Samwele 1 3:1-21
-
Samwele navamusanyika apwenga kapolofweto (1-21)
3 Hashimbu yoseneyi, kanyike Samwele apwile nakuzachila+ Yehova kumeso aEli. Jino hamakumbi aze, Yehova kahanjikilenga navatu chikumako. Kakwapwilenga vyakumwenesa+ vyavivuluko.
2 Meso aEli apwile nakuya nakufuvalala, kaha kamwenenga kanawako. Likumbi limwe, Eli asavalile mukapete kenyi.+
3 Linongo lyaKalunga+ lyapwile kanda vachilijime. Kaha Samwele asavalile mutembele*+ yaYehova muze mwapwile Chikasha chaKalunga.
4 Jino Yehova asanyikile Samwele. Kaha Samwele akumbulwile ngwenyi: “Yami uno mwane.”
5 Ngocho alahile nakuya kuli Eli, ambile ngwenyi: “Nguneza, ngunevu unangusanyika.” Oloze Eli amwambile ngwenyi: “Ami kangwakusanyikileko. Yako ukasavale.” Ngocho ayile nakusavala.
6 Yehova amusanyikile cheka ngwenyi: “Ove Samwele!” Samwele ahindukile nakuya kuli Eli, ambile ngwenyi: “Nguneza, ngunevu unangusanyika.” Oloze Eli amwambile ngwenyi: “Ove mwanami, ami kangwakusanyikileko. Yako ukasavale cheka.”
7 (Halwola kana Samwele apwile kanda achitachikize kanawa Yehova, kaha nawa Yehova apwile kanda achiputuke kuhanjika nenyi.)+
8 Yehova amusanyikile cheka kamuchitatu ngwenyi: “Ove Samwele!” Ngocho Samwele ahindukile nakuya kuli Eli, ambile ngwenyi: “Nguneza, ngunevu unangusanyika.”
Eli amwene jino ngwenyi Yehova ikiye apwile nakusanyika ou kanyike.
9 Ngocho Eli ambile kuli Samwele ngwenyi: “Yako ukasavale. Kachi nge mwakusanyika cheka, kaha wambenga ngwove, ‘Ove Yehova, hanjika, ami ngamba yove nguli nakwivwilila.’” Kufumaho Samwele ayile nakusavala kuze asavalilenga.
10 Jino Yehova ejile nakwimana kuze, amusanyikile cheka ngwenyi: “Ove Samwele, ove Samwele!” Kaha Samwele ambile ngwenyi: “Hanjika, ami ngamba yove nguli nakwivwilila.”
11 Yehova ambile kuli Samwele ngwenyi: “Tala! Nangulinga chuma chimwe muIsalele. Weshowo mwevwa chuma kana mwalikomokela.*+
12 Halikumbi kana, nangukalinga kuli Eli vyuma vyosenevi ngunahanjika kutalisa kuli vaze vakuzuvo yenyi, kufumisa kumaputukilo nakutwala kumakumishilo.+
13 Ngocho umulweza ngwove nanguzangamisa vaze vakuzuvo yenyi haya myaka yosena mwomwo yashili yize natachikiza.+ Vana venyi vali nakwangula Kalunga,+ oloze ikiye kuvatenukila chiku.+
14 Shikaho ngunalishingila kuli vaze vakuzuvo yaEli ngwami shili yavo kaveshi kukayifwika navimuna vakuvatula chipwe namawana ekako.”+
15 Samwele asavalile palanga nomu kwachele. Kaha asokolwele vikolo vyazuvo yaYehova. Samwele evwile woma kulweza Eli vyuma vamumwenesele.
16 Eli asanyikile Samwele ngwenyi: “Ove mwanami Samwele!” Kaha amukumbulwile ngwenyi: “Yami uno mwane.”
17 Eli amwambile ngwenyi: “Mujimbu muka nakulweze? Kanda naunguswekelako. Kachi nge naunguswekela chuma numba chimwe, kaha Kalunga akuzangamise mwamunene.”
18 Ngocho Samwele amulwezele vyuma vyosena, kamuswekelele chuma numba chimweko. Kaha Eli ambile ngwenyi: “Mujimbu kana unafumu kuli Yehova. Alinge mweshomwo namono ngwenyi mwamwaza.”
19 Samwele apwile nakuya nakukola, kaha Yehova apwilenga naikiye.+ Vyuma vyosena ahanjikilenga vyateselemo.*
20 Ngocho vaIsalele vosena kufuma kuNdane nakuheta kuMbele-sheva vatachikijile ngwavo Samwele vanamutongola kupwa kapolofweto kaYehova.
21 Yehova alisolwelenga lika kuShilo omu Yehova alijimbwilenga kuli Samwele kuhichila mumazu aYehova.+
Kwinyikila Chamwishi
^ Ikiko tavanaku.
^ Hepe., “matwitwi enyi nawawemuna.”
^ Hepe., “kavyaholokele hamavuko.”
