Samwele 1 30:1-31
30 Omu Ndavichi navatu jenyi vahetele kuJikilange+ halikumbi lyamuchitatu, vawanyine vaAmaleke+ vanalukuka ngalila yakusulo* nanganda yaJikilange. Valukukile nganda yaJikilange nakuyocha.
2 Vakwachile mapwevo+ navatu vosena vaze vapwile munganda, vanyike navakulwane, nakuvatwala muufunge. Kavajihile mutu numba umweko, oloze vavambachile nakuya navo.
3 Omu Ndavichi navatu jenyi vahetele munganda, vawanyine nganda vanayocho, kaha mapwevo javo nawa navana vavo vamalunga navava vamapwevo vanavatwale muufunge.
4 Ngocho Ndavichi navatu jenyi valilile namazu akukanguka palanga nomu ngolo javakumine.
5 Mapwevo jaNdavichi vavali, Ahinowame wakuYezelele, naAvingayile uze apwile pwevo lyambozo Navale wakuKalamele,+ navakiko vavakwachile ufunge.
6 Ndavichi ahombele chikuma mwomwo vatu jenyi vambile ngwavo navamwasa malolwa. Vosena* vapihililile chikuma hakuwana vana vavo vamalunga navava vamapwevo vauchi. Oloze Ndavichi alikolezezele muli Yehova Kalunga kenyi.+
7 Jino Ndavichi ambile kuli kapilishitu Aviyatale+ mwanaAhimeleke ngwenyi: “Ngunehele lipunu.”+ Kaha Aviyatale anehele lipunu kuli Ndavichi.
8 Ndavichi ehwile Yehova+ ngwenyi: “Uno nguhangasane eli lizavu linatunyemukila nyi? Kutala nanguvawana tahi?” Ikiye amukumbulwile ngwenyi: “Vahangasane, nauvawana, kaha nawa naupululula vatu navyuma vyosena vanambate.”+
9 Hahaze vene, Ndavichi namalunga 600+ vaze apwile navo vayile, vakahetele kuMwanakalwiji* waMbesole, kaha malunga vamwe vasalile kuze.
10 Ndavichi namalunga 400 vahangasanyine lika vaAmaleke. Oloze malunga 200 vazeyele, kaha kavahashile kuzauka Mwanakalwiji waMbesoleko. Ngocho vasalile.+
11 Kufumaho vawanyine lunga umwe wakaEjipitu muchipapa, kaha vamutwalile kuli Ndavichi. Vamuhanyine vyakulya alyenga, nameya anwenga.
12 Vamuhanyine nawa chihanda chachindanda chajikuyu navindanda vivali vyamihako yamivinyo yaumu. Omu akumishile kulya, akwachile ngolo* mwomwo kalile vyakulya chipwe kunwa meya hamakumbi atatu, namusana naufukuko.
13 Jino Ndavichi amuhulishile ngwenyi: “Kaka yove iya, kaha wafuma kulihi?” Ikiye amukumbulwile ngwenyi: “Ami ngukaEjipitu, ngundungo yakaAmaleke umwe. Oloze kaka yami angusezanga zawalyakaze mwomwo ngwapwanga nakuviza.
14 Twalukukanga ngalila yakusulo* yavaKelete,+ nangalila yaYuta, nangalila yakusulo* yaKaleve.+ Kaha nawa twochanga nganda yaJikilange.”
15 Ndavichi amwihwile ngwenyi: “Kutala naungutwala kuli eli lizavu lyavaka-kunyemukila tahi?” Ikiye amukumbulwile ngwenyi: “Kachi nge naulishinga Kalunga kuli ami ngwove kaweshi kungujihako, ngwove kaweshi kunguhana mumavoko akaka yamiko, kaha nangukutwala kuli eli lizavu lyavaka-kunyemukila.”
16 Ngocho amutwalile kuze vapwile nakulya nakunwa nakulivwisa kuwaha havyuma vyavivulu vize vapupile mulifuchi lyavaFwilishite namulifuchi lyaYuta.
17 Jino Ndavichi avajihile kufuma kulungulungu lyakucha palanga nakuchingoloshi likumbi lyakavangijileho. Vatu vavavulu vafwile, oloze malunga 400+ vakiko kaha vachinyine havangamela.
18 Ndavichi atambwile vyuma vyosena vize vambachile vaAmaleke,+ kaha apululwile namapwevo jenyi vavali.
19 Kavajimbalishile chuma chimweko, numba chipwa chachindende chipwe chachinene. Vatambwile navana vavo vamalunga navava vamapwevo navyuma vyavo vapupile vaAmaleke.+ Ndavichi atambwile vyuma vyosenevi vambachile.
20 Atambwile mikoko navangombe javaAmaleke vosena, kaha vatu jenyi vavatetekezele kulutwe lwavimuna javo. Vambile ngwavo: “Evi hivyuma vyakupupa vyaNdavichi.”
21 Kaha Ndavichi ahetele kuMwanakalwiji waMbesole+ kuze kwasalile malunga 200 vaze vazeyele nakuhona kuya nenyi hamwe. Malunga kana vasesele Ndavichi navatu vaze apwile navo. Omu Ndavichi alihumanganyine navava malunga, avamenekele.
22 Jino malunga vamwe vavapi michima, vamokomoko vaze vayile hamwe naNdavichi vambile ngwavo: “Evi vyuma vyakupupa twayanga nakutambula katweshi kuvahanavyoko mwomwo kavayanga nayetuko. Navambata kaha mapwevo javo navana vavo nakuya.”
23 Oloze Ndavichi ambile ngwenyi: “Enu vandumbwami, kanda namulinga ngocho havyuma evi natuhane Yehovako. Atukinganga nakutuhana lizavu lyavatu vaze vatunyemukilanga.+
24 Iya mwetavila vyuma muli nakuhanjika? Chazano mwatambula mutu uze ayanga kujita nachiteseka hamwe nachazano mwatambula mutu uze asalanga nakulama viteli.+ Vosena navatambula vyazano vyakuteseka hamwe.”+
25 Ngocho mazu awa ahanjikile Ndavichi apwile jino hilushimbi namazu akuyula aze vakavangijilenga vatu muIsalele palanga nakulelo lino.
26 Omu Ndavichi akindulukile kuJikilange, atumine vyuma vimwe vyakupupa kuli vakulwane vamuYuta vaze vapwile masepa jenyi. Ambile ngwenyi: “Ou hiwana* ngunamihane wakufuma kuvyuma tunapupu kuli vaka-kole jaYehova.”
27 Wana kana autumine kuli vakulwane vakuMbetele,+ navava vakuLamote yakuNengeve,* navava vakuYachile,+
28 navava vakuAlowele, navava vakuShifwimote, navava vakuEshetemowa,+
29 navava vakuLakale, navava vamujinganda javaYelamele,+ navava vamujinganda javaKene,+
30 navava vakuHoloma,+ navava vakuMbolashane, navava vakuAtake,
31 navava vakuHevelone,+ navava vakuvihela vyosena kuze Ndavichi navatu jenyi vayilenga mapapa kakavulu.
Kwinyikila Chamwishi
^ Chipwe “yaNengeve.”
^ Chipwe “Myono yavatu vosena.”
^ Tala Mukana waMazu.
^ Hepe., “shipilitu yenyi yamukindulukilile.”
^ Chipwe “yaNengeve.”
^ Chipwe “yaNengeve.”
^ Hepe., “Eyi hikisu.”
^ Chipwe “yakusulo.”
