Samwele 1 28:1-25
-
Saulu mwaya kuli muka-kutahisa vashipilitu kuEne-ndole (1-25)
28 Hamakumbi aze, vaFwilishite vakungulwile maswalale javo mangana valwenga jita navaIsalele.+ Ngocho Akishe ambile kuli Ndavichi ngwenyi: “Ngunafwelela unatachikiza ngwove ove navatu jove namuya nayami kujita.”+
2 Ndavichi ambile kuli Akishe ngwenyi: “Ove unatachikiza vyuma nangulinga ami ngamba yove.” Kaha Akishe ambile kuli Ndavichi ngwenyi: “Shikaho nangukutongola upwenga umuka-kungulama lwola lwosena.”*+
3 Halwola kanelu, Samwele apwile hanafu lyehi, vaIsalele vosena vamulilile nakumufunda munganda yenyi muLama.+ Saulu nawa apwile hanahange lyehi vaka-kutahisa vashipilitu navaka-kulweza vyuma vyakulutwe mulifuchi.+
4 Jino vaFwilishite valikungulwile, vayile nakutunga chilombo chavo kuShuneme.+ Saulu naikiye akungulwile vaIsalele vosena, kaha vatungile chilombo chavo kuNgilivowa.+
5 Omu Saulu amwene chilombo chavaFwilishite, alizuzukilile chikuma nawoma.+
6 Numba tuhu Saulu ehwilenga Yehova,+ oloze Yehova kamukumbulwilengako, numba vene kuhichila muvilota, chipwe muvapolofweto, chipwe kuzachisa Ulime.+
7 Ngocho Saulu ambile kuli vangamba jenyi ngwenyi: “Ngutondelenu pwevo umwe muka-kutahisa vashipilitu+ mangana nguyenga kuli ikiye ngukamwihule.” Kaha vangamba jenyi vamwambile ngwavo: “KuEne-ndole+ kwatwama pwevo umwe muka-kutahisa vashipilitu.”
8 Jino Saulu alyalumwine mweka hakuvwala uvwalo weka, kaha ayile naufuku kuli uze pwevo hamwe navatu jenyi vavali. Ambile kuli uze pwevo ngwenyi: “Taha navashipilitu jove vakutahisa+ mangana ungunehele mutu ou nangukulweza.”
9 Oloze uze pwevo amwambile ngwenyi: “Ove unatachikiza vyuma alingile Saulu. Ahangile vaka-kutahisa vashipilitu navaka-kulweza vyuma vyakulutwe mulifuchi.+ Shikaho, ikaze uli nakusakila kungutela muheto mangana ungujihise?”+
10 Ngocho Saulu alishingile Yehova kumeso enyi ngwenyi: “Omu ayoya Yehova tu, kaweshi kupwa namulonga hachuma kanechiko.”
11 Uze pwevo ambile ngwenyi: “Uli nakusaka ngukunehele iya?” Saulu amukumbulwile ngwenyi: “Ngunehele Samwele.”
12 Uze pwevo omu amwene “Samwele,”*+ atetele nalizu lyakukanguka. Kaha ambile kuli Saulu ngwenyi: “Unangulelevekela ika? Kumana yove Saulu!”
13 Mwangana ambile kuli uze pwevo ngwenyi: “Kanda nawivwa womako, uli nakumona ika?” Uze pwevo akumbulwile Saulu ngwenyi: “Nguli nakumona mutu umwe uze nafwane nge kalunga, uze ali nakuvumbuka mumavu.”
14 Hahaze vene Saulu ahulishile uze pwevo ngwenyi: “Ali nakusoloka ngachilihi?” Kaha uze pwevo ambile ngwenyi: “Ou lunga ali nakuvumbuka hikashinakaji, navwale ndeleji yakuzeneka mavoko.”+ Ngocho Saulu atachikijile ngwenyi ou lunga apwile “Samwele,” kaha afukamine chameso hamavu nakulifukula.
15 Jino “Samwele” ehwile Saulu ngwenyi: “Unangulowela ika nakungutangula?” Saulu amukumbulwile ngwenyi: “Nguli muukalu waunene. VaFwilishite vali nakunguzungisa, kaha Kalunga nanguseze. Keshi nakungukumbululako, numba vene kuhichila muli vapolofweto, chipwe muvilota.+ Shikaho ngunakusanyikila mangana ungulweze vyuma ngwatela kulinga.”+
16 “Samwele” ambile ngwenyi: “Ikaze naungwihwila ami omu Yehova nakuseze+ nakupwa jino muka-kole wove?
17 Yehova mwalinga vyuma ahanjikile kuhichila muli ami. Yehova mwakutambula wangana, kaha mwauhana kuli mukwenu weka. Mwauhana kuli Ndavichi.+
18 Yehova ali nakulinga vyuma kanevi kuli ove oholyapwa mwomwo kawononokele mulizu lyenyiko, kaha nawa kawanongesele vaAmaleke+ vaze vasangumwine utenu waYehovako.
19 Yehova mwahana vaIsalele hohamwe nayove mumavoko avaFwilishite.+ Hamene ove+ navana vove+ namukangukava. Kaha Yehova mwahana nawa maswalale javaIsalele mumavoko avaFwilishite.”+
20 Hahaze vene, Saulu alimbilile hamavu, kaha evwile woma chikuma hamazu ahanjikile “Samwele.” Evwile nawa muvifuhwa zukulu mwomwo kalile vyakulya likumbi lyosena naufuku wosenako.
21 Uze pwevo apandamine kuli Saulu, kahomu amwene ngwenyi nalizakamina chikuma, amwambile ngwenyi: “Ami ngamba yove ngunononoka mulizu lyove, kaha ngunahake mwono wami muponde+ hakulinga vyuma wangulwezanga.
22 Ngocho ivwilila vyuma nangukulweza ami ngamba yove. Mana ngukuhane kachihanda kambolo ulyenga mangana ukwate ngolo nakutambuka ukinduluke kwimbo lyove.”
23 Oloze ikiye akanyine, ambile ngwenyi: “Kangweshi kulyako.” Vangamba jenyi nauze pwevo vamushinjilile lika. Kutwala muze avevwililile, kaha akatukile haze hamavu asavalile nakutwama hakahela.
24 Jino uze pwevo apwile namwanangombe wakununa muzuvo yenyi. Amujihile washiwashi, kaha ambachile unga, auchikile nakwocha jimbolo jakuzeneka chimbalwila.
25 Ngocho ahanyine vyakulya Saulu navangamba jenyi, kaha valile. Kufumaho vakatukile nakuya ufuku vene uze.+
Kwinyikila Chamwishi
^ Hepe., “umuka-kulama mutwe wami makumbi osena.”
^ Chipwe “amwene mutu uze asolokele nge Samwele.”
