Samwele 2 11:1-27
11 Kukuputuka chamwaka,* halwola luze vayilenga vamyangana kujita, Ndavichi atumine Yowave, navangamba jenyi, namaswalale javaIsalele vosena, mangana vayenga vakanongese vaAmone. Kuze vayile vakahakile nganda yaLava+ muchingombela. Oloze Ndavichi asalile muYelusalema.+
2 Jino likumbi limwe nachingoloshi, Ndavichi ahindukile hakahela kenyi, kaha apwile nakutambwojoka hamulungu wazuvo yenyi. Omu apwile haze hamulungu, amwene pwevo ali nakusana. Pwevo kana apwile wamwaza chikuma.
3 Kaha Ndavichi atumine mutu akahulisehulise hali uze pwevo. Uze mutu ejile nakwambulula ngwenyi: “Pwevo kana ikiye Mbate-sheva+ mwanaElyame,+ pwevo lyaUliya+ kaHete.”+
4 Jino Ndavichi atumine valuwa vakasake uze pwevo.+ Ngocho ejile, kaha Ndavichi alisavalile nenyi.+ (Echi chalingiwile shimbu uze pwevo apwile nakulitomesa kukupihya chenyi.*)+ Kufumaho, uze pwevo akindulukile kuzuvo yenyi.
5 Uze pwevo emichile lijimo, kaha atumine mazu kuli Ndavichi ngwenyi: “Nguli nalijimo.”
6 Kaha Ndavichi atumine mazu kuli Yowave ngwenyi: “Tuma Uliya kaHete ezenga kuno.” Ngocho Yowave alwezele Uliya ayenga kuli Ndavichi.
7 Omu Uliya ahetele kuli Ndavichi, Ndavichi amwihwile chihindu chaYowave namaswalale vosena, nomu yapwile nakutambukila jita.
8 Jino Ndavichi ambile kuli Uliya ngwenyi: “Yako kuzuvo yove ukanoke.”* Omu Uliya afumine kuzuvo yamwangana, mwangana amutuminyine wana.*
9 Oloze Uliya asavalile kuchikolo chazuvo yamwangana hamwe navangamba jamwata wenyi. Kayile kuzuvo yenyiko.
10 Jino Ndavichi vamulwezele ngwavo: “Uliya kayile kuzuvo yenyiko.” Kaha Ndavichi ambile kuli Uliya ngwenyi: “Ove wayile ungeji, kaha ika unazenekela kukinduluka kuzuvo yove?”
11 Uliya amukumbulwile ngwenyi: “Chikasha+ chaKalunga, navaIsalele, navaYuta vali nakutwama muvisakila, kaha nawa mwata wami Yowave navangamba jayove mwata wami vali nakutwama muchipapa. Kahami nanguya ngachilihi kuzuvo yami ngukalye nakunwa nakulisavala napwevo lyami?+ Omu wayoya tu,* kangweshi kuhasa kulinga chuma kanechiko.”
12 Ndavichi ambile kuli Uliya ngwenyi: “Twama kuno nalelo nawa, kaha hamene nangukakusuula ukaye.” Ngocho Uliya atwamine muYelusalema likumbi lize, nalikwavo lyakavangijileho.
13 Jino Ndavichi asanyikile Uliya mangana valyenga nakunwa. Amunwishile wala wauvulu, kaha Uliya apendele. Oloze omu kwatokele, Uliya akasavalile hamwe navangamba jamwata wenyi hakahela vamuhanyine. Kayile kuzuvo yenyiko.
14 Lichako nachimene, Ndavichi asonekelele Yowave mukanda, kaha autumine naUliya.
15 Mumukanda kana asonekelemo ngwenyi: “Hakenu Uliya kulutwe omu jita nayitohwa. Kahenu kindulukenu munyima mangana ikiye vamwase afwenga.”+
16 Omu Yowave namaswalale jenyi vapwile nakuhaka nganda muchingombela, Yowave ahakile Uliya hachihela chize amwene ngwenyi chinalitalasana namaswalale vangolo vavaka-kole javo.
17 Omu vatu vamunganda valovokele mangana valwenga jita naYowave, vajihile vangamba jaNdavichi vamwe, kaha nauze kaHete Uliya naikiye vamujihile.+
18 Ngocho Yowave atumine mujimbu kuli Ndavichi wavyuma vyosena vyasolokele kujita.
19 Yowave alwezele uze muluwa atumine ngwenyi: “Omu naukakumisa kwambulila mwangana vyuma vyosena vinasoloka kujita,
20 mwangana nahase kukapihilila nakwamba ngwenyi, ‘Ikaze mwaswenyenanga kunganda hakulwa jita? Uno kamwatachikizanga ngwenu navamyasa kufuminyina helu lyakembweko tahi?
21 Iya ajihile Avimeleke+ mwanaYeluveshete?+ Ngwetu pwevo umwe kaha ikiye amwandumwinyine lilolwa lyahelu lyakuchekesa unga kufuminyina helu lyakembwe numba afwenga kuTeveze. Shikaho, ikaze mwaswenyenanga kukembwe?’ Kufumaho, ove ukamba ngwove, ‘Nangamba yove Uliya kaHete nafu.’”
22 Ngocho uze muluwa ayile kuli Ndavichi, kaha amuhichililemo vyuma vyosena vize amulwezele Yowave.
23 Uze muluwa alwezele Ndavichi ngwenyi: “Malunga kana vatuhambakananga ngolo, kaha vatunyemukilanga muchipapa muze twapwanga. Oloze twavahangasananga palanga nakuchikolo changanda yavo.
24 Jino vaka-kwasa mata amanana vaputukanga kutwasa etu vangamba jove kufuminyina helu lyakembwe. Kaha vangamba jayove mwangana vamwe vanafu. Nangamba yove kaHete Uliya nafu.”+
25 Kufumaho Ndavichi ambile kuli uze muluwa ngwenyi: “Ukalweza Yowave ngwove, ‘Chuma kana kanda nachikwivwisa kupihyako mwomwo poko yamukwale yeji kujihanga vatu vosena. Likwachise kulwa jita nanganda kana mangana uyifungulule.’+ Kaha ukamukolezeza.”
26 Omu pwevo lyaUliya evwile ngwavo lunga lyenyi nafu, alishonene.
27 Omu akumine makumbi akulishona, hahaze vene Ndavichi atumine vatu vakasake uze pwevo nakumuneha kuzuvo yenyi. Ngocho apwile jino pwevo lyenyi,+ kaha asemene nenyi mwana walunga. Oloze Yehova+ evwile kupihya chikuma havyumevi alingile Ndavichi.
Kwinyikila Chamwishi
^ Kulumbununa, kuchivatuko chavula.
^ Kafwe kupihya hakupwa kukakweji.
^ Hepe., “ukasane kumahinji.”
^ Chipwe “chazano chamwangana,” kulumbununa chazano chize atuminenga mutu kuli ngeji yenyi wamulemu.
^ Chipwe “Omu wayoya mwono wove tu.”
