Samwele 2 20:1-26
20 Jino kwapwile kakulanganyi umwe, lijina lyenyi ikiye Sheva+ mwanakaMbenjamine Mbikili. Embile luneta+ nakwamba ngwenyi: “Katweshi nachazano kuli Ndavichiko, kaha nawa katweshi nauswana kuli ou mwanaYeseko.+ Enu vaIsalele+ muvosena, kindulukenu kutulunga* twenu.”
2 Ngocho malunga vavaIsalele vosena valitwaminyine kukavangiza Ndavichi. Vakavangijile Sheva mwanaMbikili.+ Oloze malunga vavaYuta vakavangijile lika mwangana wavo kufuma kuYotau swi nakuYelusalema.+
3 Omu mwangana Ndavichi ahetele kuzuvo* yenyi muYelusalema,+ ambachile tulumbu twamasano 10 vaze asezele mangana valame zuvo,+ avahakile muzuvo yimwe nakuvalaminamo. Avahanyinenga vyakulya, oloze kalisavalilenga navoko.+ Avalaminyine muzuvo kana palanga nakukufwa chavo. Vapwile kwijiva nge hivatuliwe okunyi vapwile nalunga.
4 Jino mwangana ambile kuli Amasa+ ngwenyi: “Ngunakuhane makumbi atatu uyenga usanyike malunga vavaYuta vezenga kuno. Kaha nayove ukeza kuno.”
5 Ngocho Amasa ayile nakusanyika vaYuta. Oloze kuze ayile akashimbwile, ahambakanyishile makumbi aze vamuhanyine.
6 Kaha Ndavichi ambile kuli Avishai+ ngwenyi: “Sheva+ mwanaMbikili nahase kutulinga mwamupi chikuma kuhambakana muze alingile Avasalome.+ Mbata vangamba jayami mwata wove mangana umuhangasane shimbu kanda achinyine mujinganda jakukingiwa.”
7 Ngocho vatu jaYowave,+ vaKelete, navaPelete,+ namalunga vangolo vosena vakavangijile Avishai.”* Valovokele muYelusalema nakuya nakuhangasana Sheva mwanaMbikili.
8 Omu vahetele kwakamwihi nalilolwa lyalinene lyakuNgiveyone,+ valihumanganyine naAmasa.+ Jino Yowave avwalile uvwalo wajita, kaha apwile napoko yamukwale muchindalo chenyi yize aliswelelele hambunda. Kahomu apwile nakutambuka, yize poko yasomokele muchindalo nakuholoka.
9 Yowave ambile kuli Amasa ngwenyi: “Ove ndumbwami, uli kanawa nyi?” Kaha Yowave akwachile Amasa kuwevu nalivoko lyenyi lyachilyo kwijiva nge ali nakusaka kumusweswenya.
10 Jino Amasa kahakile muchima kupoko yamukwale yize yapwile mulivoko lyaYowaveko. Ngocho Yowave atuvile Amasa poko hajimo,+ kaha mijingwa yatutulukile nakuzukukila hamavu. Amutuvile kamwe kaha, kamutuvile cheka kamuchivali mangana amumanusuleko. Kufumaho, Yowave nandumbwenyi Avishai vahangasanyine Sheva mwanaMbikili.
11 Mukweze umwe havatu jaYowave emanyine kwakamwihi naAmasa, ambile ngwenyi: “Weshowo ali kusali yaYowave, nayou ali nakukundwiza Ndavichi akavangize Yowave.”
12 Halwola lwosena luze, Amasa apwile nakulipochinga mumanyinga enyi mukachi kajila. Kahomu uze mukweze amwene vatu vosena vali nakwimana haze asavalile Amasa, amufumishile muze mujila nakumutwala mumusenge. Kufumaho amukavikile lihina mwomwo amwene vatu vosena vali nakwimana haze asavalile.
13 Omu alingile hanamufumisa lyehi mujila, vatu vosena vakavangijile Yowave mangana vahangasane Sheva+ mwanaMbikili.
14 Jino Sheva apulasanyine mujingalila jamiyachi yavaIsalele yosena, ayile kunganda yaAvele yaMbete-maka.+ VaMbikili valikungulwile, kaha vakavangijile Sheva muze munganda.
15 Yowave navatu jenyi vejile, kaha vahakile nganda yaAvele yaMbete-maka muchingombela mangana vamukwachilemo. Yize nganda yapwile namulundu jingulwishi, kaha vatu jaYowave vosena vayilundwilile mulundu ukwavo. Vaputukile kufula kukembwe mangana vayilindumune.
16 Jino pwevo umwe wakuzangama uze apwile muze munganda atambakanyine ngwenyi: “Ivwililenu enu malunga, ivwililenu! Lwezenu Yowave ezenga kuno mangana nguhanjike nenyi.”
17 Yowave apandamine kuli uze pwevo, kaha uze pwevo ambile ngwenyi: “Ove yove Yowave nyi?” Yowave amukumbulwile ngwenyi: “Yami vene.” Uze pwevo amwambile ngwenyi: “Ivwilila vyuma nanguhanjika ami ngamba yove.” Ikiye amwambile ngwenyi: “Hanjika, nguli nakwivwako.”
18 Uze pwevo ambile ngwenyi: “Kumyaka yakunyima, vatu vahanjikilenga ngwavo, ‘Yenunga mukehule munganda yaAvele, kaha chihande chenu nachikuma.’
19 Ami ngunemanyinako vatu vakuunda, vakushishika vamuIsalele. Shikaho uli nakufwila kunongesa nganda yayilemu chikuma muIsalele. Mwomwo ika naunongesela* uswana waYehova?”+
20 Yowave amukumbulwile ngwenyi: “Kacheshi kupwa chakutamo ami kunongesa eyi ngandako.
21 Kangwejile nakulinga chuma kanako. Ami ngunakave lunga umwe wakungalila yajipili yaEfwalime+ uze nalikange kuli* Mwangana Ndavichi. Lunga kana lijina lyenyi ikiye Sheva+ mwanaMbikili. Kachi nge namunguhanayo mumavoko ami, kaha nangufuma kunganda yenu.” Ngocho uze pwevo ambile kuli Yowave ngwenyi: “Vandamina, natukumbilila mutwe wenyi helu lyakembwe.”
22 Hahaze vene, uze pwevo wakuzangama ayile nakulweza vatu vosena. Kaha vatetele mutwe waSheva mwanaMbikili, vaumbililile Yowave. Kufumaho, Yowave embile luneta, kaha vafumine kuze kunganda. Mutu himutu akindulukile kwimbo lyenyi,+ kaha Yowave naikiye nawa akindulukile kuYelusalema kuli mwangana.
23 Jino Yowave ikiye apwile kapitau kamaswalale javaIsalele.+ Mbenaya+ mwanaYehoyata+ ikiye apwile kapitau kavaKelete navaPelete.+
24 Atolame+ ikiye apwile mukulwane wavaze vazachilenga milimo yaundungo. Kaha Yehoshafwate+ mwanaAhilute ikiye apwile muka-kulama mijimbu yawangana.
25 Sheva ikiye apwile muka-kusoneka. Kaha Zatoke+ naAviyatale+ vakiko vapwile vapilishitu.
26 Ila wakuYaile naikiye apwile ngambela* yaNdavichi.
Kwinyikila Chamwishi
^ Chipwe pamo, “kujimbalaka.”
^ Chipwe “kunganda.”
^ Chipwe “Yowave.”
^ Hepe., “nauminyina.”
^ Hepe., “nakajila livoko.”
^ Hepe., “kapilishitu.”
