Samwele 2 18:1-33
18 Jino Ndavichi alavile malunga vaze apwile navo, kaha avatongwelele tupitau twamakombakaji natupitau twamakulukaji.+
2 Ndavichi apangile malunga kana mumazavu atatu. Lizavu limwe valitwaminyinyine kuli* Yowave,+ lizavu likwavo valitwaminyinyine kuli ndumbwaYowave Avishai+ mwanaZeluwiya,+ kaha lizavu likwavo valitwaminyinyine kuli Itai+ wakuNgata. Kufumaho mwangana ambile kuli vaze malunga ngwenyi: “Nayami nawa nanguya nayenu.”
3 Oloze vakiko vamwambile ngwavo: “Kanda nauya nayetuko.+ Mwomwo nge etu natuchina, kaveshi kutuhaka manganako. Kaha nawa nge chimbwa chayetu nachifwa, chochimwe kaveshi kutuhaka manganako, mwomwo ove uwamulemu chikuma kuhambakana vatu 10,000 vaze vali hali etu.+ Ngocho nachiwaha kachi nge nausala muno munganda mwomwo nautukafwa lika.”
4 Shikaho mwangana ambile ngwenyi: “Nangulinga mweshomwo munamono ngwenu mwamwaza.” Kaha mwangana emanyine kwakamwihi nachikolo changanda. Vaze malunga vosena valovokele mumazavu amakulukaji namazavu amakombakaji.
5 Jino mwangana alwezele Yowave, naAvishai, naItai ngwenyi: “Kamutetelenu mukweze Avasalome mwomwo yayami.”+ Malunga vosena vevwileko omu mwangana ashikile tupitau mazu awa kutalisa kuli Avasalome.
6 Vaze malunga vayile muchipapa vakalihumangane navaIsalele. Kaha vakazungilile jita mumusenge waEfwalime.+
7 VaIsalele+ vavafungulwile kuli vangamba jaNdavichi,+ kaha kwafwile vatu vavavulu vakuheta ku 20,000 halikumbi lize.
8 Jita yatanjile mungalila mwosena. Vatu vaze vafwile kuvyuma vyeka mumusenge halikumbi lize vavulile chikuma kuhambakana vaze vafwile kujipoko jamikwale.
9 Kutwala muze, Avasalome alitalasanyine navangamba jaNdavichi. Apwile nakutambukila hachimbulu chenyi. Omu avamwene, achinyine nachimbulu chenyi, kaha uze chimbulu ahichile mwishi yamutondo waunene uze wapwile namitango yakulijika. Ngocho mutwe waAvasalome waliswikile kuze kumitango, kaha apwile nakunyengela halengelenge.* Oloze uze chimbulu atwalileho lika kuya.
10 Jino kwapwile lunga umwe uze amumwene, kaha ayile nakulweza Yowave+ ngwenyi: “Ngunamono Avasalome ali nakunyengela kumutondo waunene.”
11 Yowave ambile kuli uze lunga ngwenyi: “Kachi nge wamumonanga, kaha ika wachinanga kumujiha hahaze vene? Nge wamujihanga, kachi ngunakuhane jimbongo japalata 10 namuhya.”
12 Oloze uze lunga ambile kuli Yowave ngwenyi: “Numba vene nge vanguhananga* jimbongo japalata 1,000, kachi kangwolwele livoko lyami nakujiha mwanamwanganako. Mwomwo twevwanga omu mwangana akushikanga ove, naAvishai, naItai ngwenyi, ‘Zangamenu, mukweze Avasalome+ kanda namukamulemekako.’
13 Kachi nge ngwalikanganga kumazu amwangana nakujiha Avasalome, kachi mwangana nevu mujimbu kana. Kahove nawa kachi kawanguhakwilileko.”
14 Yowave ambile ngwenyi: “Nguli nakwenyeka kaha lwola hakuhanjika nayove.” Ngocho ambachile myumba* yitatu mulivoko lyenyi, akayituvile Avasalome hamuchima shimbu apwile wamutonyi kuze kumutondo waunene asukamine.
15 Kaha vatu 10 vaze vambachililenga Yowave vitwa vejile, vamumanuswile Avasalome.+
16 Kufumaho, Yowave embile luneta, kaha vaze malunga valitwaminyine kuhangasana vaIsalele. Ngocho Yowave avakanyishile kulwa jita.
17 Jino vambachile mujimba waAvasalome, vaumbilile muwina waunene muze mumusenge, kaha haze hawina valumbikileho mulumba waunene wamalolwa.+ VaIsalele vosena vachinyinyine kumembo avo.
18 Omu Avasalome apwile kanda achifwe, ambachile lilolwa nakulimika muChinema* chaMwangana,+ mwomwo ambile ngwenyi: “Ami kangweshi namwana walunga uze mwakaswana lijina lyami mangana vakalyanukengako.”+ Ngocho lize lilolwa alilukile lijina lyenyi, kaha valivuluka ngwavo Lilolwa lyaAvasalome Lyakumwanukilaho palanga nakulelo lino.
19 Jino Ahimaze+ mwanaZatoke ambile ngwenyi: “Ngwitavisenu ngulahile kuli mwangana mangana ngukamulweze mujimbu, mwomwo Yehova nalingi mwachiyulo hakumusokola kuli vaka-kole jenyi.”+
20 Oloze Yowave ambile kuli ikiye ngwenyi: “Kanda nauya nakwambulula mujimbu likumbi lyaleloko. Ukaye likumbi lyeka, keshi leloko, mwomwo mwanamwangana wakulisemena nafu.”+
21 Jino Yowave ambile kuli kaKushe+ umwe ngwenyi: “Yako ukambulile mwangana vyuma unamono.” Ngocho uze kaKushe alifukwile kuli Yowave, kaha ayile jimbushi.
22 Ahimaze mwanaZatoke ambile cheka kuli Yowave ngwenyi: “Mweshomwo nachipwa chipwenga tuhu. Ngwitavise ngulahe mangana ngumukavangize uze kaKushe.” Oloze Yowave ambile ngwenyi: “Ove mwanami, naulishinyina ikaze kulaha okunyi kakweshi mujimbu nauya nakwambululako?”
23 Oloze ikiye ambile cheka ngwenyi: “Mweshomwo nachipwa chipwenga tuhu. Ngwitavise nguyenga jimbushi.” Ngocho Yowave amwambile ngwenyi: “Yakonga.” Ahimaze ayile jimbushi mujila yize yahichile mungalila yaYotau,* kaha ahambakanyine uze kaKushe.
24 Jino Ndavichi atwamine mukachi kavikolo vyanganda vivali,+ kaha muka-kulama+ nawa anyinyine helu lyakembwe kuchikolo. Omu uze muka-kulama andwile meso, amwene mutu ali nakwiza jimbushi.
25 Ngocho uze muka-kulama atambakanyine mwangana nakumulweza vyamutu kana. Mwangana ambile ngwenyi: “Kachi nge ali nakwiza uka wenyi, kaha ali nakwiza nakwambulula mujimbu umwe.” Omu uze mutu apandamine kwakamwihi,
26 uze muka-kulama amwene mutu mukwavo ali nakwiza jimbushi. Ngocho uze muka-kulama atambakanyine muka-kulama kuchikolo ngwenyi: “Kuli nakwiza nawa mutu mukwavo jimbushi.” Kaha mwangana ambile ngwenyi: “Naikiye nawa ali nakwiza nakwambulula mujimbu umwe.”
27 Uze muka-kulama ambile ngwenyi: “Ou mutu ali kulutwe ali nakulaha nge Ahimaze+ mwanaZatoke.” Kaha mwangana ambile ngwenyi: “Ahimaze apwa mutu wamwaza, ali nakwiza nakwambulula mujimbu wamwaza.”
28 Omu Ahimaze ahetele, atambakanyine mwangana ngwenyi: “Ngunanehe mujimbu wamwaza.” Kaha afukamine chameso hamavu nakulifukula kuli mwangana. Ambile kuli mwangana ngwenyi: “Vamwalisenga Yehova Kalunga kove uze nakuhane vatu vaze vanalikangenga kuli ove mwata wami mwangana.”+
29 Oloze mwangana ambile ngwenyi: “Kutala mukweze Avasalome ali kanawa tahi?” Ahimaze ambile ngwenyi: “Ngwevwanga liuya lyalinene omu Yowave angutumanga ami ngamba yove nangamba yove weka. Oloze kangwatachikizanga vyuma vyapwanga nakulingiwako.”+
30 Ngocho mwangana ambile ngwenyi: “Yako wimane haze.” Kaha Ahimaze ayile, akemanyine.
31 Kutwala muze, uze kaKushe naikiye ahetele,+ kaha ambile ngwenyi: “Ove mwata wami mwangana, nguneza nakukwambulila mujimbu. Yehova nalingi mwachiyulo hakukusokola mumavoko avosena vaze vanalikangenga kuli ove.”+
32 Oloze mwangana ambile kuli uze kaKushe ngwenyi: “Kutala mukweze Avasalome ali kanawa tahi?” Uze kaKushe ambile ngwenyi: “Vyuma vinasolokela mukweze Avasalome visolokele navaka-kole jayove mwata wami mwangana navatu vosena vaze vanalikangenga kuli ove nakufwila kukulemeka.”+
33 Mujimbu kana wevwishile mwangana chinyengo, kaha ayile mukapete kahelu kaze kapwile kuchikolo oku ali nakulila. Alililenga ngwenyi: “Ove mwanami Avasalome, ove mwanami Avasalome! Kachi chawahanga yami kufwa mukutela kufwa yove, ove mwanami Avasalome, ove mwanami!”+
Kwinyikila Chamwishi
^ Hepe., “lyapwile mumavoko.”
^ Hepe., “mukachi kalilu namavu.”
^ Hepe., “Numba nge vapiminanga mumavoko ami.”
^ Chipwe pamo, “mingamba; makunga.” Hepe., “jimbwechi.”
^ Chipwe “muChana.”
^ Hepe., “yize yahichile mungalila.”
