Samwele 1 9:1-27
-
Samwele mwaliwana naSaulu (1-27)
9 Jino kwapwile lunga umwe wakutanga yaMbenjamine, lijina lyenyi ikiye Kishe+ mwanaAviyele, Aviyele mwanaZelole, Zelole mwanaMbekolate, Mbekolate mwanaAfwiya. Ou kaMbenjamine+ apwile naluheto chikuma.
2 Apwile namwanenyi walunga, lijina lyenyi apwile ikiye Saulu.+ Ou mukweze Saulu apwile wamwaza chikuma kuhambakana vaIsalele vosena. Apwile wamusuku chikuma kuhambakana vatu vosena.*
3 Likumbi limwe, omu vimbulu jaKishe, ise yaSaulu vajimbalile, Kishe alwezele mwanenyi Saulu ngwenyi: “Mbata muka-kukafwa umwe uyenga nenyi nakutonda vimbulu.”
4 Vahitanganyine mungalila yajipili yaEfwalime, namulifuchi lyaShalisha, oloze kavavawanyineko. Vahitanganyine nawa mulifuchi lyaShalime, chochimwe kavavawanyineko. Kaha vahitanganyine mulifuchi lyavaMbenjamine lyosena, oloze kavavawanyineko.
5 Kahomu vahetele mulifuchi lyaZufwe, Saulu ambile kuli uze muka-kumukafwa ngwenyi: “Tuyenga tukinduluke, kuchina tata mwaputuka kulizakamina nawa hali etu mukutela kulizakamina hali vimbulu.”+
6 Oloze uze muka-kumukafwa ambile ngwenyi: “Omu munganda mwatwama mutu waKalunga uze vavumbika chikuma. Vyuma vyosena eji kuhanjikanga vyeji kusolokanga.+ Ngocho tuyengamo oholyapwa vene ngana, pamo mwatulweza okwo twatela kuya nakutondela.”
7 Kaha Saulu ambile kuli uze muka-kumukafwa ngwenyi: “Kachi nge natuya kuli ou mutu, natumuhichika ika? Katweshi nambolo mujinjeke jetu, chipwe wana wakuhana ou mutu waKalunga wamuchanoko. Vyuma muka tuli navyo?”
8 Uze muka-kukafwa ambile cheka kuli Saulu ngwenyi: “Tala! Nguli nachimbwa chimwe chashekele* yapalata chakusokesa muvimbwa viwana. Nangumuhanacho ou mutu waKalunga wamuchano, kaha mwatulweza okwo twatela kuya nakutondela.”
9 (Kushikulu muIsalele, vatu hakuya nakwihula Kalunga vahanjikilenga ngwavo: “Tuyenu kuli muka-kumona vyakulutwe.”+ Mwomwo ava vapolofweto valiko makumbi ano vavavulukilenga kushikulu ngwavo vaka-kumona vyakulutwe.)
10 Kaha Saulu ambile kuli uze muka-kumukafwa ngwenyi: “Vyuma unahanjika vyamwaza. Tuyenga.” Ngocho vayile munganda muze mwapwile uze mutu waKalunga wamuchano.
11 Omu vapwile nakukanduka mukandu wakuya munganda, valiwanyine navana vamapwevo vaze vapwile nakuya nakuswita meya. Kaha vehwile ava vana vamapwevo ngwavo: “Muka-kumona vyakulutwe+ mwali munganda tahi?”
12 Vavakumbulwile ngwavo: “Mwali. Ali kulutwe lwenu oku muli nakuya. Anguhwisenuko mwomwo lelo neza munganda. Likumbi lyalelo vatu vali nakuhana chimuna wakuvatula+ hachihela chakulunduka.+
13 Omu namwingila munganda namumuwana kanda ayenga nakulya kuchihela chakulunduka. Kuvanga ikiye ayenga kuze numbanyi vatu valyenga, mwomwo ikiye eji kukisulanga chimuna wakuvatula. Nge nalingi ngocho numba vaze vanasanyika valyenga jino. Shikaho yenunga oholyapwa vene ngana namumuwana.”
14 Ngocho vayile munganda. Kahomu vahetele mukachi kanganda, vamwene Samwele ali nakwiza kulutwe lwavo, apwile nakuya kuchihela chakulunduka.
15 Likumbi lyafumineho shimbu kanda Saulu ezenga, Yehova alwezele Samwele ngwenyi:
16 “Hamene halwola nge luno, nangukakutumina mutu mwakafuma kungalila yavaMbenjamine.+ Kamuwavise mangana apwenga twamina yavatu jami vaIsalele.+ Mwakalwila vatu jami kumavoko avaFwilishite, mwomwo ngunamono luyando lwavatu jami, kaha miteto yavo yinahete kuli ami.”+
17 Omu Samwele amwene Saulu, Yehova amwambile ngwenyi: “Ou ikiye uze lunga ngwakulwezanga ngwami, ‘Mwayulanga vatu jami.’”*+
18 Jino Saulu apandamine kuli Samwele muchikolo, amwambile ngwenyi: “Nguhuliseko mwane. Zuvo yamuka-kumona vyakulutwe yatwamina kulihi?”
19 Samwele ambile kuli Saulu ngwenyi: “Ami yami vene muka-kumona vyakulutwe. Tetekelenuko, tuyenu kuchihela chakulunduka. Lelo namulya vyakulya nayami.+ Hamene nachimene nangukamilweza vyuma vyosena muli nakusaka kutachikiza,* kaha nangukamisuula mukaye.
20 Kanda namulizakamina hali vimbulu vaze vajimbalanga zawalyakazeko,+ mwomwo vanavawane lyehi. Uno vyuma vyamuIsalele vyamwaza vyosena vyapwa vyeya? Kutala kavyapwa vyove navaze vakuzuvo yaisoko tahi?”+
21 Jino Saulu amukumbulwile ngwenyi: “Ami ngwapwa ngukaMbenjamine, nguwakumuyachi waundende chikuma hamiyachi yavaIsalele,+ kaha tanga yami nawa yapwa yayindende chikuma hakuyesekesa kujitanga jakumuyachi waMbenjamine. Nyi yikaze unahanjikila ngocho kuli ami?”
22 Samwele atwalile Saulu nauze muka-kumukafwa muzuvo yakulila, kaha avahanyine vitwamo vyaulemu havatu vaze vasanyikile. Kwapwile vatu kafwe 30.
23 Jino Samwele alwezele muka-kuteleka ngwenyi: “Neha chilyo chize ngwakuhananga, chize ngwambanga ngwami, ‘Chitumbike hauka wacho.’”
24 Jino uze muka-kuteleka ambachile lihinji lyachimuna lyosena, alitumbikile kumeso aSaulu. Samwele ambile ngwenyi: “Echi chikiko chilyo vakutumbikilanga. Lyako, mwomwo ove yove vachitumbikilanga mangana ulyenga kuchilika chino. Ngwavalwezanga ngwami, ‘Ngunasanyika vatu.’” Ngocho Saulu alile vyakulya naSamwele halikumbi lize.
25 Kaha vafumine kuze kuchihela chakulunduka,+ vayile munganda. Jino Samwele atwalileho kushimutwila naSaulu helu lyazuvo.
26 Lichako, vahindukile muze pulundundu, kahomu lyatutukile likumbi, Samwele ambile kuli Saulu haze helu lyazuvo ngwenyi: “Liwahise, mangana ngukusuule uyenga.” Ngocho Saulu aliwahishile, kaha alovokele haweluka naSamwele.
27 Omu vapwile nakupandama kusembwa yanganda, Samwele ambile kuli Saulu ngwenyi: “Lweza ou muka-kukukafwa+ atetekeleko.” Kaha uze muka-kumukafwa atetekeleleko. Ngocho Samwele ambile kuli Saulu ngwenyi: “Imana ngukulweze vyuma nahanjika Kalunga.”
Kwinyikila Chamwishi
^ Hepe., “Apwile wamusuku chikuma kuhambakana vatu vosena kufuma havifwiji vyenyi nakuya kwilu.”
^ Shekele yimwe yapwile jingalamu 11.4. Tala Chihande B14.
^ Chipwe “Mwakinganga vatu jami.”
^ Hepe., “vyuma vyosena vize vili mumichima yenu.”
