Samwele 2 19:1-43
19 Jino Yowave vamulwezele ngwavo: “Mwangana ali nakulila nakulishona hali Avasalome.”+
2 Omu vatu vosena vevwile ngwavo mwangana ali nakulinyenga mwanenyi, vaputukile kulishona mukutela vawahilile halikumbi lize mwomwo yakufungulula jita.
3 Vatu vakindulukile munganda+ halikumbi lize oku vanahombo kwijiva nge vatu vaze vanevu sonyi mwomwo yakuchina kujita.
4 Mwangana alifwikile kumeso, alilile nalizu lyakukanguka ngwenyi: “Ove mwanami Avasalome! Ove mwanami Avasalome, ove mwanami!”+
5 Yowave engilile muzuvo yamwangana, ambile kuli ikiye ngwenyi: “Lelo unevwisa sonyi vangamba jove vosena vaze vanakuyovola likumbi lyalelo, nakuyovola nawa vana vove vamalunga+ navava vamapwevo,+ namapwevo jove, natulumbu twove twamasano.+
6 Ove wazanga vaze vakuhunga, kaha wahunga vaze vakuzanga. Likumbi lyalelo unasolola hatoma ngwove tupitau twove navangamba jove wavamona kupwa vamokomoko. Ngunatachikiza ngwami kachi nge etu tuvosena twafwanga likumbi lyalelo, oloze Avasalome apwanga wamutonyi, kachi chinawahe kuli ove.
7 Shikaho katuka, lovoka haweluka uvendejeke* vangamba jove mwomwo nangulishinga Yehova ngwami, kachi nge kaweshi kulovoka hawelukako, kaha kakweshi mutu numba umwe mwasala kuli yove ufuku waleloko. Ngocho chuma kana nachipihya chikuma kuhambakana lupi lwosena unamononga kufuma kuukweze wove palanga nakulelo.”
8 Ngocho mwangana akatukile, ayile nakutwama kuchikolo changanda. Kaha vatu vosena vavalwezele ngwavo: “Mwangana natwame jino kuchikolo.” Shikaho vejile kumeso amwangana.
Jino vaIsalele vaze vakundwijilenga Avasalome vachinyine, mutu himutu kuzuvo yenyi.+
9 Vatu vakumiyachi yavaIsalele yosena valikokojwesele mwavomwavo, vambile ngwavo: “Mwangana atulwilile kuli vaka-kole jetu,+ atupululwile kuli vaFwilishite, oloze nachinyi jino mulifuchi mwomwo yaAvasalome.+
10 Avasalome nawa uze twawavisanga mangana apwenga mwangana wetu+ nafwila kujita.+ Shikaho ika munazenekela kukindulwisa mwangana?”
11 Mwangana Ndavichi atumine mazu awa kuli kapilishitu Zatoke+ nakapilishitu Aviyatale+ ngwenyi: “Hanjikenu kuli vakulwane vavaYuta+ ngwenu, ‘Ikaze muli nakulangishila kungukindulwisa ami mwangana kuzuvo yami, okunyi vyuma vanahanjika vaIsalele vosena vinahete kuli ami mwangana kuno kuzuvo nguli?
12 Enu muvandumbwami, muvausoko wami vahalinyinga. Ikaze muli nakulangishila kungukindulwisa ami mwangana?’
13 Hanjikenu nawa kuli Amasa+ ngwenu, ‘Ove wapwa ukausoko kami wahalinyinga. Shikaho Kalunga anguzangamise mwamunene kachi nge kangweshi kukutongola ushise Yowave+ kupwa ukapitau kamaswalale jami kufuma likumbi lyaleloko.’”
14 Ngocho akunywile* malunga vavaYuta vosena, kaha vashinganyekele mwomumwe. Shikaho vatumine mazu kuli mwangana ngwavo: “Kinduluka hamwe navangamba jove vosena.”
15 Jino mwangana akashile ungeji nakukinduluka, kaha ahetele kuYotau. VaYuta vejile kuNgilingale+ nakusesa mwangana mangana vamuzawise Yotau.
16 Kaha Shimei+ mwanakaMbenjamine Ngela wakuMbahulime ejile hamwe navaYuta nakusesa Mwangana Ndavichi.
17 Shimei apwile hamwe namalunga vavaMbenjamine 1,000. Kaha Jiva+ uze apwile muka-kukafwa vaze vakuzuvo yaSaulu alahilile kuYotau shimbu kanda mwangana ahete. Ayile hamwe navana venyi vamalunga 15 navangamba jenyi 20.
18 Jiva azaukile hamwava nakuya musali mangana azawise vaze vakuzuvo yamwangana nakumulingila vyeshovyo asakile. Oloze omu mwangana ambile ngwenyi azauke Yotau, Shimei mwanaNgela alifukwile kuli mwangana.
19 Shimei ambile kuli mwangana ngwenyi: “Ove mwata wami, kanda naunguhana mulongako, kaha nawa kanda nawanuka vyuma ngwalingile ami ngamba yove+ halikumbi lize ove mwata wami mwangana wafumine muYelusalemako. Ove mwangana kanda nauhaka vyuma kana kumuchimako.
20 Ami ngamba yove ngunatachikiza ngwami ngwalingile shili. Shikaho ngunalivangila kwiza nakukusesa ove mwata wami mwangana. Ami yami ngunalivange kwiza hali vaze vakuzuvo yaYosefwe vosena.”
21 Avishai+ mwanaZeluwiya+ ambile ngwenyi: “Shimei atela kufwa mwomwo angwile ove vawavisa kuli Yehova.”+
22 Oloze Ndavichi ambile ngwenyi: “Enu vana vaZeluwiya,+ vyuma muka vinamiwane likumbi lyalelo numba mulipike nayami? MuIsalele kamwatela kufwa mutu likumbi lyaleloko, mwomwo ngunatachikiza ngwami lelo ngunapu ngumwangana wavaIsalele.”
23 Kufumaho, mwangana ambile kuli Shimei ngwenyi: “Kaweshi kufwako.” Kaha mwangana alishingile kumeso enyi.+
24 Mefwivoshete+ muzukulu lyaSaulu naikiye ejile nakusesa mwangana. Mefwivoshete kasanyinenga kumahinji, chipwe kuteula wevu wenyi wahamuvumbo wahelu, chipwe kukosa uvwalo wenyiko, kufuma vene halikumbi lize mwangana afumine munganda palanga nakulikumbi lize akindulukile mukuunda.
25 Omu ejile* kuYelusalema nakusesa mwangana, mwangana ambile kuli ikiye ngwenyi: “Ove Mefwivoshete, ika wachinyine kuya nayami?”
26 Ikiye ambile ngwenyi: “Ove mwata wami mwangana, ngamba yami+ ikiye angwongele. Ami ngamba yove ngwapwa nguchitonji,+ ngocho ngwamwambile ngwami, ‘Mana nguleme chimbulu mangana ngutambukileho nguyenga hamwe namwangana.’
27 Oloze omu ejile kuli ove mwata wami mwangana anguvangijikilile ami ngamba yove.+ Jino ove mwata wami mwangana, ove unapu nge ukangelo kaKalunga wamuchano, shikaho linga mweshomwo unamono ngwove mwamwaza.
28 Ove mwata wami mwangana, nge wasakile kachi wajihile vaze vakuzuvo yatata vosena, oloze kawalingile ngochoko. Wangusanyikile ami ngamba yove ngulilenga hamwe vyakulya navaze veji kulilanga kumesa yove.+ Shikaho yami iyaze numba ngulembelele lika kuli ove mwangana?”
29 Oloze mwangana ambile kuli ikiye ngwenyi: “Ika uli nakuhanjikila vyosenovyo? Ami ngunakase lyehi ngwami ove naJiva namulipangila musuka wamavu.”+
30 Kaha Mefwivoshete ambile kuli mwangana ngwenyi: “Wosena upwenga tuhu wenyi, chuma chachilemu shina omu unakinduluka ove mwata wami mwangana muzuvo yove mukuunda.”
31 Jino Mbalajilai+ wakuNgileyate afumine kuLongelime nakwiza kuYotau mangana ashinjikize mwangana kuchau kuYotau.
32 Mbalajilai apwile kashinakaji. Apwile namyaka yakusemuka 80. Mbalajilai ahanyinenga mwangana vyakulya omu apwile nakutwama kuMahanaime+ mwomwo apwile lunga waluheto chikuma.
33 Shikaho mwangana ambile kuli Mbalajilai ngwenyi: “Tuzauke tuyenga hamwe kuYelusalema,+ kaha nangukakuhananga vyakulya.”
34 Oloze Mbalajilai ambile kuli mwangana ngwenyi: “Uno ngunasale namakumbi* angahi akuyoya numba nguyenga nayove mwangana kuYelusalema?
35 Oholyapwa nguli namyaka yakusemuka 80.+ Kutala ngunahase kutachikiza vyuma vyamwaza navyevi vyavipi numba? Kutala ami ngamba yove ngunahase kwivwa kuyema chavyuma nangulya chipwe evi nangunwa tahi? Kutala ngunahase kwivwa mazu avaka-kwimba vamalunga navava vamapwevo nyi?+ Ikaze ami ngamba yove nangupwila nguchiteli kuli ove mwata wami mwangana?
36 Ove mwangana, ami ngamba yove ngunakushinjikiza kaha kuYotau. Ikaze naungufwetela ove mwangana?
37 Ngwitavise ami ngamba yove ngukinduluke mangana ngukafwile munganda yami kwakamwihi nafuka yatata namama.+ Oloze ngunakuhane ngamba yove Kimihame.+ Zauka nenyi ove mwata wami mwangana, kaha kamulingile vyeshovyo unamono ngwove vyamwaza.”
38 Mwangana ambile ngwenyi: “Kimihame mwazauka nakuya hamwe nayami, kaha nangukamulingila vyeshovyo unamono ngwove vyamwaza. Vyeshovyo nausaka kuli ami nangukulingila.”
39 Jino vatu vosena vaputukile kuzauka Yotau. Kaha shimbu kanda mwangana azauke, asweswenyele Mbalajilai+ nakumukisula. Kufumaho Mbalajilai akindulukile kwimbo lyenyi.
40 Omu mwangana azaukile nakuya kuNgilingale,+ azaukile hamwe naKimihame. VaYuta vosena nachimbwa chavaIsalele vazawishile mwangana.+
41 Jino malunga vavaIsalele vosena vejile kuli mwangana, vamwambile ngwavo: “Mwomwo ika vandumbwetu, malunga vavaYuta vakumbachilanga ove mwangana nakukuzawisa Yotau hamwe navaze vakuzuvo yove navatu jove vosena chakuzeneka kutulweza?”+
42 Malunga vavaYuta vosena vakumbulwile malunga vavaIsalele ngwavo: “Mwangana apwa kausoko ketu.+ Munapihilila ika? Kutala tunali vyuma vimwe vyamwangana chipwe kutambula wana umwe kuli ikiye numba?”
43 Oloze malunga vavaIsalele vakumbulwile malunga vavaYuta ngwavo: “Etu tukwechi vyazano likumi muwangana ou, ngocho tuli nangolo hali Ndavichi kuhambakana enu. Mwomwo ika munatulelesela? Etu yetu twatelanga kulivanga kuya nakukindulwisa mwangana.” Chipwe ngocho, mazu vahanjikile malunga vavaYuta ahonesele malunga vavaIsalele.
Kwinyikila Chamwishi
^ Hepe., “uhanjike kumichima.”
^ Hepe., “afumbile.”
^ Chipwe pamo, “Omu afumine.”
^ Hepe., “namakumbi amyaka.”
