Samwele 2 13:1-39
13 Jino Avasalome mwanaNdavichi apwile nandumbwenyi wapwevo wamwaza chikuma. Lijina lyenyi apwile ikiye Tamale.+ Kaha Amanone+ mwanaNdavichi amuzangile chikuma.
2 Tamale apwile kanda achilisavaleho lyehi nalunga, ngocho chapwile chachikalu kuli Amanone kumuwana nakumulinga mumwe. Echi chahombesele chikuma Amanone, kaha avijile nakuviza.
3 Jino Amanone apwile nasepa lyenyi Yehonatave+ mwanaShimeya,+ Shimeya ndumbwaNdavichi. Yehonatave apwile lunga wakuzangama chikuma.
4 Ngocho ahulishile Amanone ngwenyi: “Ove mwanamwangana, ikaze uli nakuhombela ngana chimene hichimene? Ngulweze vyuma vili nakukuyanjisa.” Amanone amukumbulwile ngwenyi: “Ngunazange chikuma Tamale songo+ yandumbwami Avasalome.”
5 Yehonatave ambile kuli ikiye ngwenyi: “Ove savala hakahela kove ulyonge kuviza. Kahomu mweza iso nakukumenekela, umulweze ngwove, ‘Lweza ndumbwami Tamale ezenga mangana anguhaneko vyakulya. Kachi nge mweza kumeso ami nakunguwahishilako vyakulya vize atela kulya muveji, kaha nangulya.’”
6 Ngocho Amanone asavalile nakulyonga kuviza, kaha mwangana ejile nakumumenekela. Jino Amanone ambile kuli mwangana ngwenyi: “Lweza ndumbwami Tamale ezenga kuno angwocheleko jimbolo jivali mangana ngulyenga.”
7 Shikaho Ndavichi atumine mazu kuli Tamale kuzuvo apwile ngwenyi: “Yakonga kuzuvo yandumbwove Amanone ukamuwahishileko vyakulya.”
8 Tamale ayile kuzuvo kuze asavalile ndumbwenyi Amanone. Ambachile unga, auchikile nakuumbila jimbolo kumeso aAmanone, kaha ajikangile.
9 Kufumaho ambachile jize jimbolo japwile hachikango, amuhanyine alyenga. Oloze Amanone akanyine kujilya, ambile ngwenyi: “Lweza vatu vosena valovoke!” Ngocho vatu vosena valovokele.
10 Jino Amanone ambile kuli Tamale ngwenyi: “Ngunehele ovyo vyakulya kuno kukapete kakusavala mangana ngulyenga.” Ngocho Tamale ambachile jize jimbolo akangile, ajitwalile kuli ndumbwenyi Amanone kuze kukapete asavalile.
11 Omu amutwalilile jize jimbolo mangana alyenga, amukwachile nakumwamba ngwenyi: “Ove ndumbwami, tulisavale.”
12 Oloze Tamale ambile kuli ikiye ngwenyi: “Chiku ove ndumbwami, kanda naungusawisako. Chuma uli nakusaka kulinga chapwa chijila muIsalele.+ Kanda naulinga chuma chasonyi nganako.+
13 Sonyi kana nayikangufuma ngachilihi? Ove nawa navakumonanga kupwa uchileya muno muIsalele. Ove hanjika kaha namwangana, mwomwo keshi kuhasa kukana kunguhana kuli oveko.”
14 Oloze ikiye kamwivwililileko, kaha amupikile nakumusawisa.
15 Kufumaho Amanone ahungile chikuma Tamale. Amuhungile chikuma kuhambakana namuze amuzangile. Ngocho Amanone ambile kuli ikiye ngwenyi: “Katuka uyenga!”
16 Oloze Tamale amwambile ngwenyi: “Chiku, ove ndumbwami, mwomwo kunguhanga oholyapwa nachipihya chikuma kuhambakana nachuma unalingi kuli ami.” Oloze ikiye kamwivwililileko.
17 Ngocho Amanone asanyikile muka-kumukafwa wamukweze, amulwezele ngwenyi: “Fumisa ou pwevo kumeso ami, kaha upata kuchikolo nge unamulovola.”
18 (Jino Tamale avwalile chikuto chakulipwila,* mwomwo vana vamwangana vaze vapwile kanda valisavaleho lyehi namalunga vavwalilenga vikuto kana.) Ngocho uze muka-kukafwa Amanone alowele Tamale haweluka, kaha apachile kuchikolo.
19 Kufumaho Tamale alikwichile uto kumutwe,+ kaha apulile chize chikuto chamwaza avwalile. Alikwachile mbimbya-mutwe, ayilenga oku ali nakulila.
20 Jino ndumbwenyi Avasalome+ amwihwile ngwenyi: “Uno ndumbwove Amanone ikiye nakupiki tahi? Oloze ove ndumbwami, kanda nawambululako, mwomwo Amanone hindumbwove.+ Kanda naushinganyeka chikuma hachuma kanako.” Ngocho Tamale atwaminenga kwauka wenyi kuzuvo yandumbwenyi Avasalome.
21 Jino Mwangana Ndavichi apihililile chikuma+ omu evwile vyuma vyasolokele. Oloze kasakile kulinga chuma chize nachivwisa mwanenyi Amanone kupihyako, mwomwo amuzangile chikuma hakupwa mwanenyi watwatwa.
22 Avasalome nawa kahanjikile chuma chachipi chipwe chamwaza kuli Amanoneko mwomwo ahungile+ Amanone hakuwana nge asawile ndumbwenyi Tamale.+
23 Omu mwahichile myaka yivali yamuundu, likumbi limwe vatu jaAvasalome vapwile nakuteula mikoko kuMbale-hazole kwakamwihi naEfwalime.+ Ngocho Avasalome asanyikile vana vamwangana vamalunga vosena vapwengako.+
24 Ejile kuli mwangana, amulwezele ngwenyi: “Ami ngamba yove nguli nakuteula mikoko jami. Ngocho nguneza nakukulanya ove mwangana navangamba jove mangana tuyenga hamwe.”
25 Oloze mwangana ambile kuli Avasalome ngwenyi: “Nduma, ove mwanami. Kachi nge tuvosena natuya, kaha natupwa hichiteli kuli ove.” Numba tuhu amushinjililenga lika, oloze mwangana akanyine. Chipwe ngocho, amukiswile.
26 Kutwala muze, Avasalome ambile kuli mwangana ngwenyi: “Kachi nge ove kaweshi kuyako, kahanyi lweza ndumbwami Amanone tuyenga hamwe.”+ Mwangana amwihwile ngwenyi: “Ika uli nakusakila kuya nenyi?”
27 Oloze Avasalome amushinjilile lika, ngocho mwangana asuwile Amanone navana vamwangana vamalunga vosena vayenga nenyi.
28 Jino Avasalome alwezele vaka-kumukafwa ngwenyi: “Nyingililenu! Omu Amanone mwapenda, nangumilweza ngwami, ‘Mujihenu!’ Kaha mwatela kumujiha. Kanda namwivwa womako, mwomwo ami yami ngunamitumu. Jikizenu nakumika.”
29 Shikaho vaze vaka-kukafwa Avasalome vajihile Amanone nge muze avalwezele Avasalome. Kaha vana vamwangana vamalunga vosena vanyinyine mutu himutu hachimbulu chenyi nakuchina.
30 Omu vapwile mujila, mujimbu wahetele kuli Ndavichi ngwavo: “Avasalome najihi vana vayove mwangana vamalunga vosena. Naumwe nayovoka wauchi.”
31 Ngocho mwangana akatukile, apulile uvwalo wenyi, kaha asavalile hamavu. Vangamba jenyi vosena navakiko vapulile uvwalo wavo, vemanyine kuli ikiye.
32 Jino Yehonatave+ mwanaShimeya,+ Shimeya ndumbwaNdavichi ambile ngwenyi: “Ove mwata wami, kanda naushinganyeka ngwove vana vove vavakweze vosena vanavajihiko. Amanone kaha ikiye vanajihi.+ Avasalome ikiye nalingi chuma kana mwomwo najinyinga kulinga ngocho+ kufuma vene halikumbi lize Amanone asawishile ndumbwenyi+ Tamale.+
33 Shikaho ove mwata wami mwangana, kanda nawivwilila* mujimbu wakwamba ngwavo, ‘Vana vayove mwangana vamalunga vosena vanafuko.’ Amanone kaha ikiye nafu.”
34 Jino Avasalome achinyine.+ Kutwala muze, muka-kulama nganda andwile meso enyi nakutala kunyima, kaha amwene vatu vavavulu vali nakwijilila kujila yize yahichile kupili.
35 Yehonatave+ alwezele mwangana ngwenyi: “Tala! Vana vayove mwangana vanakinduluka, nge omu ngwambanga ami ngamba yove.”
36 Omu akumishile kuhanjika mazu awa, vana vamwangana vahetele oku vali nakulila namazu akukanguka. Mwangana navangamba jenyi vosena navakiko valilile chikuma.
37 Avasalome achinyinyine kuli Talamai+ mwanaAmihute, mwangana waNgeshule. Ndavichi alishonene kufwa chamwanenyi hamakumbi amavulu.
38 Omu Avasalome achinyinyine kuNgeshule,+ akatwamine kuze myaka yitatu.
39 Kutwala muze, Mwangana Ndavichi afwililile kuya akamone Avasalome, mwomwo ushona wakufwa chamwanenyi Amanone wakumine.
