Samwele 1 26:1-25
26 Kutwala muze, vatu vamuJifwe+ vayile kuNgiveya+ kuli Saulu, vamulwezele ngwavo: “Ndavichi naswame hapili yaHakila yize yalitalasana naYeshimone.”*+
2 Shikaho Saulu akatukile, ayile mupambo yaJifwe namalunga 3,000 vaze asakwile hali vaIsalele mangana akatondetonde Ndavichi muze mupambo.+
3 Saulu atungile chilombo chenyi kujila hapili yaHakila yize yalitalasanyine naYeshimone. Halwola kana, Ndavichi apwile nakutwama mupambo, kaha evwile ngwavo Saulu namukave muze mupambo.
4 Ngocho Ndavichi atumine vandoji vakamone numba nge Saulu neza chikupu.
5 Kufumaho, Ndavichi ayile kuchihela kuze Saulu atungilile chilombo. Kaha amwene kuze asavalile Saulu naAvanele+ mwanaNele uze apwile kapitau kamaswalale jaSaulu. Saulu asavalile muchilombo oku maswalale jenyi vanamujingilika.
6 Jino Ndavichi ehwile Ahimeleke kaHete+ naAvishai+ mwanaZeluwiya,+ ndumbwaYowave ngwenyi: “Iya mwaya nayami kuchilombo ali Saulu?” Kaha Avishai akumbulwile ngwenyi: “Yami nanguya nove.”
7 Ngocho Ndavichi naAvishai vayile naufuku muze muchilombo chamaswalale. Vawanyine Saulu nasavala oku najiki likunga lyenyi hamavu kumitwe yenyi. Avanele namaswalale vasavalile kuli ikiye jingulwishi ndo.
8 Avishai ambile kuli Ndavichi ngwenyi: “Likumbi lyalelo Kalunga nakuhane muka-kole wove mulivoko lyove.+ Mana ngumutuve likunga kamwe kaha mangana limutuvasane nakwingila mumavu. Kangweshi kumutuva kavaliko.”
9 Oloze Ndavichi ambile kuli Avishai ngwenyi: “Kanda naumulemekako. Iyaze nahase kwolola livoko lyenyi nakulemeka ou vawavisa kuli Yehova,+ kaha himwazeneka kupwa namulonga?”+
10 Ndavichi ambile cheka ngwenyi: “Omu ayoya Yehova tu, Yehova ivene ikiye mwakamujiha.+ Nge chiku, kaha likumbi limwe mwakafwa ngana mwavatu vosena.+ Nge chiku nawa, kaha mwakanongela kujita.+
11 Kacheshi chakutamo kumeso aYehova ami kwolola livoko lyami nakulemeka ou vawavisa kuli Yehovako.+ Oloze mbata likunga eli lili kumitwe yenyi namulondo wameya tuyenga.”
12 Ngocho Ndavichi ambachile lize likunga namulondo wameya vize vyapwile kumitwe yaSaulu, kaha vayile. Naumwe wauchi avamwene,+ chipwe kutachikiza chuma valingileko, mwomwo vosena vapwile mutulo. Naumwe nawa wauchi ahindukile mwomwo Yehova avasavalikile tulo twatuvulu.
13 Kaha Ndavichi ayile kumutamba ukwavo wapambo, emanyine helu lyapili. Pili kana yapwilile hahasuku nachilombo chaSaulu.
14 Jino Ndavichi atambakanyine vaze maswalale naAvanele+ mwanaNele ngwenyi: “Ove Avanele, uli nakungwivwa nyi?” Kaha Avanele amukumbulwile ngwenyi: “Yoveya uli nakutambakana kuno kuli mwangana?”
15 Ndavichi ambile kuli Avanele ngwenyi: “Ove ngwetu ulunga? Iya muIsalele apwa nge yove? Kaha ikaze wahonenanga kutona mangana ulame mwata wove mwangana? Kwezanga liswalale umwe uze ambanga kujiha mwata wove mwangana.+
16 Vyuma unalingi kavyawahileko. Omu ayoya Yehova tu, watela kufwa, mwomwo kawatonanga mangana ulame mwata wove ou vawavisa kuli Yehovako.+ Achitaletale kwosena umone. Nyi likunga lyamwangana namulondo+ wenyi wameya vize vyapwanga kumitwe yenyi vili kulihi?”
17 Ngocho Saulu evwile lizu lyaNdavichi, kaha ambile ngwenyi: “Ove mwanami Ndavichi,+ uno lizu lyove vene nguli nakwivwa tahi?” Ndavichi amukumbulwile ngwenyi: “E mwane ove mwata wami mwangana.”
18 Ndavichi ambile cheka ngwenyi: “Ikaze ove mwata wami uli nakunguhangasanyina ami ngamba yove?+ Ngunalingi ika? Uno mulonga muka ngunavulumuna?+
19 Ove mwata wami mwangana, ivwilila vyuma nanguhanjika ami ngamba yove: Kachi nge Yehova ikiye nakutumu ungulukuke, kaha etavile* wana wami wamanona. Oloze kachi nge vatu vakiko vanakutumu,+ kaha vapwenga vakwangula kumeso aYehova mwomwo vananguhange likumbi lyalelo mangana nguzeneke kupwa hamwe nauswana waYehova.+ Chinapu nge vanangwambe ngwavo, ‘Yako ukazachile tulunga veka.’
20 Shikaho kanda naumwangila manyinga ami hamavu ali kwakusuku nakumeso aYehovako. Ove mwangana wavaIsalele, uli nakutondatonda mbwangala,+ kaha nawa chinafwane nge uli nakuhangasana ngwali hajipili.”
21 Kaha Saulu ambile ngwenyi: “Ngunalingi shili.+ Ove mwanami Ndavichi, kinduluka. Kangweshi kukajina cheka kukulemekako, mwomwo unamono kuyoya* chami kupwa chachilemu+ likumbi lyalelo. Ngunalingi vyuma vyauleya, ngunaluwisa chikuma.”
22 Jino Ndavichi ambile ngwenyi: “Ove mwangana, tala likunga lyove eli. Tuma mukweze umwe ezenga nakulimbata.
23 Yehova ikiye mwashishishilamo mutu himutu hakwoloka+ chenyi nahakushishika chenyi. Likumbi lyalelo Yehova akuhananga mulivoko lyami, oloze kangwasakanga kwolola livoko lyami nakukulemeka ove vawavisa kuli Yehovako.+
24 Yehova amone kuyoya* chami kupwa chachilemu nganomu ami ngwamonanga kuyoya* chove kupwa chachilemu likumbi lyalelo. Angupululule muvihuli vyami vyosena.”+
25 Jino Saulu ambile kuli Ndavichi ngwenyi: “Ove mwanami Ndavichi, vakukisulenga. Naulinganga vyuma vyavinene, kaha naufukilanga chikuma.”+ Kufumaho, Ndavichi aliyililile kwenyi, kaha Saulu akindulukile kwimbo lyenyi.+
Kwinyikila Chamwishi
^ Chipwe pamo, “nalikundu; napambo.”
^ Hepe., “ahumbike.”
^ Chipwe “mwono.”
^ Chipwe “mwono.”
^ Chipwe “mwono.”
