Samwele 1 25:1-44
25 Kutwala muze, Samwele+ afwile. Ngocho vaIsalele vosena valikungulwile nakumulila, kaha vamufunjile muLama+ hembo lyenyi. Kufumaho Ndavichi akatukile nakuya mupambo yaPalane.
2 Jino muMayone+ mwapwile lunga umwe uze azachililenga kuKalamele.*+ Lunga kana apwile naluheto lwaluvulu chikuma. Ahetele mikoko 3,000, navapembe 1,000. Halwola kanelu, apwilenga nakuteula mikoko jenyi kuKalamele.
3 Ou lunga lijina lyenyi apwile ikiye Navale,+ kaha pwevo lyenyi apwile ikiye Avingayile.+ Pwevo kana apwile wakuzangama, wamwaza, oloze lunga lyenyi apwile wakutenuka, wavilinga vyavipi.+ Ou lunga apwile wakutanga yaKaleve.+
4 Omu Ndavichi apwile mupambo, evwile ngwavo Navale ali nakuteula mikoko jenyi.
5 Ngocho Ndavichi atumine vakweze 10 kuli Navale. Avambile ngwenyi: “Yenunga kuKalamele. Kahomu namuheta kuli Navale, mukangwihwilayo chihindu.
6 Mukamulweza ngwenu, ‘Ove navaka-tanga yove muyoyenga myaka yayivulu nakutwama kanawa.* Vyuma vyove vyosena nawa vipwenga kanawa.
7 Jino ngunevu ngwavo uli nakuteula mikoko jove. Omu tufunga twove vapwile hamwe nayetu kuno, katwavalemekeleko,+ kaha nawa kavajimbalishile chuma chavo numba chimweko hamakumbi osena aze vapwilenga muKalamele.
8 Hulisa vakweze jove, kaha navakulweza mujimbu kana. Shikaho ivwila vakweze jami uselewa, mwomwo vanejila halwola lwamwaza.* Ami mwanove Ndavichi navangamba jove ovo ngunatumu, tuhane vyeshovyo nausaka kutuhana.’”+
9 Ngocho vaze vakweze jaNdavichi vayile, vakambulilile Navale vyuma vyosena avalwezele Ndavichi. Omu vakumishile kwambulula mujimbu,
10 Navale ambile kuli vaze vangamba jaNdavichi ngwenyi: “Ndavichi ikiye iya? Kaha nawa mwanaYese ikiye iya? Makumbi ano vangamba vavavulu vali nakuchina kuli vakaka javo.+
11 Kutala chinapu chakutamo ami kumbata mbolo yami, nameya ami, nanyama yami ngunajihila vaka-kuteula, nguvihane kuvatu ngunazeneka kutachikiza nokwo vanafumu nyi?”
12 Ngocho vaze vakweze jaNdavichi vakindulukile, kaha vahichililemo Ndavichi vyuma vyosena ahanjikile Navale.
13 Hahaze vene, Ndavichi ambile kuli vatu jenyi ngwenyi: “Liswelelenu jipoko jamikwale muvosena.”+ Shikaho vatu vosena valiswelelele jipoko jamikwale, naNdavichi nawa aliswelelele poko yenyi yamukwale. Vatu kafwe 400 vayile hamwe naNdavichi, kaha vatu veka 200 vasalile nakulama viteli.
14 Jino ngamba umwe alwezele Avingayile, pwevo lyaNavale ngwenyi: “Tala! Ndavichi atumanga valuwa kufuma mupambo kwiza nakumeneka mwata wetu, oloze ikiye avatukananga.+
15 Vatu kana vatwamine kanawa nayetu. Kavatulemekeleko, kaha nawa katwajimbalishile chuma numba chimweko hamakumbi osena aze twapwile navo muchipapa.+
16 Vapwile kwijiva nge hikembwe yakutukinga ufuku namusana hamakumbi osena aze twapwile navo nakufunga vimuna.
17 Shikaho wana mwakulingila, mwomwo mwata wetu navaze vakuzuvo yenyi vosena vanavafunyina kuvalinga mwamupi.+ Kaha nawa mwata wetu apwa mutu wamokomoko+ uze kaveshi kulweza vyakulingako.”
18 Hahaze vene, Avingayile+ ambachile jimbolo 200, najituku jajinene javinyo jivali, namikoko vatanu vakujiha lyehi, namanona akwocha akuheta mujishiya* jitanu, navindanda 100 vyamihako yamivinyo yaumu, navindanda vyeka 200 vyajikuyu, kaha avihakile havimbulu.+
19 Ambile kuli vangamba jenyi ngwenyi: “Livangenu, ami nangumikava munyima.” Oloze lunga lyenyi Navale kamulwezeleko.
20 Omu apwile nakujinguluka kupili oku ali hachimbulu chenyi, amwene Ndavichi navatu jenyi vali nakwiza kulutwe lwenyi, kaha alihumanganyine navo.
21 Jino Ndavichi alyambilenga ngwenyi: “Ngwalishinyine tuhu kulama vyuma vyayou mutu mupambo. Kuvyuma vyenyi kakwajimbalile chuma numba chimweko,+ oloze ikiye ali nakungushishishilamo upi havyuma vyamwaza ngwamulingilile.+
22 Kachi nge nangusezaho lunga umwe* havatu jenyi palanga nomu nakucha, kaha Kalunga azangamise vaka-kole jaNdavichi.”
23 Omu Avingayile amwene Ndavichi, asulukile washiwashi hachimbulu chenyi, kaha afukamine chameso hamavu kumeso aNdavichi, alifukwile.
24 Alimbilile kumahinji aNdavichi nakwamba ngwenyi: “Ove mwata wami, mulonga wosena upwenga hali ami. Ngwitavile ami ngamba yove wapwevo nguhanjike nayove, kaha ivwilila vyuma nanguhanjika ami ngamba yove.
25 Ove mwata wami, kanda nauhaka muchima kuli ou mutu wamokomoko Navaleko,+ mwomwo apwa nge omu lyalumbunukila lijina lyenyi. Lijina lyenyi ikiye Navale,* kaha apwa chileya wamokomoko. Ove mwata wami, vakweze jove watumanga, ami ngamba yove kangwavamonangako.
26 Shikaho ove mwata wami, omu ayoya Yehova tu, nomu wayoya ove* tu, Yehova ikiye nakukingi+ kumulonga wamanyinga+ nakukulingisa uzeneke kulinga sambanjinga nalivoko lyove. Vaka-kole jove navaze vali nakusaka kukulemeka ove mwata wami vapwenga nge Navale.
27 Ove mwata wami, tambula ou wana*+ ngunakunehela ami ngamba yove, uuhane vakweze jove ava uli navo ove mwata wami.+
28 Konekela kuhenga chayami ngamba yove mwomwo Yehova mwakutungila ove mwata wami zuvo yize nayililanga,+ hakuwana nge ove mwata wami uli nakulwa jijita jaYehova,+ kaha nawa kawalingile upi mukuyoya chove chosenako.+
29 Kachi nge mutu umwe mwakukatukila mangana akuhangasane nakufwila kukujiha, Yehova Kalunga kove mwakukinga nganomu mutu eji kukinganga vyuma vyenyi vyavilemu hakuvihaka mungonga. Vaka-kole jove mwavasa nge malolwa amuchikapa chakwashisa.
30 Kahomu Yehova mwakakulingila vyuma vyamwaza vyosena nakushiki ove mwata wami, nomu mwakakutongola kupwa utwamina wavaIsalele,+
31 kaweshi kukevwa kukola kumuchima chipwe kuliveya* ngwove wamwangile manyinga avatu vakuzeneka mulonga nakulinga sambanjinga nalivoko lyove ove mwata wamiko.+ Shikaho ukangwanuka ami ngamba yove omu Yehova mwakakulingila vyuma vyamwaza ove mwata wami.”
32 Ngocho Ndavichi ambile kuli Avingayile ngwenyi: “Vamwalisenga Yehova Kalunga kaIsalele ou nakutumu likumbi lyalelo wizenga nakulihumangana nayami.
33 Vakukisulenga hamangana ove. Vakukisulenga hakungukinga kumulonga wamanyinga+ likumbi lyalelo, nahakungulingisa nguzeneke kulinga sambanjinga nalivoko lyami.
34 Omu ayoya Yehova Kalunga kaIsalele tu, ou nangukanyisa kulinga chuma chachipi kuli ove,+ kachi nge kawezanga washi nakulihumangana nayamiko,+ kachi kangwasezeleho lunga umwe* havatu jaNavale omu nakuchako.”+
35 Ngocho Ndavichi atambwile vyuma vize amunehelelele Avingayile, kaha amwambile ngwenyi: “Yakonga kuzuvo yove mukuunda. Ngunevwilila mulizu lyove, kaha nangulinga kweseka nomu unangulombo.”
36 Kufumaho, Avingayile ayile kuli lunga lyenyi Navale. Amuwanyine ali nakulya nakunwa muzuvo yenyi kwijiva nge himwangana. Navale* awahililile chikuma, kaha nawa apendele nyi kuya muze. Avingayile kamulwezele chuma numba chimweko palanga nomu kwachele.
37 Jino kuheta nachimene omu Navale apwile jino mumeso achanga, pwevo lyenyi amuhichililemo vyuma vyosena. Ngocho muchima wenyi wapwile kwijiva nge muchima wamutu wakufwa, kaha asavalile muze kuswanga nge lilolwa.
38 Omu mwahichile makumbi kafwe 10, Yehova avetele Navale, kaha afwile.
39 Omu Ndavichi evwile ngwavo Navale nafu, ambile ngwenyi: “Vamwalisenga Yehova, ou nanguhakwila hamulonga+ wakungusaula kuli Navale,+ ou nawa nakingi ami ngamba yenyi nguzeneke kulinga chuma chachipi.+ Yehova nalingisa upi waNavale upwenga hali ivene.” Ngocho Ndavichi atumine mazu kuli Avingayile mangana amumbate apwenga pwevo lyenyi.
40 Kahomu vangamba jaNdavichi vahetele kuKalamele kuli Avingayile, vamulwezele ngwavo: “Ndavichi natutumu ngwenyi akumbate.”
41 Hahaze vene Avingayile akatukile, afukamine chameso hamavu nakulifukula. Ambile ngwenyi: “Ami ngamba yenyi ngunetavila kuya ngukasanyisenga vangamba jaikiye mwata wami kumahinji.”+
42 Kufumaho, Avingayile+ akatukile washiwashi, anyinyine hachimbulu chenyi, kaha vangamba jenyi vamapwevo vatanu vamukavangijilenga munyima. Ayile navaze valuwa jaNdavichi, kaha apwile jino pwevo lyaNdavichi.
43 Ndavichi ambachile nawa Ahinowame+ wakuYezelele.+ Ngocho apwile namapwevo vavali.+
44 Jino Saulu ahangishile mwanenyi Mikale+ pwevo lyaNdavichi kuli Palachi+ mwanaLaishe wakuNgalime.
Kwinyikila Chamwishi
^ Nganda yamuYuta. Keshi Pili yaKalameleko.
^ Chipwe “nakutwama mukuunda.”
^ Hepe., “halikumbi lyamwaza.”
^ Shiya yimwe yapwile jilita 7.33. Tala Chihande B14.
^ Hepe., “weshowo eji kusushilanga hambango.” Eyi hihanjikiso yachiHepeleu yakasautu hakuvuluka malunga.
^ Ulumbunwiso, “Wakuhona Mangana; Chileya.”
^ Chipwe “wayoya mwono wove.”
^ Hepe., “eyi kisu.”
^ Hepe., “kaweshi kukapelyangila chipwe kuhukana.”
^ Hepe., “weshowo eji kusushilanga hambango.” Eyi hihanjikiso yachiHepeleu yakasautu hakuvuluka malunga.
^ Hepe., “Muchima waNavale.”
