Samwele 1 31:1-13
-
Saulu navana venyi vatatu navafwa (1-13)
31 Jino vaFwilishite valwile jita navaIsalele,+ kaha vaIsalele vachinyine vaFwilishite. Vavavulu vafwililile haPili yaNgilivowa.+
2 VaFwilishite vatakilikile Saulu navana venyi. Ngocho vajihile vana venyi,+ Yonatane,+ naAvinatave, naMalaki-shuwa.
3 Jino jita yamutohwelele chikuma Saulu, kaha vaka-kwasa mata amanana vamuwanyine. Ngocho vamulemekele chikuma.+
4 Kaha Saulu ambile kuli muka-kumumbachila vitwa vyajita ngwenyi: “Somona poko yove yamukwale ungutuvasane kuchina ava vilima+ naveza nakungutuvasana nakunguyanjisa.” Oloze uze muka-kumumbachila vitwa vyajita akanyine mwomwo evwile woma chikuma. Ngocho Saulu ambachile poko yenyi yamukwale, kaha alimbukilileko.+
5 Omu muka-kumbata vitwa vyajita amwene Saulu nafu,+ naikiye alimbukilile kupoko yenyi yamukwale, kaha afwililile hamwe naSaulu.
6 Ngocho Saulu, navana venyi vatatu, namuka-kumumbachila vitwa vyajita, navatu jenyi vosena, vafwile halikumbi lyolimwe.+
7 Omu vaIsalele vaze vapwile muchinema* navaze vapwile mungalila yaYotau vamwene malunga vavaIsalele vanachinyi, kaha nawa Saulu navana venyi vanafu, vaputukile kulovoka mujinganda javo nakuchina.+ Ngocho vaFwilishite vejile nakutwama muze mujinganda.
8 Lichako, omu vaFwilishite vejile nakuzula vatu vaze vajihile, vawanyine Saulu navana venyi vatatu vanafwila haPili yaNgilivowa.+
9 Ngocho vatetele mutwe waSaulu nakumuzula vyuma vyajita. Kaha vatumine vatu mulifuchi lyavaFwilishite lyosena mangana vatanjise mujimbu+ kujizuvo* jatulunga twavo+ nakuli vatu.
10 Kufumaho, vahakile vize vyuma vyenyi vyajita muzuvo muze mwapwilenga vifwanyisa vyaAshatolete, kaha mujimba wenyi vaupapalilile hakembwe yanganda yaMbete-shane.+
11 Omu vatu vamuYaveshe-ngileyate+ vevwile vyuma valingile vaFwilishite kuli Saulu,
12 vaka-kulwa jita vosena vakatukile, vatambukile ufuku wosena nakukaheta kuze. Vafumishile mujimba waSaulu namijimba yavana venyi hakembwe yanganda yaMbete-shane, vayile nayo kuYaveshe, kaha vakayilumbile.
13 Kufumaho vambachile vifuwa vyavo,+ vavifunjile mumutondo wamutamalishike muYaveshe.+ Kaha valijilikile kulya hamakumbi 7.
