Samwele 2 1:1-27
1 Omu Ndavichi afumine kuze akafungulwile* vaAmaleke, ayile nakutwama kuJikilange.+ Halwola kana, Saulu apwile hanafu lyehi. Ndavichi atwamine kuze makumbi avali.
2 Jino halikumbi lyamuchitatu, lunga umwe ejile kufuma kuchilombo chaSaulu. Lunga kana ejile nauvwalo wakupulyejeka, kaha apwile namavu kumutwe wenyi. Omu apandamine kuli Ndavichi, afukamine chameso hamavu nakulifukula.
3 Ndavichi amwihwile ngwenyi: “Uli nakufuminyina kulihi?” Ikiye amukumbulwile ngwenyi: “Ngunachinyi kuchilombo chavaIsalele.”
4 Ndavichi amwihwile cheka ngwenyi: “Vyuma muka vinasoloka? Ngulweze.” Ikiye ambile ngwenyi: “Vatu vanachinyi kujita, kaha vavavulu vanalindumuka nakufwa. Saulu namwanenyi Yonatane navakiko vanafu.”+
5 Ndavichi ehwile cheka uze mukweze ejile nakumwambulila mujimbu ngwenyi: “Unatachikiza ngachilihi ngwove Saulu namwanenyi Yonatane vanafu?”
6 Uze mukweze ambile ngwenyi: “Ami ngwapwanga nakulihichila kwami haPili yaNgilivowa,+ kaha ngwamonanga Saulu nalijikilila nalikunga lyenyi. Vaka-matemba navaka-tuvalu vakiko vamulemekanga.+
7 Omu atalanga kunyima, angumonanga, kaha angusanyikanga. Ngocho ami ngwamukumbululanga ngwami, ‘Yami uno mwane.’
8 Angwihulanga ngwenyi, ‘Yoveya?’ Kaha ami ngwamukumbululanga ngwami, ‘NgukaAmaleke.’+
9 Ikiye angwambanga ngwenyi, ‘Twaya kuno ungujihe, nguli nakwivwa kukola chikuma, mwomwo nguchili nguwamutonyi.’*
10 Ngocho ngwapandamanga kuli ikiye, kaha ngwamujihanga,+ mwomwo ngwatachikizanga ngwami keshi kuyoyako hakuwana nge vamulemekanga chikuma. Kufumaho ngwambatanga muchama wapwanga kumutwe wenyi nalukano lwapwanga kulivoko lyenyi, kaha ngunavinehe kuli ove mwata wami.”
11 Hahaze vene Ndavichi apulile uvwalo wenyi. Namalunga vosena vaze apwile navo vapulile uvwalo wavo.
12 Valilile jimbimbi nakulishona, kaha valijilikile kulya+ palanga nakuchingoloshi mwomwo yaSaulu, namwanenyi Yonatane, navatu jaYehova, navaze vakuzuvo yaIsalele,+ vaze valindumukile kupoko yamukwale.
13 Ndavichi ehwile uze mukweze ejile nakumwambulila mujimbu ngwenyi: “Wafuma kulihi?” Ikiye ambile ngwenyi: “Ngumwanamwiza wakaAmaleke.”
14 Kaha Ndavichi ambile kuli ikiye ngwenyi: “Ika wazenekelanga kwivwa woma wakwolola livoko lyove nakujiha ou vawavisa kuli Yehova?”+
15 Ngocho Ndavichi asanyikile mukweze umwe, amulwezele ngwenyi: “Twaya kuno umujihe.” Uze mukweze avetele uze kaAmaleke, kaha afwile.+
16 Ndavichi ambile kuli uze kaAmaleke ngwenyi: “Mulonga wamanyinga ove uli hali yove ivene, mwomwo kanwa kove kakiko kanambulula unjiho wakukupayisa omu unambe ngwove, ‘Ami yami ngunajihi ou vawavisa kuli Yehova.’”+
17 Kufumaho Ndavichi embile lungungu* hali Saulu namwanenyi Yonatane.+
18 Kaha ambile ngwenyi vatu vamuYuta vatela kuvanangula elu lungungu lwakwamba ngwavo “Uta Wamanana,” elu vasoneka mumukanda waYashale.+ Embile ngwenyi:
19 “Ove Isalele, vatu jove vaupahu vanavajihila havihela vyove vyakulunduka.+Vindume vanalindumuka.
20 Kanda namwambulula mujimbu kana muNgatako,+Kanda namuvilika mujimbu kana mujijila jamuAshakeloneko,Kuchina vana vamapwevo vavaFwilishite navawahilila,Kuchina vana vamapwevo vavava vilima navalisamba.
21 Enu jipili jaNgilivowa,+Hali enu kanda nahakapwa lyume, chipwe kunokela vulako,Hali enu kanda nahakapwa mande akulovola jimbuto jize navakahana kupwa mawana ajilako,+Mwomwo jikepwe javindume vajijilulwilile hali enu,Kepwe yaSaulu yinapu jino yakuzeneka kukwita maji.
22 Uta waYonatane wamanana kawakindulukilenga+Chakuzeneka kumwanga manyinga nakutuvasana mumaji avindumeko.Poko yamukwale yaSaulu kayakindulukilenga chakuzeneka kufungululako.+
23 Saulu naYonatane+ vapwile vatu vamwenemwene omu vapwile nakuyoya,Kavahashile kuvahandununa nahakufwa chavoko.+Vapwile vaka-jimbushi kuhambakana vangonga,+Vapwile nangolo kuhambakana vandumba.+
24 Enu vana vaIsalele vamapwevo, mulilenu Saulu,Ou amivwikile uvwalo uchila navyuma vyeka vyaulangaji,Ou ahakile vyuma vyaulu hauvwalo wenu.
25 Vindume vanalindumuka kujita.Ove Isalele, Yonatane vanamujihila havihela vyove vyakulunduka.+
26 Ove ndumbwami Yonatane, nguli nakulyonyinga hali ove,Ngwakuzangile chikuma.+Zangi yove hali ami yahambakanyine zangi yamapwevo.+
27 Vindume vanalindumuka,Vitwa vyajita vinanongo.”
Kwinyikila Chamwishi
^ Chipwe “akajihile.”
^ Chipwe “mwomwo mwono wami uchili muli ami.”
^ Chipwe “mwaso wakulishona.”
