Samwele 1 24:1-22
24 Omu Saulu afumine kuze ayile nakuhangasana vaFwilishite, vamulwezele ngwavo: “Tala! Ndavichi ali mupambo yaEne-ngechi.”+
2 Ngocho Saulu akatukile namalunga 3,000 vaze asakwile hali vaIsalele, vayile nakutondatonda Ndavichi navatu jenyi kuvihela vyakulunduka vyamalolwa kuze kwapwilenga vapembe vakujipili.
3 Saulu ahetele kumemba amikoko amalolwa aze apwile kujila. Kuchihela kana kwapwile wina wakusendeveka. Ngocho Saulu engilile muwina kana mangana alihehwe.* Jino Ndavichi navatu jenyi vatwamine kusongosongo yauze wina.+
4 Kaha vambile kuli Ndavichi ngwavo: “Lino hilikumbi nakulweze Yehova ngwenyi, ‘Tala! Ngunakuhane muka-kole wove mulivoko lyove,+ kaha mulinge mweshomwo unasake kumulinga.’” Shikaho Ndavichi akatukile, alivembele nakuya nakuteta kundeleji yaSaulu yakuzeneka mavoko.
5 Oloze kutwala muze, muchima* wenyi waputukile kumuyanjisa+ mwomwo yakuteta kundeleji yaSaulu.
6 Ngocho Ndavichi ambile kuli vatu jenyi ngwenyi: “Kacheshi chakutamo kumeso aYehova ami kulinga chuma kanechi kuli mwata wami, ou vawavisa kuli Yehovako. Kangwatela kwolola livoko lyami nakumulemekako, mwomwo vamuwavisa kuli Yehova.”+
7 Shikaho Ndavichi akanyishile* vatu jenyi namazu awa, kaha kavetavishile vanyemukile Sauluko. Jino Saulu alovokele muze muwina, atwalilileho naungeji wenyi.
8 Ndavichi naikiye nawa alovokele muze muwina wakusendeveka, atambakanyine Saulu ngwenyi: “Ove mwata wami mwangana!”+ Omu Saulu atalile kunyima, Ndavichi afukamine chameso hamavu nakulifukula.
9 Kufumaho Ndavichi ambile kuli Saulu ngwenyi: “Mwomwo ika uli nakwivwilila vatu vaze vali nakwamba ngwavo, ‘Ndavichi najinyi kukulemeka’?+
10 Likumbi lyalelo unalimwena nameso ove kapu omu Yehova akuhananga mumavoko ami muwina wakusendeveka. Mutu umwe angulwezanga ngwenyi ngukujihe,+ oloze ami ngwakwivwilanga keke nakwamba ngwami, ‘Kangwatela kwolola livoko lyami nakulemeka mwata wamiko, mwomwo vamuwavisa kuli Yehova.’+
11 Ove tata, tala kalihina kakundeleji yove yakuzeneka mavoko aka ngunakwate mulivoko lyami. Kachi nge ngwasakanga ngwami ngukujihe, kachi ngwakujihanga omu ngwatetanga aka kalihina kundeleji yove, oloze kangwakujihileko. Unalimwena jino nameso ove nakutachikiza ngwove ami kangwajinyine kukulemeka chipwe kulikanga kuli oveko. Kaha nawa kangwalingile shili kuli oveko+ numba tuhu uli nakunguzomba mangana ungujihe.+
12 Yehova atuyule mangana amone ou nahengesa.+ Yehova akuzangamise mangana angulingile sambanjinga,+ oloze ami kangweshi kukujihako.+
13 Chishimo chakushikulu chamba ngwacho, ‘Vaka-kuhuka vakiko veji kulinganga vilinga vyakuhuka,’ oloze ami kangweshi kukujihako.
14 Ove mwangana wavaIsalele, unakatukila iya? Uno uli nakuhangasana iya? Uli nakuhangasana kawa wakufwa lyehi. Uli nakuhangasana mbwangala.+
15 Yehova apwenga muka-kutuyula. Mwatuyula mangana amone ou nahengesa. Mwatala hachihande chetu, kaha mwanguhakwila.+ Mwanguyulilako nakungupululula mulivoko lyove.”
16 Omu Ndavichi akumishile kuhanjika mazu awa kuli Saulu, Saulu ambile ngwenyi: “Ove mwanami Ndavichi, uno lizu lyove vene nguli nakwivwa tahi?”+ Ngocho Saulu aputukile kulila nalizu lyakukanguka.
17 Ambile kuli Ndavichi ngwenyi: “Ove uwakwoloka kuhambakana ami, mwomwo unangulingi mwamwaza, oloze ami ngunakulingi mwamupi.+
18 Likumbi lyalelo unasolola hatoma vyuma vyamwaza unalingi hakuzeneka kungujiha, numba tuhu Yehova anguhananga mulivoko lyove.+
19 Mutu mukaze mwawana muka-kole wenyi, kaha himwamwecha ayenga chakuzeneka kumulemeka? Yehova mwakufweta vyuma vyamwaza+ havyuma unalingi kuli ami likumbi lyalelo.
20 Shikaho, tala! Ngunatachikiza ngwami ove naupwa umwangana chikupu,+ kaha nawa wangana waIsalele naupwanga lika wove.
21 Shikaho lishinge Yehova+ kumeso ami ngwove kaweshi kukanongesa vaka-tanga* yami, chipwe kujimbangana lijina lyami muli vaze vakuzuvo yatatako.”+
22 Ngocho Ndavichi alishingile kumeso aSaulu. Kufumaho Saulu ayile kwimbo lyenyi.+ Oloze Ndavichi navatu jenyi vayile kuchihela chachikalu kuheta.+
Kwinyikila Chamwishi
^ Hepe., “mangana alifwike kumahinji enyi.”
^ Chipwe “chivezu.”
^ Chipwe pamo, “asanjile.”
^ Hepe., “mbuto.”
