami ngamba yove.” Kaha Yehova amukumbulwile ngwenyi: “Ali nakwiza.”
12 Jino Ndavichi ehwile ngwenyi: “Uno vatwamina vamuKeila navanguhana ami navatu jami mumavoko aSaulu tahi?” Kaha Yehova amukumbulwile ngwenyi: “Eyo, navakuhana mumavoko enyi.”
13 Hahaze vene, Ndavichi navatu jenyi kafwe 600+ vafumine muKeila, kaha vakimbwojokelenga nakuya kweshokwo vasakile. Omu Saulu evwile ngwavo Ndavichi nachinyi muKeila, kamukavileko.
14 Ndavichi atwaminenga mupambo kuvihela vyavikalu kuheta, kungalila yajipili yamupambo yaJifwe.+ Saulu amutondeletondelenga lika,+ oloze Yehova kamuhanyineyo mulivoko lyenyiko.
15 Omu Ndavichi apwile kuHoleshe mupambo yaJifwe, atachikijile ngwenyi* Saulu apwile nakumutondatonda amujihe.
16 Jino Yonatane mwanaSaulu ayile kuHoleshe kuli Ndavichi, kaha amukolezezele* mangana afwelele lika muli Yehova.+
17 Yonatane amwambile ngwenyi: “Kanda nawivwa womako, mwomwo tata Saulu keshi kukuwanako. Naupwa umwangana wavaIsalele,+ kaha ami nangupwa ngumuhato wove. Chuma kana natata Saulu nachitachikiza.”+
18 Kufumaho, vosena vavali valikashile chivwasano+ kumeso aYehova. Ndavichi asalile muHoleshe, kaha Yonatane akindulukile kwimbo lyenyi.
19 Jino vatu vamuJifwe vayile kuNgiveya+ kuli Saulu, vamulwezele ngwavo: “Ndavichi naswame kwakamwihi nayetu+ kuvihela vyavikalu kuheta. Naswame kuHoleshe+ hapili yaHakila+ yize yapwila kusulo* yaYeshimone.*+
20 Ove mwangana, heshoho nausakila kwiza, unahase kwiza tuhu, natumuhana mumavoko ayove mwangana.”+
21 Kaha Saulu ambile kuli vakiko ngwenyi: “Yehova amikisule mwomwo munangwivwila keke.
22 Enu yenunga mukawane hachihela naswame nakutachikiza mutu amumonanga, mwomwo vanangulweze ngwavo navanguluka chikuma.
23 Kawanenu vihela vyosena ali nakuswamanga, kaha kakindulukenu kuli ami naunjiho. Ngocho nangukaya hamwe nayenu. Kachi nge ali mulifuchi kana, kaha nangukamutondatonda hamakombakaji* avaYuta osena.”
24 Kufumaho vaze vatu valivangile kuya kuJifwe,+ kaha Saulu asalile. Halwola kana, Ndavichi navatu jenyi vapwile mupambo yaMayone+ kuAlava,+ kusulo yaYeshimone.
25 Kutwala muze Saulu navatu jenyi vejile nakutondatonda Ndavichi.+ Kahomu Ndavichi vamulwezele mujimbu kana, ashikumukile kulilolwa,+ atwamine muze mupambo yaMayone. Omu Saulu evwile mujimbu kana, ahangasanyine Ndavichi mupambo yaMayone.
26 Jino Saulu ahetele kupili, kaha apwile kusali yimwe yapili, Ndavichi nawa navatu jenyi vapwile kusali yikwavo yapili. Ndavichi apwile nakuchina+ Saulu, oloze Saulu navatu jenyi vapandamine hakamwihi mangana vakwate Ndavichi navatu jenyi.+
27 Oloze kwejile muluwa umwe uze alwezele Saulu ngwenyi: “Kinduluka washiwashi mwomwo vaFwilishite vanalukuka lifuchi.”
28 Ngocho Saulu alitwaminyine kuhangasana Ndavichi,+ akindulukile mangana akalwe jita navaFwilishite. Shikaho vavulukila echi chihela ngwavo Lilolwa Lyakulihandunwina.
29 Jino Ndavichi afumine kuze, ayile nakutwama kuEne-ngechi,+ kuvihela vyavikalu kuheta.
Kwinyikila Chamwishi
^ Hepe., “nangulanjisayo mumavoko ami.”
^ Chipwe pamo, “venyalifuchi.”
^ Chipwe pamo, “evwile woma mwomwo.”
^ Hepe., “akolezezele livoko lyenyi.”
^ Hepe., “kulivoko lyachilyo.”
^ Chipwe pamo, “yalikundu; yapambo.”
^ Chipwe “havisaka.”
