Samwele 2 22:1-51
22 Ndavichi ahanjikile mazu amwaso+ uno kuli Yehova halikumbi lize Yehova amupululwile mumavoko avaka-kole jenyi vosena+ namulivoko lyaSaulu.+
2 Ambile ngwenyi:“Yehova ikiye lilolwa lyami, ikiye chihela chami chakukola,+ ikiye Muka-kungupululula.+
3 Kalunga kami ikiye lilolwa lyami,+ muli ikiye mukiko ngweji kuchinyinanga,Ikiye kepwe yami,+ ikiye lumbinga* lwami lwaulwilo,* ikiye uchinyino wami wakukola,+Ikiye chihela chami chakuchinyina,+ ikiye mulwilo wami.+ Ikiye eji kungulwilanga kuulyanyi.
4 Nangusanyika Yehova, Ou atamo kumwalisa,Kaha mwangulwila kuli vaka-kole jami.
5 Makimba akufwa angujingilikile.+Tuvihu vaze vangukatukilile kwijiva nge mihuji yameya vangwivwishile woma.+
6 Mikole yaFuka* yangujingile.+Miheto yakufwa yangukwachile.+
7 Omu ngwapwile muluyando, ngwasanyikile Yehova,+Ngwasanyikilenga Kalunga kami.Kaha evwile lizu lyami mutembele yenyi muze atwama,Kawelele kami kahetele mumatwitwi enyi.+
8 Jino mavu aputukile kulinyika nakundenda,+Vihela vyamelu nawa vyandendele,+Vyalinyikile noku noku mwomwo Kalunga apihililile.+
9 Mumazulu enyi mwafwinjile wishi,Mukanwa kenyi mwafumine kakahya kakunongesa.+Kuli ikiye kwapwile makala akakahya.
10 Azembwile melu omu asulukile hamavu.+Kaha mwishi yavilyachilo vyenyi mwapwile milima wi.+
11 Atwamine hakeluve,+ kaha ejile oku ali nakutuka,Vamumwene ali hamavava akangelo.*+
12 Kaha milima yamufwikile jingulwishi nge chisakila,+Nge mavwi avula elava.
13 Kumunyika chakumeso enyi chasolokele nge makala akakahya.
14 Yehova aputukile kulilima mumelu,+Ou Wakulitulaho Chikuma ahanjikile.+
15 Ashile mivwi+ yenyi nakuvasanda mwamwa.Avesele miveso yenyi nakuvaluwanganyisa.+
16 Hamashima akalungalwiji hasolokele,+Vihela vyamavu vyakekumukile mwomwo yautenu waYehova,Mwomwo yakuhwimasana chamumazulu enyi.+
17 Angwolovelele haze helu apwile,Angukwachile nakunguzambula mumeya amavulu.+
18 Angupululwile kuli muka-kole wami wangolo,+Angupululwile kuli vaze vanguhungile vaze vapwile nangolo chikuma kuhambakana ami.
19 Valitalasanyine nayami halikumbi lyaukalu wami,+Oloze Yehova angukafwile.
20 Angumbachile nakungutwala muchihela chakukingiwa.*+Angupululwile mwomwo angwivwililile kuwaha.+
21 Yehova eji kungufwetanga kweseka nakwoloka chami.+Eji kungufwetanga nge kutesa namavoko ami akuzeneka mulonga.*+
22 Mwomwo ngunalamenga jijila jaYehova,Kaha kangwahukile nakuseza Kalunga kamiko.
23 Ngweji kukavangizanga jishimbi jenyi josena,+Kaha kangweshi kuseza jindongi jenyiko.+
24 Nangupwanga nguwakuzeneka chuma chakunguhanyina mulonga kumeso enyi,+Kaha nangulilama nguzeneke kuvulumuna.+
25 Yehova angufwete kweseka nakwoloka chami,+Kweseka namavoko ami akuzeneka mulonga kumeso enyi.+
26 Kuli mutu wakushishika weji kupwanga uwakushishika.+Kuli mutu wangolo, wakulonga weji kulinganga mwakulonga.+
27 Kuli mutu utoma weji kulisololanga kupwa utoma.+Oloze kuli muka-kuhenga weji kulisololanga kupwa uwakuvanguluka.*+
28 Mwomwo weji kulwilanga vatu vakulinyisa,+Oloze meso ove eji kutalanga vaka-kulivwimba nautenu, kaha nauvenyisa.+
29 Mwomwo ove Yehova+ yove linongo lyami,Ove Yehova yove weji kungumunyikilanga mumilima.+
30 Nanguhasa kulitalasana nalizavu lyavaka-kungunyemukila hakungukafwa kuli yove.Nanguhasa kunyina hakembwe mungolo jove.+
31 Jila yaKalunga wamuchano yapwa yakukupuka.+Mazu aYehova apwa atoma.+Kalunga apwa kepwe kuli vosena vaze navachinyina muli ikiye.+
32 Kutala kuli Kalunga weka wakuhambakana Yehova+ numba?Iyaze napu lilolwa kuhambakana Kalunga ketu?+
33 Kalunga wamuchano ikiye chihela chami chakukola,+Kaha mwawahisa kanawa jila yami.+
34 Eji kulingisanga mahinji ami alahe nge aze akapaji,Eji kungwimikanga havihela vyakulunduka.+
35 Eji kunangulanga mavoko ami mwakwashila jita,Kaha mavoko ami anahase kulema uta wamanana waunengu.
36 Weji kunguhananga kepwe yove yaulwilo,Kaha kulinyisa chove cheji kungunehelanga ulemu.+
37 Weji kutohwesanga jila yakutambukamo mahinji ami,Mahinji* ami kaweshi kusenunukako.+
38 Nanguhangasana vaka-kole jami nakuvanongesa,Kangweshi kukindulukako kuvanga vananongo.
39 Nanguvachika nakuvanongesa mangana vahone kukatuka cheka.+Nanguvalyatangila namahinji ami.
40 Naunguhana ngolo jakwasa jita.+Naulimbwila vaka-kole jami kumahinji ami.+
41 Naulingisa vaka-kole jami vakinduluke nakuchina.*+Kaha vaze vanguhunga nanguvanongesa.*+
42 Veji kutwanga tuwelele, oloze naumwe wauchi eji kuvalwilanga,Veji kutetanga miteto kuli Yehova, oloze keshi kuvakumbululako.+
43 Nanguvatwa vapwenga nge lukungu luli hamavu.Nanguvachika nakuvalyatangila nge ulova wamujijila.
44 Naungupululula kuvatu jami vaze vasaka kunguwanyina tutenga.+Naungukinga ngupwenga ngutwamina wavaka-mafuchi.+Vatu vaze kangwatachikizako navanguzachilanga.+
45 Vaka-mafuchi eka naveza kuli ami nachiwomawoma.+Navangwononoka hakwivwa puho yami kaha.*
46 Vaka-mafuchi eka navalizuzukila nawoma,*Naveza nakulichikimina kufuma kuvihela vyavo vyakukola.
47 Yehova ayoya. Vamwalisenga Lilolwa+ lyami.Vamutohwesenga Kalunga uze apwa Lilolwa muka-kungulwila.+
48 Kalunga wamuchano eji kungulingilangako sambanjinga.+Eji kulingisanga vatu veka naveka valiluule kuli ami.+
49 Eji kungupulululanga kuli vaka-kole jami vaukenya.Ove Kalunga, weji kunguzezulanga helu+ lyavaze veji kungufumbukilanga,Weji kungulwilanga kumutu waulyanyi.+
50 Shikaho nangukusakwililanga ove Yehova muli vaka-mafuchi,+Nangwimbanga myaso yakwalisa lijina lyove.+
51 Eji kulingilanga mwangana wenyi vilinga vyavinene vyaulwilo.*+Eji kusololanga zangi yakwilila kuli ou wenyi awavisa,Kuli Ndavichi navaka-tanga* yenyi haya myaka yosena.”+
Kwinyikila Chamwishi
^ Tala Mukana waMazu.
^ Chipwe “ikiye mulwilo wami wangolo.”
^ Chipwe “yaSheyole,” kulumbununa fuka yavatu vosena. Tala Mukana waMazu.
^ Hepe., “hamavava ashipilitu.”
^ Chipwe “muchihela chachinene.”
^ Hepe., “namavoko ami atoma.”
^ Chipwe pamo, “uchileya.”
^ Chipwe “Tusendengele.”
^ Chipwe “vangutalise jinyima.”
^ Hepe., “nanguvaholesa kulu.”
^ Hepe., “Omu navevwa namatwitwi avo, navangwononoka.”
^ Chipwe “navapiluka.”
^ Chipwe “Eji kufungulwilanga mwangana wenyi.”
^ Hepe., “nambuto.”
