Samwele 1 7:1-17
7 Kaha vatu vakuKilyate-yeyalime vejile nakumbata Chikasha chaYehova, vachitwalile muzuvo yaAvinatave+ yize yapwililile hapili. Vajilikile mwanenyi Eleyaza mangana alamenga Chikasha chaYehova.
2 Mwahichile myaka 20 kufuma halikumbi lize chejile Chikasha kuKilyate-yeyalime. Vaze vakuzuvo yaIsalele vosena vaputukile kutondatonda Yehova.+
3 Jino Samwele ambile kuli vaze vakuzuvo yaIsalele vosena ngwenyi: “Kachi nge namusaka kukinduluka kuli Yehova namichima yenu yosena,+ kaha mbilenu tulunga veka+ navifwanyisa vyaAshatolete+ evi vili muli enu. Hakenu michima yenu yosena kuli Yehova nakumuzachila ikiye kaha.+ Nge namulinga ngocho, kaha mwamipululula mumavoko avaFwilishite.”+
4 Shikaho, vaIsalele vambilile vaMbale navifwanyisa vyaAshatolete, vazachililenga kaha Yehova.+
5 Jino Samwele ambile ngwenyi: “Kungulwilenu vaIsalele vosena kuMijipa,+ kaha ami nangumilombelako kuli Yehova.”+
6 Ngocho valikungulwilile kuMijipa, vaswichile meya, vawamwangile kumeso aYehova, kaha valijilikile kulya halikumbi lize.+ Vambile ngwavo: “Tunalingi shili kuli Yehova.”+ Jino Samwele aputukile kuyula+ vaIsalele kuMijipa.
7 Omu vaFwilishite vevwile ngwavo vaIsalele vanalikungulwila kuMijipa, vamyata javaFwilishite+ vakatukile mangana vakalwe jita navaIsalele. Kaha vaIsalele vevwile woma hakwivwa ngwavo vaFwilishite vali nakwiza.
8 Vambile kuli Samwele ngwavo: “Kanda naulitwamina kulomba kuli Yehova Kalunga ketu mangana atukafwe+ nakutulwila kumavoko avaFwilishiteko.”
9 Ngocho Samwele ambachile mwanamukoko uze achili nakwamwa, amuhanyine kuli Yehova kupwa wana wakulumba.+ Alombeleleko vaIsalele kuli Yehova, kaha Yehova amukumbulwile.+
10 Shimbu Samwele apwile nakuhana wana wakulumba, vaFwilishite vapandamine kwakamwihi mangana valwenga jita navaIsalele. Jino Yehova anehele mikalateta yayinene+ hali vaFwilishite likumbi lize. Avaluwanganyishile,+ kaha vavafungulwile kuli vaIsalele.+
11 Malunga vavaIsalele vafumine kuMijipa, vahangasanyine vaFwilishite nakuvajiha palanga nakusulo yaMbete-kale.
12 Jino Samwele ambachile lilolwa,+ alihakile mukachi kaMijipa naYeshana. Alilukile ngwenyi Evenezele,* mwomwo ambile ngwenyi: “Yehova achili nakutukafwa lika noholyapwa.”+
13 Ngocho vaFwilishite vavafungulwile, kaha kavejile cheka mungalila yavaIsaleleko.+ Yehova ketavishile vaFwilishite vafumbukile vaIsalele hamakumbi aSamwele osenako.+
14 Jinganda josena, kufuma kuEkelone nakutwala kuNgata, jize vaFwilishite vatambwile kuli vaIsalele vajikindulwishile. Ngocho vaIsalele vatambwile jingalila javo kumavoko avaFwilishite.
Kaha nawa vaIsalele navaAmole vatwaminenga mukuunda.+
15 Jino Samwele ayulilenga vaIsalele mukuyoya chenyi chosena.+
16 Mwaka himwaka apwilenga nakujinguluka kuputukila kuMbetele,+ nakuya kuNgilingale,+ nakuheta kuMijipa.+ Ayulilenga vaIsalele muvihela vyosenevi.
17 Oloze ahilukilenga kuLama+ mwomwo kukiko kwapwile zuvo yenyi, kaha ayulilenga nawa vaIsalele kuze. Atungilile Yehova lijiko lyakulumbila kuze.+
Kwinyikila Chamwishi
^ Ulumbunwiso, “Lilolwa lyaKukafwa.”