Samwele 2 14:1-33
14 Jino Yowave mwanaZeluwiya+ atachikijile ngwenyi mwangana ali nakufwila kumona Avasalome.+
2 Ngocho Yowave atumine vatu kuTekowa+ vakasake pwevo umwe wakuzangama. Kaha alwezele uze pwevo ngwenyi: “Lyonge nge uli nakulishona. Vwala nge mutu uze ali nakulishona, kaha kanda naulikwita majiko.+ Lisolole nge pwevo uze afwisa uze nalishononga halwola lwalusuku.
3 Kaha yako kuli mwangana ukamulweze mazu awa.” Ngocho Yowave alwezele uze pwevo mazu akukahanjika.
4 Uze pwevo wakuTekowa ayile kuli mwangana. Omu ahetele kuze, afukamine chameso hamavu nakulifukula. Ambile ngwenyi: “Ove mwangana, ngukafweko.”
5 Mwangana amwihwile ngwenyi: “Ukalu muka uli nawo?” Ikiye ambile ngwenyi: “Ami ngutuliwe, lunga lyami afwa.
6 Ami ngamba yove ngwapwile navana vamalunga vavali. Vana kana valizungishile muchipapa, kaha kakwapwile mutu wakuvakandununako. Ngocho umwe avetele mukwavo nakumujiha.
7 Jino tanga yosena yinangufumbukila ami ngamba yove. Vali nakwamba ngwavo, ‘Tuhane uze ajihile ndumbwenyi mangana naikiye tumujihe, mwomwo ajihile mukwavo.+ Mutu kana numba apwa swana kuvanga natumujiha.’ Kachi nge vatu kana navajiha mwanami umwe kaha uze nasaleho, kaha nachipwa nge vanajimi likala lize lili nakakahya. Ngocho lijina lyalunga lyami nalijimbangana, kaha nawa hano hamavu kaheshi kusala mwanenyi numba umweko.”
8 Ngocho mwangana ambile kuli uze pwevo ngwenyi: “Yakonga kuzuvo yove, ami nangutala hachihande kana.”
9 Kaha uze pwevo wakuTekowa ambile kuli mwangana ngwenyi: “Ove mwata wami mwangana, mulonga upwenga hali ami navaze vakuzuvo yatata, oloze ove mwangana navaze vakuwangana wove kanda namupwa namulongako.”
10 Jino mwangana ambile ngwenyi: “Kachi nge nakupwa mutu umwe mwakuhanjikisa cheka, munehe kuno kuli ami, kaha keshi kukakuyanjisa chekako.”
11 Oloze ikiye ambile ngwenyi: “Ove mwangana, sanyika* Yehova Kalunga kove mangana muka-kulinga sambanjinga+ azeneke kujiha mwanami nakumunongesa.” Kaha mwangana ambile ngwenyi: “Omu ayoya Yehova tu,+ numba lukambu lumwe lwakumutwe wamwanove kalweshi kuholokela hamavuko.”
12 Uze pwevo ambile ngwenyi: “Achingwitavise ami ngamba yove nguhanjike mazu amwe kuli ove mwata wami mwangana.” Kaha mwangana amwambile ngwenyi: “Hanjika.”
13 Uze pwevo ambile ngwenyi: “Ikaze unashinganyekela kulinga chuma chakufwana ngana kuli vatu jaKalunga?+ Ove mwangana unafu namulonga hakuhanjika vyumevi, mwomwo unakane kukindulwisa mwanove uze wahanga.+
14 Tuvosena natukafwa nakupwa nge meya aze vanamwangila hamavu, aze navahona kukungulula. Kalunga keshi kujiha mutuko,* oloze eji kushinganyekanga mwakulingila mangana uze vanahange akinduluke.
15 Nguneza nakuhanjika mazu awa kuli ove mwata wami mwangana, mwomwo vatu vanangwivwisa woma. Shikaho ami ngamba yove ngwashinganyekanga ngwami, ‘Mana nguhanjike namwangana, pamo mwalinga nganomu nangumulomba ami ndungo yenyi.
16 Mwangana nahase kungwivwilila nakupululula ami ndungo yenyi mulivoko lyamutu uze ali nakusaka kungunongesa ami namwanami mangana tuseze uswana wetu atuhana Kalunga.’+
17 Kahami ngamba yove ngwalyambanga nawa ngwami, ‘Mazu mwahanjika mwata wami mwangana nawanguvendejeka.’ Mwomwo ove mwata wami mwangana unapu nge ukangelo kaKalunga wamuchano uze atachikiza kuhandununa vyuma vyamwaza navyevi vyavipi. Yehova Kalunga kove apwenganga nayove.”
18 Jino mwangana ambile kuli uze pwevo ngwenyi: “Kanda naunguswekela chuma numba chimwe havyumevi nangukuhulisako.” Kaha uze pwevo ambile ngwenyi: “Hanjika, ove mwata wami mwangana.”
19 Ngocho mwangana amuhulishile ngwenyi: “Uno Yowave ikiye nakutumu uhanjike vyuma kanevi kuli ami tahi?”+ Uze pwevo amukumbulwile ngwenyi: “Omu wayoya tu,* ove mwata wami mwangana, omu unahanjika mukiko vene. Ngamba yove Yowave ikiye nangutumu, ikiye nawa nangulweze mazu osenawa ngunahanjika ami ngamba yove.
20 Ngamba yove Yowave nalingi chuma kanechi mangana ove ulingeho mumwe hachihande kanechi. Oloze ove mwata wami ukwechi mangana kwijiva nge kangelo kaKalunga wamuchano, kaha unatachikiza vyuma vyosena vili nakulingiwa mulifuchi.”
21 Kufumaho mwangana ambile kuli Yowave ngwenyi: “Chamwaza, nangulinga chuma kana.+ Yakonga ukasake mukweze Avasalome.”+
22 Hahaze vene, Yowave afukamine chameso hamavu, alifukwile nakwalisa mwangana. Ambile ngwenyi: “Ove mwata wami mwangana, likumbi lyalelo ami ngamba yove ngunatachikiza ngwami unangwivwila uselewa, mwomwo unalingi nganomu ngunakulombo ami ngamba yove.”
23 Kufumaho, Yowave akatukile, ayile kuNgeshule,+ akasakile Avasalome nakumuneha kuYelusalema.
24 Oloze mwangana ambile ngwenyi: “Mulweze akinduluke kuzuvo yenyi, kanda mweza kuno kuli amiko.” Ngocho Avasalome akindulukile kuzuvo yenyi, kayile nakumona mwanganako.
25 Jino muIsalele mwosena kamwapwile lunga valishilenga hakuwaha chenyi ngana mwaAvasalomeko. Avasalome kapwile nakatengako kufuma kuvilyachilo swi nakumutwe.
26 Omu Avasalome atewilenga kumutwe wenyi, jikambu jenyi jalemenenga jishekele 200* kweseka nakulema chalilolwa lyawangana.* (Ajitewilenga kamwe kusongo yamwaka himwaka mwomwo jamulemenenenga chikuma.)
27 Avasalome asemene vana vamalunga+ vatatu namwana wapwevo umwe. Ou mwanenyi wapwevo apwile ikiye Tamale, kaha apwile pwevo wamwaza chikuma.
28 Avasalome atwamine muYelusalema myaka yivali yamuundu, oloze kayilenga nakumona mwanganako.+
29 Shikaho, Avasalome asanyikile Yowave mangana amutume kuli mwangana, oloze Yowave kejileko. Avasalome atumine cheka vatu vakasake Yowave, oloze chochimwe lika akanyine.
30 Kutwala muze, Avasalome ambile kuli vangamba jenyi ngwenyi: “Wande waYowave walipula ngiza nawande wami, kaha muwande wenyi muli mbale. Yenunga mukoche wande wenyi.” Ngocho vangamba jaAvasalome vayile nakwocha uze wande waYowave.
31 Jino Yowave akatukile, ayile kuzuvo yaAvasalome, kaha amwihwile ngwenyi: “Mwomwo ika vangamba jove vanochela wande wami?”
32 Avasalome akumbulwile Yowave ngwenyi: “Tala! Ami ngwatumanga mazu kuli ove ngwami, ‘Twaya kuno ngukutume kuli mwangana ukamulweze ngwove: “Ngwejilile ika kufuma kuNgeshule?+ Kahanyi chawahile ami kutwama kuze. Shikaho, ngwitavise ngwizenga nakukumona ove mwangana. Kachi nge nguli namulonga, kaha ngujihe.”’”
33 Ngocho Yowave ayile kuli mwangana, kaha akamuhichililemo mujimbu wosena. Kufumaho mwangana asanyikile Avasalome. Avasalome ayile, afukamine chameso hamavu nakulifukula kuli mwangana. Kaha mwangana asweswenyele Avasalome.+
Kwinyikila Chamwishi
^ Hepe., “anuka.”
^ Chipwe “mwonoko.”
^ Chipwe “Omu wayoya mwono wove tu.”
^ Kafwe jikilongalamu 2.3. Tala Chihande B14.
^ Pamo chapwile chipimo chakunganda chipwe shekele “yawangana” yize yalihandunwine nashekele yavatu vamuchivulu.
