Samwele 2 10:1-19
-
Kufungulula vaAmone navaSulya (1-19)
10 Kutwala muze, mwangana wavaAmone+ afwile, kaha mwanenyi Hanune amuswanyine.+
2 Jino Ndavichi alyambile ngwenyi: “Nangusolwela Hanune mwanaNahashe zangi yakwilila nge yize angusolwelele ise.” Ngocho Ndavichi atumine vangamba jenyi vayenga nakuvendejeka Hanune hakufwisa ise. Oloze omu vangamba jaNdavichi vahetele mulifuchi lyavaAmone,
3 vilolo javaAmone vambile kuli mwata wavo Hanune ngwavo: “Ove unashinganyeka ngwove Ndavichi ali nakusolwela iso kavumbi hakukutumina vaka-kukuvendejeka nyi? Ove kawatachikijile ngwove Ndavichi natumu vangamba jenyi kuli ove vakekese lifuchi, nakulisondwesa mangana valinongeseko nyi?”
4 Ngocho Hanune akwachile vaze vangamba jaNdavichi, avatewile wevu kusali yimwe.+ Atetele nawa uvwalo wavo hakachi, wasalile kaha vipinji vyakukumina hamatako. Kufumaho avahangile vayenga.
5 Omu Ndavichi evwile mujimbu kana, hahaze vene atumine vatu vakikilile vaze vangamba jenyi, mwomwo vavevwishile chikuma sonyi. Mwangana avalwezele ngwenyi: “Twamenu kuYeliko+ palanga nomu nausoka wevu wenu numba jino mwizenga kuno.”
6 Kutwala muze, vaAmone vamwene ngwavo Ndavichi navahungu. Ngocho vatumine vatu mangana vakakambe maswalale vavaSulya vakutambuka hamavu 20,000 vakuMbete-lehove+ nakuZova.+ Vavatumine vakakambe nawa mwangana waMaka+ navatu jenyi 1,000, namalunga 12,000+ vakuIshitove.
7 Omu Ndavichi evwile mujimbu kana, atumine Yowave nalizavu lyamaswalale lyosena, kuhakilako navatu jenyi vangolo vaka-kwasa jita.+
8 Jino vaAmone valitanjikile mumazavu akulongesa kanawa kuchikolo changanda, kaha maswalale vavaSulya vakuZova nakuLehove, namalunga vakuIshitove* nakuMaka vapwile uka wavo muchipapa.
9 Omu Yowave amwene ngwenyi maswalale vali nakwiza kulutwe nakunyima mangana vamulukuke, asakwile maswalale vamwe vangolo chikuma muIsalele, kaha avatanjikile mumazavu akulongesa kanawa mangana valihumangane namaswalale vavaSulya.+
10 Kaha malunga vaze vasalileho avahanyine kuli* ndumbwenyi Avishai+ avatanjike mumazavu akulongesa kanawa mangana valihumangane navaAmone.+
11 Kufumaho ambile ngwenyi: “Kachi nge maswalale vavaSulya navanguhambakana ngolo, kaha mwizenga mungupululule. Oloze kachi nge vaAmone navamihambakana ngolo, kahami nangwiza ngumipululule.
12 Twatela kujikiza nakumika+ mangana tuyovole vatu jetu najinganda jaKalunga ketu. Yehova mwalinga vyuma vize mwamona ngwenyi vyamwaza.”+
13 Jino Yowave navatu jenyi vapandamine kwakamwihi namaswalale vavaSulya mangana valwenga jita, kaha maswalale vavaSulya vachinyine.+
14 Omu vaAmone vamwene maswalale vavaSulya vanachinyi, navakiko vachinyine Avishai, kaha vengilile munganda. Kufumaho Yowave afumine kuze ayile nakulwa navaAmone, akindulukile kuYelusalema.
15 Omu maswalale vavaSulya vamwene ngwavo vanavafungulula kuli vaIsalele, valikungulwile cheka.+
16 Kaha Hatatezele+ atumine vatu vakasake maswalale vavaSulya vaze vapwile kuKalwiji.*+ Vaze maswalale vejile kuHelame, kaha vavatwaminyinyine kuli Shovake kapitau kamaswalale jaHatatezele.
17 Omu Ndavichi vamulwezele mujimbu kana, hahaze vene akungulwile vaIsalele vosena. Vazaukile Yotau, kaha vahetele kuHelame. Jino maswalale vavaSulya valitanjikile mumazavu akulongesa kanawa mangana valihumangane naNdavichi, ngocho valwile nenyi jita.+
18 Oloze maswalale vavaSulya vachinyine vaIsalele. Shikaho Ndavichi ajihile vaSulya vaka-kutambukisa matemba ajita 700, navaka-kutambukila hatuvalu 40,000. Avetele nawa Shovake kapitau kamaswalale javaSulya, kaha afwile.+
19 Omu vamyangana vosena vaze vapwile vangamba jaHatatezele vamwene ngwavo vanavafungulula kuli vaIsalele, hahaze vene valikashile chivwasano navaIsalele chakutwamanga mukuunda, kaha vavayulilenga jino kuli vaIsalele.+ Ngocho vaSulya vevwilenga woma kukafwa cheka vaAmone.
Kwinyikila Chamwishi
^ Chipwe “namalunga vakuTove.”
^ Hepe., “avahanyine mumavoko.”
^ Ikiye Yufwalate.
