Samwele 2 21:1-22
21 Jino hamakumbi aNdavichi, kwapwile zala yakalombolombo+ hamyaka yitatu. Ngocho Ndavichi ehwile Yehova, kaha Yehova ambile ngwenyi: “Saulu navaze vakuzuvo yenyi vali namulonga wakumwanga manyinga, mwomwo vajihile vatu vakuNgiveyone.”+
2 Shikaho mwangana asanyikile vatu vakuNgiveyone,+ ahanjikile navo. (Jino vatu vakuNgiveyone kavapwile vaIsaleleko, oloze vapwile vaAmole+ vaze vasalile mulifuchi. VaIsalele valishingile ngwavo kaveshi kukavanongesako,+ oloze Saulu afwilile kuvalalisa mwomwo yatwima apwile nayo hali vaIsalele navaYuta.)
3 Ndavichi ambile kuli vatu vakuNgiveyone ngwenyi: “Vyuma muka namusaka ngumilingile? Chuma muka nangulinga chakufwika hashili mangana mukisule uswana waYehova?”
4 Vatu vakuNgiveyone vambile kuli ikiye ngwavo: “Katweshi nakusaka utuhane palata chipwe ulu+ hamulonga alingile Saulu navaze vakuzuvo yenyiko. Kaha nawa katweshi kuhasa kujiha mutu numba umwe muIsaleleko.” Mwangana ambile kuli vakiko ngwenyi: “Vyeshovyo namusaka nangumilingila.”
5 Vakiko vambile kuli mwangana ngwavo: “Saulu ajihile vatu jetu, asakile kutulalisa tufume mungalila yaIsalele.+
6 Ngocho tuhane vana venyi vamalunga 7 tuvasukike*+ kumeso aYehova muNgiveya+ yaSaulu, Saulu uze vasakwile kuli Yehova.”+ Shikaho mwangana ambile ngwenyi: “Nangumihanavo.”
7 Oloze mwangana evwililile keke Mefwivoshete+ mwanaYonatane, Yonatane mwanaSaulu, mwomwo yalushingo luze Ndavichi naYonatane+ valishingile kumeso aYehova.
8 Ngocho mwangana asakwile Alamonyi naMefwivoshete, vana vamalunga vaLijipa+ mwanaAya vaze asemene naSaulu. Asakwile nawa vana vamalunga vatanu vaMikale*+ mwanaSaulu vaze asemene naAtalyele+ mwanaMbalajilai wakuMehola.
9 Avambachile nakuvahana kuvatu vakuNgiveyone. Vavajihile nakuvasukika hapili kumeso aYehova.+ Vosena 7 vafwililile hamwe. Vavajihile kukuputuka changonde yakwaha mbale.
10 Jino Lijipa+ mwanaAya ambachile chikeleyi, afwikile vaze vivimbi vapwile halilolwa. Vaze vivimbi vapwile vakufwika kufuma vene kukuputuka changonde yakwaha palanga nomu vula yavanokelele. Lijipa kasakile tujila vakutuka mwilu vawile hali vaze vivimbi namusana, chipwe visuma vamuchipapa vezenga kwakamwihi naufukuko.
11 Ndavichi vamulwezele vyuma alingile Lijipa mwanaAya, uze apwile kalumbu kalisano kaSaulu.
12 Ngocho Ndavichi ayile nakutambula vifuwa vyaSaulu navifuwa vyamwanenyi Yonatane vize vyapwile kuli vakulwane* vamuYaveshe-ngileyate.+ Ava vakulwane vevile vifuwa kana kuchihela chasanga chakuMbete-shane. Kuchihela kana kukiko vaFwilishite vasukikile Saulu naYonatane halikumbi vajihile Saulu kuNgilivowa.+
13 Ambachile vifuwa vyaSaulu navifuwa vyamwanenyi Yonatane nakukinduluka navyo. Akungulwile nawa vifuwa vyavaze malunga vajihile.*+
14 Kufumaho, vafunjile vifuwa vyaSaulu navifuwa vyamwanenyi Yonatane kuZela+ mungalila yavaMbenjamine. Vavifunjile muchimbumbe chaKishe+ ise yaSaulu. Omu vakumishile kulinga vyuma vyosena vize avalwezele mwangana, Kalunga evwililile jino kulembelela vamulembelelenga mangana akisule lifuchi.+
15 Kutwala muze, vaFwilishite vejile cheka nakulwa jita navaIsalele.+ Ngocho Ndavichi navangamba jenyi vakatukile, vakalwile jita navaFwilishite. Jino kutwala muze, Ndavichi azeyele.
16 Ngocho Ishivi-mbenove wakutanga yaLefwaime+ asakile kujiha Ndavichi. Ishivi-mbenove apwile nalikunga lyaunengu lize lyalemene jishekele 300,*+ napoko yamukwale yayihya.
17 Oloze Avishai+ mwanaZeluwiya ejile nakulwila Ndavichi.+ Avetele uze kaFwilishite nakumujiha. Kufumaho, vatu jaNdavichi valishingile kuli ikiye ngwavo: “Kanda naukeza cheka nayetu kujitako,+ kuchina naukajima linongo lyaIsalele.”+
18 Kutwala muze, vaIsalele valwile cheka jita navaFwilishite+ kuNgove. Halwola kana Shivekai+ wakuHusha ajihile Safwe uze apwile wakutanga yaLefwaime.+
19 VaIsalele valwile cheka jita navaFwilishite+ kuNgove, kaha Elehanane mwanaYale-olengime wakuMbetelema ajihile Ngolyate wakuNgata. Mulunda walikunga lyaNgolyate wapwile nge mwalachi wavaka-kutunga mahina.+
20 Jita yepukile cheka kuNgata. Kujita kana kwapwile lunga umwe wakutaluka chikuma, uze apwile naminwe 6 kulivoko hilivoko, naminwe 6 kulihinji hilihinji. Minwe yosena yapwile 24. Naikiye apwile wakutanga yaLefwaime.+
21 Ou lunga ahulamishilenga vaIsalele.+ Ngocho Yonatane mwanaShimei,+ Shimei ndumbwaNdavichi amujihile.
22 Malunga vosena ava vawana vapwile vakutanga yaLefwaime muNgata. Kaha vavajihile kuli Ndavichi navangamba jenyi.+
Kwinyikila Chamwishi
^ Hepe., “tuvaseze hatoma,” kulumbununa kuvahokwojola mavoko namahinji.
^ Chipwe pamo, “vaMelave.”
^ Chipwe pamo, “kuli venyalifuchi.”
^ Hepe., “vasezele hatoma.”
^ Kafwe jikilongalamu 3.42. Tala Chihande B14.
