Samwele 1 5:1-12
5 Omu vaFwilishite vatambwile Chikasha+ chaKalunga wamuchano, vachifumishile kuEvenezele nakuchitwala kuAshatote.
2 Vambachile Chikasha chaKalunga wamuchano nakuchingisa muzuvo* yakalunga kavo Ndangone. Vachitumbikile kwakamwihi naNdangone.+
3 Lichako omu vaAshatote vahindukile chimenemene, vawanyine Ndangone naholokela chameso hamavu kulutwe lwaChikasha chaYehova.+ Kaha vambachile Ndangone nakumwimika cheka.+
4 Omu vahindukile chimenemene likumbi lyakavangijileho, vawanyine cheka Ndangone naholokela chameso hamavu kulutwe lwaChikasha chaYehova. Mutwe namavoko enyi osena vyapundukile nakuholokela hamukwilichi. Oloze mujimba wenyi wakufwana nge ishi ukiko kaha* wasalileho.
5 Shikaho vapilishitu jaNdangone navosena vaze veji kwingilanga muzuvo yaNdangone kaveshi kulyachila hamukwilichi wazuvo yaNdangone muAshatoteko palanga nakulelo lino.
6 Yehova azangamishile vaAshatote, kaha avanongesele hakuneha musongo wavitomba+ munganda yaAshatote namujingalila jayo.
7 Omu vatu vamuAshatote vamwene vyuma vyasolokele, vambile ngwavo: “Kanda natwechelela Chikasha chaKalunga kaIsalele chitwame lika kunoko, mwomwo natuzangamisa nakuzangamisa nawa kalunga ketu Ndangone.”
8 Ngocho vasanyikile vamyata javaFwilishite vosena nakuvakungulula, vavahulishile ngwavo: “Chikasha chaKalunga kaIsalele natuchilinga muka?” Kaha vambile ngwavo: “Chikasha chaKalunga kaIsalele chitwalenu kuNgata.”+ Ngocho vatwalile Chikasha chaKalunga kaIsalele kuze.
9 Omu vachitwalile kuze, Yehova azangamishile vatu vamunganda kana, avazuzwishile nawoma. Vanyike navakulwane vosena munganda avavetele namusongo wavitomba.+
10 Ngocho vatwalile Chikasha chaKalunga wamuchano kuEkelone.+ Kahomu Chikasha chaKalunga wamuchano chahetele kuEkelone, vaEkelone vatetele ngwavo: “Vananehe Chikasha chaKalunga kaIsalele kuno mangana vatujihise hohamwe navatu jetu!”+
11 Ngocho vasanyikile vamyata javaFwilishite vosena nakuvakungulula, vavambile ngwavo: “Twalenu Chikasha chaKalunga kaIsalele, chikindulwisenu kuchihela chafumine mangana etu navatu jetu tuzeneke kufwa.” Mwomwo vatu vosena munganda vevwile woma ngwavo navafwa. Kalunga wamuchano avazangamishile chikuma,+
12 kaha vatu vaze vazenekele kufwa vakwachiwile musongo wavitomba. Ngocho tuwelele twavatu munganda twahetele mwilu.
