Samwele 2 23:1-39
23 Awa akiko mazu aNdavichi amakumishilo:+“Mazu aNdavichi mwanaYese,+Mazu alunga uze vazezwile helu,+Uze vawavisa+ kuli Kalunga kaYakova,Muka-kwimba kanawa myaso*+ yavaIsalele.
2 Shipilitu yaYehova yahanjikilile muli ami,+Mazu enyi apwilenga halilimi lyami.+
3 Kalunga kaIsalele ahanjikile,Ou Lilolwa lyaIsalele+ ahanjikile kuli ami ngwenyi:‘Kachi nge muka-kuyula vatu apwa wakwoloka,+Kachi nge eji kwivwanga Kalunga woma,+
4 Kaha chiyulo chenyi cheji kupwanga nge kumunyika chalikumbi omu nalitutuka,+Cheji kupwanga nge omu kweji kutaunukanga nachimene nge kakweshi mavwiko.Cheji kupwanga nge musana uze weji kupwangako nge vula yinachi,Uze weji kusokesanga mwila wachimbete.’+
5 Omu mukiko yinapu zuvo yami kumeso aKalunga.Kalunga nangushiki lushiko lwahaya myaka yosena,+Lushiko kana vanalulumbununa munona munona nakululama.Kalunga mwalutesamo,Mwomwo nalukangulwila kaha nawa ngwaluzanga chikuma.+
6 Oloze tuvihu vosena vanavambili+ nge mingongaYize kaveshi kuhasa kukwata namavokoko.
7 Mutu kukwata mingongaKuvanga ali nachikungo chafwelu nalikunga.Mingonga kana vayochele haze yili.”
8 Awa akiko majina avatu jaNdavichi vaka-kwasa jita vangolo:+ Yosheve-mbashevete kaTakemone uze apwile kapitau kavaka-kwasa jita vangolo vatatu.+ Yosheve-mbashevete ajihile vatu 800 nalikunga halwola lwolumwe.
9 Muhato wenyi apwile Eleyaza+ mwanaNdoto,+ Ndoto mwanaAhowa. Eleyaza apwile hali vaka-kwasa jita vangolo vatatu vaze vapwile naNdavichi omu vahulamishile vaFwilishite. VaFwilishite valikungulwile valwenga jita navaIsalele, oloze vaIsalele vakindulukile nakuchina.
10 Eleyaza omikile, kaha ajihile vaFwilishite palanga nomu livoko lyenyi lyazeyele nakupwa nachingole mwomwo yakukwata poko yamukwale hatando yayisuku.+ Yehova alwilile vaIsalele halikumbi lize.+ Ngocho vatu vakavangijile jino Eleyaza munyima nakumbata vyuma vyavatu vaze ajihile.
11 Muhato waEleyaza apwile Shama mwanakaHalale Angi. Likumbi limwe, vaFwilishite valikungulwilile kuLehi. Kuchihela kana kwapwile wande uze wemine makunde amavulu chikuma. Jino vaIsalele vachinyine mwomwo yavaFwilishite.
12 Oloze ikiye omikile nakwimana mukachi kauze wande, kaha aukingile. Ajihile vaFwilishite, ngocho Yehova alwilile vaIsalele.+
13 Jino likumbi limwe, tupitau vatatu vafumine hatupitau 30 nakuya kuli Ndavichi kuwina wakusendeveka wakuAtulame+ hangonde yakwaha. Kaha lizavu lyamaswalale* javaFwilishite vatungile chilombo chavo muChinema* chaLefwaime.+
14 Halwola kana Ndavichi apwile kuchihela chachikalu kuheta,+ kaha maswalale javaFwilishite vapwile muMbetelema.
15 Ngocho Ndavichi ahanjikile vyuma afwililile mumuchima wenyi ngwenyi: “Nachiwaha kachi nge nangunwako meya amulishima lyakuchikolo chaMbetelema.”
16 Shikaho vaka-kwasa jita vangolo vatatu vayile, valitakile muchilombo chavaFwilishite, kaha vaswichile meya mulishima lyakuchikolo chaMbetelema nakumunehela Ndavichi. Oloze ikiye akanyine kuwanwa, awamwangilile hamavu kumeso aYehova.+
17 Ambile ngwenyi: “Ove Yehova, kacheshi chakutamo kuli ami kunwa awa meyako. Kutala nachipwa chakutamo kuli ami kunwa manyinga+ avava malunga vahakanga myono yavo muponde hakuya nakuswita meya nyi?” Ngocho akanyine kunwa aze meya. Evi vikiko vyuma valingile vaze vatu jaNdavichi vaka-kwasa jita vangolo vatatu.
18 Avishai+ ndumbwaYowave mwanaZeluwiya+ ikiye apwile kapitau kavaka-kwasa jita veka vangolo vatatu. Avishai ajihile vatu 300 nalikunga, kaha ayile puho ngana mwavaze vaka-kwasa jita vangolo vatatu.+
19 Numba tuhu apwile wamulemu chikuma kuhambakana ava vaka-kwasa jita veka vangolo vatatu, kaha nawa apwile kapitau kavo, oloze katesekele hamwe ulemu navaze vaka-kwasa jita vangolo vatatu vakulivangako.
20 Mbenaya+ mwanaYehoyata apwile wakuhamuka chikuma.* Azachile milimo yayivulu chikuma muKavazele.+ Ajihile vana vaAlyele wakuMowave vavali. Engilile nawa muwina wameya nakujiha ndumba oku mbundu yili nakunoka.+
21 Ajihile nawa kaEjipitu umwe wakutaluka chikuma. Numba tuhu ou kaEjipitu apwile nalikunga mulivoko lyenyi, oloze Mbenaya ejile kuli ikiye nambwechi nakumunyanga likunga, kaha amujihishile lize likunga lyenyi.
22 Evi vikiko vyuma alingile Mbenaya mwanaYehoyata. Kaha ayile puho ngana mwavaze vaka-kwasa jita vangolo vatatu.
23 Numba tuhu apwile wamulemu chikuma kuhambakana vaze vaka-kwasa jita vangolo 30, oloze katesekele hamwe ulemu navaze vaka-kwasa jita vangolo vatatuko. Chipwe ngocho, Ndavichi amutongwele kupwa mukulwane wavaka-kumulama.
24 Asahele+ ndumbwaYowave apwile hali vaze vaka-kwasa jita vangolo 30. Ava vakiko vapwile vaka-kwasa jita vangolo vakwavo: Elehanane mwanaNdoto wakuMbetelema,+
25 naShama wakuHalote, naElika wakuHalote,
26 naHeleze+ wakuPalate, naIla+ mwanaIkeshe wakuTekowa,
27 naAviyezele+ wakuAnatote,+ naMevunai wakuHusha,
28 nakaAhowa Zalamone, naMahalai+ wakuNetofwa,
29 naHeleve mwanaMbana wakuNetofwa, naItai mwanaLivai wakuNgiveya yavaMbenjamine,
30 naMbenaya+ wakuPilatone, naHitai wakuvana vatulwiji* vaNgashe,+
31 naAvi-alavone wakuAlava, naAzamavete wakuMbahulime,
32 naEliyava wakuShalavone, navana vaYashene, naYonatane,
33 naShama kaHalale, naAhiyame mwanakaHalale Shalale,
34 naElifwelete mwanaAhasavai, Ahasavai mwanauze lunga wakuMakate, naElyame mwanaAhitofwele+ wakuNgilo,
35 naHezelo wakuKalamele, naPalai wakuAlavya,
36 naIngale mwanaNatane wakuZova, naMbanyi wakuNgate,
37 naZeleke kaAmone, naNahalai wakuMbelote uze apwile muka-kumbachila Yowave mwanaZeluwiya vitwa vyajita,
38 naIla kaYetele, naNgaleve kaYetele,+
39 naUliya+ kaHete. Vosena vapwile 37.
Kwinyikila Chamwishi
^ Chipwe “kanawa mwaso wamwaza hamyaso.”
^ Chipwe “muChana.”
^ Chipwe “Kaha membo ajimbalaka.”
^ Hepe., “apwile mwanachingazule.”
^ Tala Mukana waMazu.
