Samwele 2 12:1-31
12 Jino Yehova atumine Natane+ kuli Ndavichi.+ Omu ahetele, ambile kuli Ndavichi ngwenyi: “Munganda yimwe mwapwile malunga vavali. Umwe apwile muka-luheto, mukwavo apwile muka-kuhutwa.
2 Uze muka-luheto apwile namikoko navangombe vavavulu chikuma.+
3 Oloze uze muka-kuhutwa apwile namwanamukoko umwe kaha wamundende wachihwevo uze alanjile.+ Amulaminenga kanawa, kaha akolelele kuzuvo yenyi hamwe navana venyi. Uze mwanamukoko alilenga kuvyakulya vyavindende vize apwile navyo uze kaka yenyi. Anwinyinyinenga mulupasa lwakaka yenyi, nakusavala hamavoko enyi. Amumwenenga nge himwanenyi.
4 Kutwala muze, uze muka-luheto atambwile ngeji. Oloze mukutela kumbata mukoko umwe hamikoko jenyi, chipwe ngombe umwe havangombe jenyi mangana ajihile uze ngeji yenyi, ikiye ambachile mwanamukoko wayauze muka-kuhutwa, amujihilile uze ngeji yenyi.”+
5 Hahaze vene Ndavichi apihililile chikuma hakwivwa vyuma alingile uze muka-luheto. Ngocho ambile kuli Natane ngwenyi: “Omu ayoya Yehova tu,+ mutu kana atela kufwa!
6 Kaha nawa ashishisemo vana vamikoko vawana hachumechi nalingi+ mwomwo kevwilile mukwavo kekeko.”
7 Jino Natane ambile kuli Ndavichi ngwenyi: “Ove yove uze lunga muka-luheto. Yehova Kalunga kaIsalele nambe ngwenyi: ‘Ngwakuwavishile upwenga umwangana wavaIsalele,+ kaha nawa ngwakupululwile mulivoko lyaSaulu.+
8 Ngwakuhanyine zuvo yamwata wove,+ namapwevo jamwata wove,+ navaze vakuzuvo yaIsalele navaze vakuzuvo yaYuta.+ Kaha nawa ami ngwalizangile kukuhakilaho vyuma vyeka, kachi nge wamwene ngwove vyuma kana vyapwile vyavindende.+
9 Ikaze walumbilishilanga mazu aYehova hakulinga vyuma vyavipi kumeso enyi? Unajihi uze Uliya kaHete napoko yamukwale.+ Kahomu unalingi hiunamujihi lyehi napoko yamukwale yavaAmone,+ hikumbata nawa pwevo lyenyi kupwa pwevo lyove.+
10 Shikaho vaze vakuzuvo yove navalindumukanga lika kupoko yamukwale,+ mwomwo unangulumbilisa hakumbata pwevo lyauze Uliya kaHete kupwa pwevo lyove.’
11 Yehova nambe ngwenyi: ‘Nangukakunehela lupi luze nalufuminyina muzuvo yove.+ Nangukakutambula mapwevo jove nakuvahana kuli mukwenu weka,+ kaha mwakalisavala navo musana weye.*+
12 Numba tuhu ove walingilanga vyumevi kupenge,+ oloze ami nangukalinga chuma kana musana weye,* kumeso avaIsalele vosena.’”
13 Jino Ndavichi ambile kuli Natane ngwenyi: “Ngunalingi shili kuli Yehova.”+ Ngocho Natane ambile kuli Ndavichi ngwenyi: “Yehova nakukonekela shili yove.*+ Kaweshi kufwako.+
14 Olozenyi mwana unaseme mwafwa, hakuwana nge unasawisa chikuma Yehova havyumevi unalingi.”
15 Kufumaho, Natane ayile kuzuvo yenyi.
Jino Yehova avetele mwanaNdavichi uze asemene napwevo lyaUliya, kaha aputukile kuviza.
16 Ngocho Ndavichi alembelelele Kalunga wamuchano mangana atetele uze mwana. Ndavichi alitwaminyine kulya vyakulya. Engililenga muzuvo yenyi, kaha asavalilenga hamavu naufuku.+
17 Vakulwane vakuzuvo yenyi vapandaminenga kuli ikiye, vesekelenga kumuhindula haze hamavu asavalilenga, oloze ikiye akanyinenga. Kaha kalilenga navo vyakulyako.
18 Kuheta halikumbi lyakusokesa 7, uze mwana afwile. Oloze vangamba jaNdavichi vevwile woma kumulweza ngwavo mwanenyi nafu. Vambile ngwavo: “Omu tunahanjikanga nenyi shimbu mwanenyi apwanga wamutonyi, katwivwililangako, kahaze natumulweza ngachilihi ngwetu mwanove nafu? Nahase kulinga chuma chimwe chachipi.”
19 Omu Ndavichi amwene vangamba jenyi vali nakuliyevetela, atachikijile ngwenyi mwanenyi nafu. Ngocho Ndavichi ehwile vangamba jenyi ngwenyi: “Uno mwanami nafu tahi?” Vakiko vamukumbulwile ngwavo: “Eyo, nafu.”
20 Jino Ndavichi ahindukile hamavu. Asanyine nakulikwita maji,+ avwalile uvwalo weka nakuya kuzuvo+ yaYehova, kaha akalifukwile. Kufumaho ayile kuzuvo* yenyi, alwezele vatu vamunehele vyakulya, kaha alile.
21 Vangamba jenyi vambile kuli ikiye ngwavo: “Ika unalingila chuma kana? Omu mwanove apwanga wamutonyi, walitwaminanga kulya vyakulya, kaha wapwanga nakulila lika. Oloze omu nafu mwanove, unahinduka nakulya vyakulya.”
22 Ikiye ambile ngwenyi: “Omu mwanami apwanga wamutonyi, ngwapwanga nakulila lika nakulitwamina kulya vyakulya,+ mwomwo ngwashinganyekanga ngwami, ‘Iyaze natachikiza numba nge Yehova mwangwivwila uselewa nakuhindula mwanami?’+
23 Oloze ikiye nafu lyehi, kaha ikaze nanguhonena kulya vyakulya? Kutala nanguhasa kumukindulwisa ayoye cheka nyi?+ Ami yami nangukamukavangiza,+ oloze ikiye keshi kuhasa kukinduluka kuli amiko.”+
24 Jino Ndavichi avendejekele pwevo lyenyi Mbate-sheva.+ Kufumaho, alisavalile nenyi. Kutwala muze, Mbate-sheva asemene mwana walunga, kaha vamulukile lijina ngwavo Solomone.*+ Yehova azangile chikuma Solomone.+
25 Ngocho atumine kapolofweto Natane+ amuluke lijina ngwenyi Yechichiya* mwomwo Yehova amuzangile.
26 Jino Yowave atwalileho lika kulwa jita nanganda yaLava+ yavaAmone,+ kaha atambwile eyi nganda yawangana.+
27 Ngocho Yowave atumine valuwa kuli Ndavichi. Ambile ngwenyi: “Ngunalu jita nanganda yaLava,+ kaha ngunatambula ngalila yameya.*
28 Shikaho, kungulula maswalale vanasale okwo wizenga mangana ulukuke nganda kana uyitambule. Nge chiku, ami yami nanguyitambula, kaha nayipwa mulijina lyami.”
29 Ngocho Ndavichi akungulwile maswalale vosena, ayile nakulwa jita nanganda yaLava, kaha ayitambwile.
30 Azulile muchama kumutwe waMalakame.* Muchama kana walemene talende* yaulu yimwe. Wapwile nawa namalolwa andando yayinene. Kaha vavwikile Ndavichi uze muchama kumutwe. Ndavichi ambachile nawa vyuma vyakupupa+ vyavivulu munganda kana.+
31 Ambachile nawa vatu vamunganda kana, avahanyine mulimo wakuzachisa malolwa akutetesa, navinoma vyafwelu vyakuvambuka, najingimbu jafwelu, namulimo wakufwatula tumenga. Omu mukiko alingile nakujinganda jeka javaAmone josena. Kufumaho, Ndavichi namaswalale vosena vakindulukile kuYelusalema.
Kwinyikila Chamwishi
^ Hepe., “kumeso alikumbi eli.”
^ Hepe., “kumeso alikumbi.”
^ Chipwe “nafumisako shili yove.”
^ Chipwe “kunganda.”
^ Kufuma kulizu lyachiHepeleu lyalumbununa “Kuunda.”
^ Ulumbunwiso, “Ou Vazanga Kuli Ya.”
^ Pamo kutalisa kuchihela kuze kwafuminenga meya amunganda.
^ Malakame apwile kaponya, kalunga kavaAmone. Muvisoneka vyeka vamuvuluka ngwavo Moleke chipwe Milikome.
^ Talende yimwe yapwile jikilongalamu 34.2. Tala Chihande B14.
