Samwele 1 6:1-21
-
VaFwilishite navakindulwisa Chikasha kuli vaIsalele (1-21)
6 Chikasha+ chaYehova chapwile mungalila yavaFwilishite hatukweji 7.
2 VaFwilishite vasanyikile vapilishitu navaka-kutaha,+ vavahulishile ngwavo: “Echi Chikasha chaYehova natuchilinga muka? Tulwezenu mwakuchikindulwishila kuchihela chafumine.”
3 Vakiko vambile ngwavo: “Kachi nge namusaka kukindulwisa chikasha chalushiko lwaYehova Kalunga kaIsalele, kanda namuchikindulwisa chakuzeneka wanako. Chikindulwisenu kuli Kalunga nawana wahamulonga.+ Nge namulinga ngocho, mwamyuka kaha nawa namutachikiza ovyo ali nakumizangamishila.”
4 VaFwilishite vehwile ngwavo: “Wana muka wahamulonga natumutwalila?” Vakiko vavakumbulwile ngwavo: “Mutwalilenu vifwanyisa vyaulu vitanu vyamusongo wachitomba, navifwanyisa vyaulu vitanu vyavatumbi nge kutesa nakuvula chavamyata javaFwilishite.+ Mwomwo musongo kana unamikwate muvosena navamyata jenu.
5 Tengenu vifwanyisa vyamusongo wenu wachitomba navifwanyisa vyavatumbi+ vaze vali nakwenyeka lifuchi lyenu mangana muhane kavumbi Kalunga kaIsalele. Pamo mwalitwamina kumizangamisa enu, nakalunga kenu, nalifuchi lyenu.+
6 Ikaze namukakamishila michima yenu ngana muze valingile vaEjipitu naFwalo?+ Omu Kalunga avazangamishile+ mwamunene hakiko jino vasuwile vaIsalele vayenga.+
7 Wahisenu litemba lyalihya, mbatenu vangombe vavihwevo vavali vaze vali navana vavandende, vaze nawa kanda vachikasengaho lyehi toka. Vakasenu kulitemba, oloze vana vavo vahandulenuko nakuvatwala kumulaka.
8 Kaha mbatenu Chikasha chaYehova muchihake mulitemba. Mbatenu nawa vifwanyisa vyaulu vize namutuma kupwa wana wahamulonga muvihake muchikasha cheka, muchitumbike kuchikasha chaKalunga.+ Kaha suulenu chikasha chaKalunga chiyenga.
9 Jino chitalijizenu. Kachi nge nachiya mujila yakuya kuMbete-shemeshe,+ kungalila kuze chafumine, kaha natutachikiza ngwetu ikiye natumwenesa lupi lupwaha. Oloze kachi nge kacheshi kuyako, kaha natutachikiza ngwetu keshi ikiye natuzangamisako. Lupi kana lunalijila luvene.”
10 Ngocho vatu valingile nganomu vavalwezele. Vambachile vangombe vavihwevo vavali vaze vapwile navana vavandende, vavakashile kulitemba, kaha vana vavo vavasokelele mumulaka.
11 Kufumaho, vahakile Chikasha chaYehova mulitemba hohamwe nachikasha chize chapwile navifwanyisa vyavatumbi vyaulu, navifwanyisa vyamusongo wachitomba uze vavijile.
12 Vaze vangombe vayile lika mujila yakuya kuMbete-shemeshe.+ Vatambukile lika mujila kana oku vali nakuya nakuteta. Kavapeukilile kuchilyo chipwe kuchimosweko. Kaha vamyata javaFwilishite vavakavilenga lika munyima palanga nomu vakahetele kungiza yaMbete-shemeshe.
13 Jino vatu vakuMbete-shemeshe vapwile nakwaha tiliku muchinema.* Kahomu vandwile meso, vamwene Chikasha, ngocho vawahililile chikuma.
14 Lize litemba lyengilile muwande waYoshuwa kaMbete-shemeshe, lyemanyine kwakamwihi nalilolwa lyalinene. Vapazwile lize litemba nakulitenga jikunyi, kaha valumbile vaze vangombe+ kupwa wana wakulumba kuli Yehova.
15 Jino vaLevi+ vasulwile Chikasha chaYehova nachikasha chize chapwile navifwanyisa vyaulu. Kaha vambachile chikasha chaKalunga, vachihakile hali lize lilolwa lyalinene. Halikumbi kana, vatu vamuMbete-shemeshe+ vahanyine Yehova mawana akulumba navimuna vakuvatula.
16 Omu vaze vamyata javaFwilishite vatanu vamwene chuma kana, vakindulukile kuEkelone likumbi vene lize.
17 Evi vikiko vifwanyisa vyaulu vyamusongo wachitomba vize vatumine vaFwilishite kuli Yehova kupwa wana wahamulonga:+ chifwanyisa chimwe chapwile changanda yaAshatote,+ chikwavo changanda yaNgaza, chikwavo nawa changanda yaAshakelone, chikwavo changanda yaNgata,+ chikwavo nawa changanda yaEkelone.+
18 Kaha vize vifwanyisa vyavatumbi vyaulu vyapwile kweseka nakuvula chajinganda javaFwilishite josena javamyata vatanu jakujingulwisa jikembwe najingalila jakuzeneka jikembwe.
Lize lilolwa lyalinene vatumbikile Chikasha chaYehova muwande waYoshuwa kaMbete-shemeshe lyapwa hiunjiho palanga nakulelo lino.
19 Oloze Kalunga ajihile vatu vamuMbete-shemeshe mwomwo vatalile Chikasha chaYehova. Ajihile vatu 50,070,* kaha vatu valishonene mwomwo Yehova ajihile vatu vavavulu chikuma.+
20 Vatu vamuMbete-shemeshe valyambile ngwavo: “Iyaze mwemana kumeso aYehova, ou Kalunga wajila?+ Mwaya kulihi mangana atufume?”+
21 Ngocho vatumine valuwa vakalweze vatu vakuKilyate-yeyalime+ ngwavo: “VaFwilishite vanakindulwisa Chikasha chaYehova. Twayenu muchimbate.”+
