Samwele 1 8:1-22
8 Omu Samwele alingile hanashinakaja lyehi, atongwele vana venyi vayule vaIsalele.
2 Mwanenyi watwatwa apwile Yowele, kaha wamuchivali apwile Aviya.+ Ava vakiko vapwile vaka-kuyula muMbele-sheva.
3 Oloze ava vana venyi kavatambukilenga mujijila jenyiko. Vafwilililenga kunganyala vyuma mulizangamina,+ vatambwilenga maswekeza,+ vahengeselenga chiyulo.+
4 Kutwala muze vakulwane javaIsalele vosena valikungulwile, vejile kuli Samwele kuLama.
5 Vambile kuli ikiye ngwavo: “Tala! Ove unashinakaja lyehi, kaha nawa vana vove kaveshi nakutambuka mujijila joveko. Shikaho tutongwele mwangana atuyule nganomu valinga vaka-mafuchi eka osena.”+
6 Oloze Samwele evwile kupihya* omu vambile ngwavo: “Tuhane mwangana atuyule.” Ngocho alombele kuli Yehova.
7 Jino Yehova ambile kuli Samwele ngwenyi: “Ivwilila vyuma vyosena vanakulweze ava vatu, mwomwo kavakanyine yoveko, oloze vanakane yami kupwa ngumwangana wavo.+
8 Vanalingi nge omu vanalinginga kufuma vene halikumbi ngwavalowele muEjipitu palanga nakulelo. Vanangusezenga+ nakuzachila tulunga veka,+ kahomu mukiko vanalingi nakuli yove.
9 Chipwe ngocho vevwilile. Oloze vahuhumune hatoma nakuvalweza vyuma mwakasakanga mwangana uze mwakavayula.”
10 Ngocho Samwele ambulwile mazu aYehova osena kuli vatu vaze vamulombele ngwavo avahane mwangana.
11 Ambile ngwenyi: “Evi vikiko vyuma mwakasakanga mwangana uze mwakamiyula:+ Mwakambata vana venu vamalunga+ mangana vakamutambukishilenga matemba enyi+ natuvalu twenyi.+ Vana venu veka navakapwanga vaka-kulaha kulutwe lwamatemba enyi.
12 Mwakalitongwela tupitau twamakombakaji,+ natupitau twamakumi atanu.+ Vatu veka navakamuliminanga,+ nakumwahila,+ nakumutungila vitwa vyajita navinoma vyakumatemba enyi.+
13 Mwakambata vana venu vamapwevo mangana vakamuyengelenga maji alivumba lyamwaza,* nakumutelekela vyakulya, nakumwochela jimbolo.+
14 Mwakamitambula mande enu amwaza, mande ajimbuto jamanona, namande amivinyo nawawa amilive+ nakuwahana kuli vangamba jenyi.
15 Mwakamitambula vyakusokesa mumakumi vyamumande enu ajimbuto jamanona, namumande enu amivinyo nakuvihana kuli vilolo jenyi navangamba jenyi.
16 Mwakamitambula vangamba jenu vamalunga navava vamapwevo, navangombe jenu vamwaza chikuma, navimbulu jenu mangana akavazachisenga kumilimo yenyi.+
17 Havimuna jenu mwakambataho vimuna vakusokesa mulikumi,+ kahenu namukapwanga muvangamba jenyi.
18 Likumbi nalikeza omu namukateta mwomwo yamwangana munasake enu vavene,+ oloze Yehova keshi kukamikumbulula halikumbi kanako.”
19 Oloze vatu vakanyine vyuma vyosena avalwezele Samwele. Vambile ngwavo: “Katute, tuli nakusaka mwangana atuyule,
20 mangana nayetu nawa tupwenga nganomu vapwa vaka-mafuchi eka. Mwangana wetu mwatuyulanga, nakututwaminyina, nakutuzungila jijita.”
21 Omu Samwele evwile vyuma vyosena vahanjikile vatu, avyambulile kuli Yehova.
22 Jino Yehova ambile kuli Samwele ngwenyi: “Ove vevwilile. Vatongwele mwangana avayule.”+ Ngocho Samwele ambile kuli malunga vavaIsalele ngwenyi: “Kindulukenu mutu himutu kunganda yenyi.”
Kwinyikila Chamwishi
^ Hepe., “Oloze chapihile kumeso aSamwele.”
^ Chipwe “vakamusungilenga maji alivumba lyamwaza.”
