Samwele 2 2:1-32
2 Kufumaho Ndavichi ehwile Yehova+ ngwenyi: “Nguyenga munganda yimwe yamuYuta tahi?” Yehova amwambile ngwenyi: “Yakonga.” Kaha Ndavichi ehwile cheka ngwenyi: “Nguyenga kulihi?” Amukumbulwile ngwenyi: “Yakonga kuHevelone.”+
2 Ngocho Ndavichi ayile kuze namapwevo jenyi vavali, Ahinowame+ wakuYezelele, naAvingayile+ uze apwile pwevo lyambozo Navale wakuKalamele.
3 Ndavichi ayile nawa namalunga vaze apwile navo.+ Malunga kana vayile najitanga javo, kaha vatungile mujinganda jize jajingilikile Hevelone.
4 Jino malunga vamuYuta vejile, kaha vawavishile Ndavichi kupwa mwangana wavaze vakuzuvo yaYuta.+
Valwezele Ndavichi ngwavo: “Malunga vakuYaveshe-ngileyate vakiko vafunjile Saulu.”
5 Ngocho Ndavichi atumine valuwa kuli malunga vakuYaveshe-ngileyate vakavalweze ngwavo: “Yehova amikisulenga mwomwo mwasolwelele mwata wenu Saulu zangi yakwilila hakumufunda.+
6 Yehova amisolwelenga zangi yakwilila nakupwa lika wakushishika kuli enu. Nayami nawa nangumisolwelanga zangi hachuma echi mwalingile.+
7 Ngocho jikizenu nakumika hakuwana nge mwata wenu Saulu nafu lyehi, kaha vaze vakuzuvo yaYuta vananguwavisa ami kupwa ngumwangana wavo.”
8 Oloze Avanele+ mwanaNele, kapitau kamaswalale jaSaulu ambachile Ishe-mboshete+ mwanaSaulu nakumutwala musali kuMahanaime.+
9 Amutongwele kupwa mwangana waNgileyate,+ naYezelele,+ navaAshule, navaEfwalime,+ navaMbenjamine, navaIsalele vosena.
10 Ishe-mboshete mwanaSaulu apwile namyaka yakusemuka 40 omu aputukile kuyula vaIsalele, kaha ayulile myaka yivali. Vaze vakuzuvo yaYuta kaha vakiko vakundwijilenga Ndavichi.+
11 Ndavichi apwile mwangana wavaze vakuzuvo yaYuta muHevelone hamyaka 7 natukweji 6.+
12 Kutwala muze, Avanele mwanaNele navangamba jaIshe-mboshete mwanaSaulu, vafumine kuMahanaime+ nakuya vakalwe jita kuNgiveyone.+
13 Yowave+ mwanaZeluwiya+ navangamba jaNdavichi navakiko vayile vakalwe jita, kaha vakaliwanyinyine kuchijiva chaNgiveyone. Lizavu limwe lyapwile musali yino yachijiva, kaha lizavu likwavo lyapwile musali yikwavo.
14 Kaha Avanele ambile kuli Yowave ngwenyi: “Vakweze jetu vakatuke mangana valivete tumone.” Yowave ambile ngwenyi: “Ukalu wauchi, vakatuke.”
15 Ngocho vakatukile. Kulizavu lyaMbenjamine naIshe-mboshete mwanaSaulu kwafumine vakweze 12, kaha kulizavu lyavangamba jaNdavichi kwafumine nawa vakweze 12.
16 Mutu himutu akwachile mukwavo kumutwe, kaha nawa mutu himutu asomwene poko yenyi yamukwale nakutuva kuluhachi lwamukwavo. Ngocho vosena vafwile. Shikaho echi chihela chamuNgiveyone vachivulukilile ngwavo Helekate-hazulime.
17 Jita yatohwele chikuma halikumbi lize, kaha Avanele namalunga vavaIsalele vavafungulwile kuli vangamba jaNdavichi.
18 Jino vana vaZeluwiya vatatu,+ Yowave,+ naAvishai,+ naAsahele,+ navakiko vapwile kuze. Asahele apwile wajimbushi chikuma nge kayi muchipapa.
19 Ngocho Asahele ahangasanyine Avanele, kaha kapeukilile kuchilyo chipwe kuchimosweko omu apwile nakuhangasana Avanele.
20 Omu Avanele atalile kunyima, ambile ngwenyi: “Yove Asahele tahi?” Asahele ambile ngwenyi: “Yami vene.”
21 Kaha Avanele ambile kuli ikiye ngwenyi: “Peukila kuchilyo chipwe kuchimoswe ukwate mukweze umwe mangana umutambule vyeshovyo nausaka.” Oloze Asahele kalitwaminyine kumuhangasanako.
22 Ngocho Avanele ambile cheka kuli Asahele ngwenyi: “Litwamine kunguhangasana, mokomoko nangukujiha. Ndumbwove Yowave mwakangumona ngachilihi nge ngunakujihi?”
23 Oloze Asahele atwalileho lika kumuhangasana. Ngocho Avanele amutuvile songo yamulunda walikunga hajimo, kaha uze mulunda+ wamutuvasanyine nakulovokela kunyima. Shikaho alimbukile nakufwa hahaze vene. Omu vatu vahetelenga haze alimbukilile nakufwila Asahele, vemanyinenga nakumutala.
24 Kufumaho Yowave naAvishai vahangasanyine Avanele. Likumbi lyavatokelele kupili yaAma, yize yalitalasana naNgiya, mujila yakuya mupambo yaNgiveyone.
25 VaMbenjamine valikungulwile kuze nakumukavangiza Avanele munyima, kaha vatungile lizavu limwe nakwimana hapili.
26 Jino Avanele atambakanyine Yowave ngwenyi: “Uno namulizungisa lika najipoko jamikwale mbwe nahali? Kawatachikijile ngwove echi nachineha ukalu waunene nyi? Lweza vatu jove valitwamine kuhangasana vandumbwavo.”
27 Ngocho Yowave ambile ngwenyi: “Omu ayoya Kalunga wamuchano tu, nge kawahanjikangako, kachi vatu jami vanahangasana lika vandumbwavo palanga nakuchimene.”
28 Yowave embile luneta, kaha vatu jenyi valitwaminyine kuhangasana vaIsalele. Ngocho jita yakumine.
29 Kufumaho, Avanele navatu jenyi vakatukile, vahichile muAlava+ ufuku wosena uze nakuzauka Yotau. Vapulasanyine muchinema,* kaha vakahetele kuMahanaime.+
30 Omu Yowave akindulukile kufuma kuze ayile nakuhangasana Avanele, akungulwile vatu vosena. Kaha awanyine vangamba jaNdavichi 19 vauchi. NaAsahele nawa apwile wauchi.
31 Oloze vangamba jaNdavichi vafungulwile vaMbenjamine navatu jaAvanele, vajihile vatu 360.
32 Vambachile mujimba waAsahele,+ kaha vaufunjile hafuka yaise, yize yapwile kuMbetelema.+ Kufumaho Yowave navatu jenyi vatambukile ufuku wosena, vakahetele kuHevelone+ chimenemene.
Kwinyikila Chamwishi
^ Chipwe pamo, “muMbichilone mwosena.”
