Samwele 2 16:1-23
16 Omu Ndavichi ahambakanyine chindende haze hachihela chakulunduka,+ awanyine Jiva+ muka-kukafwa Mefwivoshete+ ali nakumuvandamina. Apwile navimbulu vavali vaze vambachile jimbolo 200, navindanda 100 vyamihako yamivinyo yaumu, navindanda 100 vyamihako yahangonde yanonga,* namulondo wavinyo waunene.+
2 Ngocho mwangana ehwile Jiva ngwenyi: “Evi vyuma unanehe vyaka?” Jiva amukumbulwile ngwenyi: “Ava vimbulu ngunavanehela vaze vakuzuvo yamwangana mangana vatambukileho. Kaha ngunanehe nawa eji jimbolo navindanda vyamihako yahangonde yanonga mangana vakweze valyenga. Evi vinyo nawa ngunavinehe mangana vaze navazeya mupambo vanwenga.”+
3 Jino mwangana amwihwile ngwenyi: “Nyi mwanamwata wove* ali kulihi?”+ Jiva ambile kuli mwangana ngwenyi: “Ali kuYelusalema, mwomwo ambanga ngwenyi, ‘Likumbi lyalelo, vaze vakuzuvo yaIsalele navanguhilwishila wangana watata.’”+
4 Ngocho mwangana ambile kuli Jiva ngwenyi: “Tala! Vyuma vyaMefwivoshete vyosena vinapu jino vyove.”+ Jiva ambile ngwenyi: “Ngunalifukula kuli ove. Ove mwata wami mwangana, ngwivwile uselewa.”+
5 Omu Mwangana Ndavichi ahetele kuMbahulime, lunga umwe wakutanga yaSaulu apwile nakwiza kuli ikiye oku ali nakumwangula.+ Lunga kana apwile ikiye Shimei+ mwanaNgela.
6 Shimei apwile nakwasa malolwa Mwangana Ndavichi, navangamba jenyi vosena, navatu vosena, navindume vosena vaze vapwile kulivoko lyaNdavichi lyachilyo nalyeli lyachimoswe.
7 Omu Shimei apwile nakwangula mwangana, ambile ngwenyi: “Ove muka-kumwanga manyinga, ove mutu wamokomoko, yakwokwo, yakwokwo!
8 Yehova nakushishishilamo hakumwanga manyinga avosena vaze vakuzuvo yaSaulu uze unashishi hawangana. Kaha Yehova nahane jino wangana kuli mwanove Avasalome. Tala, luyando lunakuwane mwomwo yamanyinga unamwangenga.”+
9 Jino Avishai mwanaZeluwiya+ ambile kuli mwangana ngwenyi: “Ou kawa wakufwa+ lyehi mwangula ngachilihi mwangana ngana?+ Ngwitavise nguyenga ngumutete mutwe.”+
10 Oloze mwangana ambile ngwenyi: “Enu vana vaZeluwiya,+ vyuma muka vinamiwane? Mwechenu angwangule tuhu,+ mwomwo Yehova ikiye namulweze ngwenyi,+ ‘Angula Ndavichi.’ Shikaho iya ali nalisesa lyakumwamba ngwenyi, ‘Ika uli nakulingila chuma kana?’”
11 Ndavichi ambile kuli Avishai nakuli vangamba jenyi vosena ngwenyi: “Kachi nge mwanami wakulisemena ali nakusaka kungujiha,+ nyi ngachilihi ou kaMbenjamine?+ Mwechenu angwangule tuhu, mwomwo Yehova ikiye namulweze kulingamo.
12 Pamo Yehova mwamona vihuli vyami,+ kaha nawa Yehova mwangulingila vyuma vyamwaza, kuhambakana omu ali nakungwangula ou mutu likumbi lyalelo.”+
13 Kufumaho, Ndavichi navatu jenyi vatwalileho lika nakuya mujila, kaha Shimei apwile nakuvakavangiza. Apwile nakuhichila kukulo yapili oku ali nakuvangula,+ nakuvasa malolwa, nakuvakuva mavu.
14 Kutwala muze, mwangana navatu jenyi vosena vahetele kuchihela vapwile nakuya. Vazeyele chikuma, ngocho vanokele.
15 Jino Avasalome namalunga vavaIsalele vosena vahetele muYelusalema. Ahitofwele+ naikiye apwile navo hamwe.
16 Omu sepa lyaNdavichi Hushai+ kaAlake+ ahetele kuli Avasalome, ambile kuli Avasalome ngwenyi: “Ove mwangana, yoyanga lika!+ Ove mwangana, yoyanga lika!”
17 Jino Avasalome ambile kuli Hushai ngwenyi: “Uno zangi yakwilila unasolwelanga sepa lyove yinayi kulihi? Ika unachinyi kuya nasepa lyove?”
18 Oloze Hushai ambile kuli Avasalome ngwenyi: “Kangweshi kuhasa kulinga ngochoko. Ami nguli nakukundwiza ove vanasakula kuli Yehova, nakuli vatu ava, nakuli malunga vavaIsalele vosena. Nangutwama nayove.
19 Nangwamba cheka ngwami, Uno iya ngwatela kuzachila? Keshi ove mwanenyiko numba? Nangukuzachilanga nganomu ngunazachilanga iso.”+
20 Kutwala muze, Avasalome ambile kuli Ahitofwele ngwenyi: “Ngulwezeko mwakulingila.*+ Natulinga ngachilihi?”
21 Ahitofwele ambile kuli Avasalome ngwenyi: “Lisavale natulumbu twamasano+ twaiso vaze naseze valame zuvo.*+ Omu vaIsalele vosena navevwa chumechi naulinga chakusaula iso, kaha vaze vali nakukukundwiza navakwata ngolo.”
22 Ngocho Avasalome vamulemenene mbalaka helu lyazuvo,+ kaha alisavalile natulumbu twamasano twaise+ kumeso avaIsalele vosena.+
23 Hamakumbi aze, vyuma vyosena ahanjikilenga Ahitofwele+ vavimwenenga kupwa nge himazu akufuma kuli* Kalunga wamuchano. Omu mukiko Ndavichi naAvasalome vamwenenga vyuma vyosena ahanjikilenga Ahitofwele.
Kwinyikila Chamwishi
^ Chikumanyi jikuyu, chipwe pamo mihako yamukoma.
^ Chipwe “Nyi muzukulu lyamwata wove.”
^ Chipwe “mangana.”
^ Chipwe “nganda.”
^ Chipwe “kupwa nge himazu amutu uze nehula.”
