Samwele 2 17:1-29
17 Ahitofwele ambile kuli Avasalome ngwenyi: “Ngwitavise ngusakule malunga 12,000 mangana nguyenga navo nakuhangasana Ndavichi lelo naufuku.
2 Nangumulukuka halwola luze nazeye, luze nazeneka ngolo.*+ Nangumwivwisa woma, kaha vatu vosena vaze ali navo navachina, ngocho nangujiha ikiye kaha.+
3 Kufumaho nangukindulwisa vatu vosena kuli ove. Kachi nge nangujiha ou lunga uli nakutondatonda, kaha vatu vosena navakinduluka nakutwama jino mukuunda.”
4 Avasalome navakulwane vavaIsalele vosena vetavilile vyumevi ahanjikile Ahitofwele.
5 Oloze Avasalome ambile ngwenyi: “Sanyikenu Hushai+ kaAlake mangana twivwenga vyuma mwahanjika naikiye.”
6 Ngocho Hushai ejile kuli Avasalome. Kaha Avasalome ambile kuli ikiye ngwenyi: “Evi vikiko vyuma natulweze Ahitofwele. Uno tulinge nganomu natulweze tahi? Nge chiku, kaha tulweze vyuma twatela kulinga.”
7 Kaha Hushai ambile kuli Avasalome ngwenyi: “Vyuma namilweze Ahitofwele lelo kavyawahileko.”+
8 Hushai ambile cheka ngwenyi: “Ove unatachikiza ngwove iso navatu jenyi vapwa vindume,+ kaha oholyapwa vanatenuka kwijiva nge ulusu uze najimbalisa vana venyi muchipapa.+ Iso nawa apwa muka-kulwa jita,+ kaha keshi kuhasa kusavala hamwe navatuko.
9 Oholyapwa naswame kuwina wakusendeveka* chipwe kuchihela cheka.+ Kachi nge ikiye mwavangila kumilukuka, kaha mujimbu nautanda ngwavo, ‘Vatu jaAvasalome vanavafungulula!’
10 Ngocho navingazule vaze vakwechi michima nge yavandumba+ navalizuzukila nawoma. Mwomwo vaIsalele vosena vatachikiza ngwavo iso apwa chindume,+ kaha vatu jenyi nawa vapwa vingazule.
11 Ami nangukulweza ngwami: Kungulula vaIsalele vosena kufuma kuNdane swi nakuMbele-sheva.+ Vavule chikuma nge usekeseke wakungenge yakalungalwiji.+ Kaha ove uvatwaminyine kujita.
12 Natumulukuka kweshokwo natumuwana. Natumulukuka kwijiva nge muze lyume lyeji kuholokelanga hamavu. Natumunongesela kumwe navatu jenyi vosena, kaha naumwe mwayovoka wauchi.
13 Kachi nge mwachinyina munganda yimwe, kaha natuya navaIsalele vosena nakunongesa nganda kana. Natuyikasa mikole nakuyikokela muchinema, kaha kakweshi kusala lilolwa numba limweko.”
14 Ngocho Avasalome navaIsalele vosena vambile ngwavo: “Vyuma natulweze Hushai kaAlake vinawahe+ kuhambakana vize natulweze Ahitofwele!” Oloze Yehova afwililile kuluwanganyisa vyuma vyamwenemwene avalwezele Ahitofwele+ mangana Yehova amwenese Avasalome lupi.+
15 Kufumaho, Hushai alwezele kapilishitu Zatoke nakapilishitu Aviyatale+ ngwenyi: “Evi vikiko Ahitofwele nalweze Avasalome navakulwane vavaIsalele. Kahevi vikiko ngunavalweze ami nawa.
16 Shikaho, tumenu washi mazu kuli Ndavichi mumulweze ngwenu, ‘Kanda nautwama kuvyau* vize vili kwakamwihi napambo ufuku waleloko. Oloze zauka musali, mokomoko ove mwangana navatu jove vosena navaminongesa.’”*+
17 Yonatane+ naAhimaze+ vatwaminenga kuEne-longele+ mwomwo kavasakile vatu vavamone navengila mungandako. Ngocho ngamba umwe wapwevo ayile nakuvalweza mujimbu wosena, kaha Yonatane naAhimaze vakatukile mangana vakalweze Mwangana Ndavichi mujimbu kana.
18 Oloze kwapwile mukweze umwe avamwene, kaha ayile nakulweza Avasalome. Ngocho Yonatane naAhimaze vachinyine, vakahetele kuMbahulime+ kuzuvo yalunga umwe uze apwile nalishima hembo lyenyi. Kaha vaswamine muze mulishima.
19 Jino pwevo lyauze lunga afwikile kukanwa kalize lishima, kaha helu amwangililileho manona akusohola. Naumwe atachikijile ngwenyi vanaswame muze mulishima wauchi.
20 Vangamba jaAvasalome vejile kuzuvo yauze pwevo, vamwihwile ngwavo: “Ahimaze naYonatane vali kulihi?” Uze pwevo akumbulwile ngwenyi: “Vahitangomu, vanatalikisa kukalwiji.”+ Vaze malunga vatondeletondele Ahimaze naYonatane, oloze kavavawanyineko. Ngocho vakindulukile kuYelusalema.
21 Omu valingile vaze malunga vanayi, Ahimaze naYonatane vafumine muze mulishima vaswamine, vayile nakulweza Mwangana Ndavichi mujimbu wosena. Vamulwezele ngwavo: “Katuka, zauka kalwiji washiwashi, mwomwo Ahitofwele najinyi kwiza nakukulukuka.”+
22 Hahaze vene, Ndavichi navatu vosena vaze apwile navo vakatukile, vazaukile Yotau. Naumwe asalileho wauchi, vosena vazaukile Yotau shimbu kanda likumbi litutuke.
23 Omu Ahitofwele amwene ngwenyi vatu kavalingile nganomu avalwezangako, alemene chimbulu chenyi nakuya kwimbo lyenyi.+ Kahomu akumishile kushika vaze vakuzuvo yenyi,+ alisukikile.+ Ngocho afwile, kaha vamufunjile hafuka yavakakuluka jenyi.
24 Jino Ndavichi ayile kuMahanaime,+ kaha Avasalome namalunga vavaIsalele vosena vaze apwile navo vazaukile Yotau.
25 Avasalome atongwele Amasa+ kupwa kapitau kamaswalale mangana ashise Yowave.+ Amasa apwile mwanakaIsalele Ichila uze alisavalile naAvingayile+ mwanaNahashe, Avingayile ndumbwaZeluwiya, Zeluwiya naye yaYowave.
26 VaIsalele naAvasalome vatungile chilombo chavo mungalila yaNgileyate.+
27 Omu Ndavichi ahetele kuMahanaime, Shovi mwanaNahashe wakuLava+ yavaAmone, naMakile+ mwanaAmiyele wakuLo-ndevale, naMbalajilai+ wakuNgileyate kuLongelime
28 vanehele tuhela, najimbashiya, najindeho jaunonga, natiliku, nambale, naunga, namanona akwocha, namakunde amanene, namakunde eka, namanona akuma,
29 nauchi, namateka, namikoko, namaji akeju.* Vanehele vyuma vyosenevi kuli Ndavichi navatu jenyi mangana valyenga,+ mwomwo vambile ngwavo: “Vatu vanafu zala nalipwila, kaha vanazeye mupambo.”+
Kwinyikila Chamwishi
^ Chipwe “luze nalingi mavoko enyi mbwambwala.”
^ Chipwe “naswame muchinema.”
^ Hepe., “navamimina.”
^ Chipwe pamo, “kulikundu.”
^ Hepe., “namavele angombe akulikonda.”
