Samwele 1 27:1-12
-
VaFwilishite navahana Ndavichi Jikilange (1-12)
27 Jino Ndavichi alyambile mumuchima wenyi ngwenyi: “Likumbi limwe Saulu mwakangujiha. Nachiwaha ami kuchinyina+ kulifuchi lyavaFwilishite, kaha Saulu mwazeya kungutondatonda mungalila yavaIsalele yosena.+ Ngocho nangupuluka mulivoko lyenyi.”
2 Shikaho Ndavichi akatukile namalunga 600+ vaze apwile navo, vayile kuli Akishe+ mwanaMayoke, mwangana waNgata.
3 Ndavichi navatu jenyi vatwaminenga muNgata kuli Akishe. Mutu himutu atwaminenga navaze vakuzuvo yenyi. Ndavichi atwaminenga namapwevo jenyi vavali, Ahinowame+ wakuYezelele, naAvingayile+ wakuKalamele, uze apwile pwevo lyambozo Navale.
4 Omu Saulu evwile ngwavo Ndavichi nachinyina kuNgata, alitwaminyine kumutondatonda.+
5 Jino Ndavichi ambile kuli Akishe ngwenyi: “Kachi nge unangwivwila uselewa, kaha nguhane chihela chimwe chamunganda yeka yamulifuchi lyove mangana ngutwamengamo. Ikaze ami ngamba yove nangutwamina munganda yoyimwe nayove mwangana?”
6 Ngocho Akishe ahanyine Ndavichi nganda yaJikilange+ halikumbi vene lize. Shikaho nganda yaJikilange yapwila yavamyangana javaYuta palanga nakulelo lino.
7 Ndavichi atwamine mulifuchi lyavaFwilishite mwaka umwe natukweji vawana.+
8 Halwola kanelu, Ndavichi ayilenga navatu jenyi nakulukuka vaNgeshule,+ navaNgiliji, navaAmaleke.+ Vatu kana vatwaminenga mungalila yize yaputukilile kuTelame nakutwala kuShule+ swi nakulifuchi lyaEjipitu.
9 Omu Ndavichi alukukilenga ngalila, ajihilenga malunga namapwevo vosena.+ Oloze ambachilenga mikoko, navangombe, navimbulu, navangamela, nauvwalo, kaha akindulukilenga kuli Akishe.
10 Jino Akishe amuhulishilenga ngwenyi: “Lelo wayanga nakulukuka veya?” Ndavichi amukumbulwilenga ngwenyi: “Ngwayanga nakulukuka ngalila yakusulo* yavaYuta,”+ chipwe ngwenyi, “Ngwayanga nakulukuka ngalila yakusulo yavaYelamele,”+ chipwe ngwenyi, “Ngwayanga nakulukuka ngalila yakusulo yavaKene.”+
11 Ndavichi katetelelenga lunga chipwe pwevo nakwiza nenyi kuNgatako, mwomwo alyambile ngwenyi: “Kuchina navakatwambulula ngwavo, ‘Evi vikiko ali nakulinga Ndavichi.’” (Omu mukiko alingilenga hamakumbi osena aze atwaminenga mulifuchi lyavaFwilishite.)
12 Ngocho Akishe afwelelele chikuma Ndavichi, kaha alyambile mumuchima wenyi ngwenyi: “Ndavichi vanamuhungu kuli vatu jenyi vaIsalele. Ngocho mwapwanga lika ngamba yami.”
Kwinyikila Chamwishi
^ Chipwe “yaNengeve.”