Samwele 1 4:1-22
4 Jino mazu aSamwele ahetele kuli vaIsalele vosena.
Likumbi limwe, vaIsalele vayile nakulihumangana navaFwilishite mangana vakalwe jita. Vatungile chilombo chavo kwakamwihi naEvenezele, kaha vaFwilishite vatungile chilombo chavo kuAfweke.
2 VaFwilishite vayile mumazavu akulongesa kanawa nakulwa navaIsalele. Kaha jita yavatohwelele vaIsalele, ngocho vavafungulwile kuli vaFwilishite. VaFwilishite vajihile malunga vavaIsalele 4,000 omu vapwile nakulwa jita.
3 Omu vatu vakindulukile muchilombo, vakulwane javaIsalele vambile ngwavo: “Mwomwo ika Yehova nechelela vaFwilishite vatufungulule* lelo?+ Tuyenu kuShilo+ tukambate chikasha chalushiko lwaYehova mangana chipwenga kuno, chitulwile kuli vaka-kole jetu.”
4 Ngocho vatumine vatu kuShilo vakambate chikasha chalushiko lwaYehova wamayongomena uze atwama halitanda helu* lyavakeluve.+ Vana vaEli vavali, Hofwonyi naFwinehase+ vejile hamwe nachikasha chalushiko lwaKalunga wamuchano.
5 Omu chikasha chalushiko lwaYehova chahetele muchilombo, vaIsalele vosena valikuwile chikuma, kaha mavu alinyikile.
6 Omu vaFwilishite vevwile kulikuwa kana, vambile ngwavo: “VaHepeleu vali nakulikuwila ika muchilombo chavo?” Kutwala muze, vatachikijile ngwavo Chikasha chaYehova chineza muchilombo.
7 Ngocho vaFwilishite vevwile woma, vambile ngwavo: “Kalunga neza muchilombo chavo.”+ Vambile cheka ngwavo: “Kwetu ngu, mwomwo chuma kana kanda chisolokengaho lyehi.
8 Kwetu ngu. Iyaze mwatulwila kuli ou Kalunga wangolo? Ou ikiye Kalunga uze ajihile vaEjipitu mupambo.+
9 Enu vaFwilishite, pwenu vakumika, jikizenu mwaulunga, kuchina namupwa muvandungo javaHepeleu, ngana muze vakiko vapwile vandungo jenu.+ Jikizenu mwaulunga mangana mulwenga navo.”
10 Ngocho vaFwilishite valwile jita navaIsalele, kaha vaIsalele vavafungulwile,+ vachinyinyine kujimbalaka javo. Kwafwile vatu vavavulu chikuma. Kuli vaIsalele kwafwile maswalale vakutambuka hamavu 30,000.
11 Kaha vatambwile naChikasha chaKalunga. Vana vaEli vavali, Hofwonyi naFwinehase navakiko vavajihile.+
12 Jino kaMbenjamine umwe achinyine kujita, ahetele kuShilo halikumbi vene lize nauvwalo wakupulyejeka, kaha apwile namavu kumutwe wenyi.+
13 Omu ahetele, Eli atwamine kujila nakutalijiza, mwomwo alizakaminyine chikuma haChikasha chaKalunga wamuchano.+ Uze lunga engilile munganda, kaha ambulwile mujimbu, ngocho vatu vosena munganda vaputukile kulila.
14 Omu Eli evwile vatu vali nakulila jimbimbi, ambile ngwenyi: “Ojo jimbimbi jaka?” Kaha uze lunga anguhwishile nakwiza nakumuhichilamo Eli.
15 (Jino Eli apwile namyaka yakusemuka 98, kaha meso enyi afuvalalile, kapwile nakumona kanawako.)+
16 Uze lunga ambile kuli Eli ngwenyi: “Ami yami ngunafumu kujita. Ngunachinyiko lelo vene ngana.” Eli amwihwile ngwenyi: “Ove mwanami, vyuma muka vinasoloka?”
17 Uze kanganda ambulwile ngwenyi: “VaIsalele vanachinyi vaFwilishite, kaha vavavulu vanavajihi.+ Navana vove vavali, Hofwonyi naFwinehase vanavajihi.+ Chikasha chaKalunga nawa vanachitambula.”+
18 Omu uze lunga avulukile vyaChikasha chaKalunga wamuchano, Eli andumukile chanyima kufuma hachitwamo kuchikolo kuze atwamine, alikundwile shingo, ngocho afwile mwomwo apwile kashinakaji kaha nawa apwile napezu chikuma. Eli ayulile vaIsalele hamyaka 40.
19 Jino nayewenu, pwevo lyaFwinehase apwile hanakulisa. Kahomu evwile ngwavo Chikasha chaKalunga wamuchano vanachitambula, isewenu nalunga lyenyi nawa vanafu, afukamine, misongo yakusema yamulendumukilile, kaha asapulukile.
20 Omu apwile hakamwihi nakufwa, mapwevo vaze apwile navo vamwambile ngwavo: “Kanda nawivwa womako, mwomwo unaseme mwana walunga.” Oloze ikiye kavakumbulwileko, chipwe kuhakako muchima.
21 Oloze alukile uze mwana ngwenyi Ikavote,*+ mwomwo ambile ngwenyi: “Upahu unafumu muIsalele nakuya mulifuchi lyaundungo.”+ Apwile nakuhanjika vyaChikasha chaKalunga wamuchano chize vatambwile navyuma vyasolokele kuli isewenu nalunga lyenyi.+
22 Ambile ngwenyi: “Upahu unafumu muIsalele nakuya mulifuchi lyaundungo, mwomwo Chikasha chaKalunga wamuchano vanachitambula.”+
Kwinyikila Chamwishi
^ Hepe., “Mwomwo ika Yehova natufungulwila?”
^ Chipwe pamo, “hakachi.”
^ Ulumbunwiso, “Upahu Uli Kulihi?”
