Samwele 2 24:1-25
24 Jino Yehova akwachilile cheka vaIsalele utenu+ omu mutu umwe azondwele Ndavichi ngwenyi: “Yakonga ukalave+ vaIsalele navaYuta.”+
2 Ngocho mwangana ambile kuli Yowave+ kapitau kamaswalale ngwenyi: “Yako kumiyachi yavaIsalele yosena, kufuma kuNdane swi nakuMbele-sheva,+ usoneke vatu vosena mangana ngutachikize kuvula chavo.”
3 Oloze Yowave ambile kuli mwangana ngwenyi: “Yehova Kalunga kove avulise vatu mapapa 100, kaha ove mwata wami mwangana umoneko omu mwavavulisa. Jino uli nakusakila ika kusoneka vatu ove mwata wami mwangana?”
4 Oloze mazu amwangana ahonesele Yowave natupitau twamaswalale. Ngocho Yowave natupitau twamaswalale vafumine kumeso amwangana, vayile nakusoneka vaIsalele.+
5 Vazaukile Yotau, kaha vakatungile chilombo chavo kuAlowele.+ Vachitungilile mukachi kachinema,* kuchilyo* changanda, chakutalisa kuNgate nakuYazele.+
6 Kufumaho vayile kuNgileyate+ nakulifuchi lyaTachime-hotoshi. Vayile nawa kuNdaneyane, kaha vajingulukile nakuya kuShitone.+
7 Kufuma kuze, vayile kukaposhi kakuTule+ nakujinganda javaHivi+ navaKanane josena. Kutwala muze, vahetele jino kuNengeve+ yaYuta muMbele-sheva.+
8 Ngocho vahichile mulifuchi lyosena, kaha vakindulukile kuYelusalema hakukuma chatukweji 9 namakumbi 20.
9 Kufumaho, Yowave alwezele mwangana kuvula chavaIsalele vaze asonekele. VaIsalele vaka-kwasa jita vaze vakwachilenga jipoko jamikwale vapwile 800,000, kaha malunga vavaYuta vapwile 500,000.+
10 Oloze Ndavichi evwile kumuchima kukola*+ omu alingile hanalave lyehi vatu. Ngocho ambile kuli Yehova ngwenyi: “Ngunalingi shili+ yayinene hachumechi. Shikaho ove Yehova, ngukonekele hamulonga ngunalingi ami ngamba yove,+ mwomwo ngunalingi vyuma vyauleya.”+
11 Omu Ndavichi ahindukile nachimene, Yehova ahanjikile kuli kapolofweto Ngate+ uze apwilenga mutu waNdavichi muka-kumona vyakumwenesa ngwenyi:
12 “Yako ulweze Ndavichi ngwove, ‘Yehova nambe ngwenyi: “Ngunakuhane vyuma vitatu usakuleho. Sakulaho chimwe chize nangukunehela.”’”+
13 Ngocho Ngate ayile kuli Ndavichi, amulwezele ngwenyi: “Nausaka mulifuchi lyove mupwenga zala yakalombolombo hamyaka 7 tahi,+ nyi nausaka uchinwojoke vaka-kole jove vaze navakuhangasana hatukweji vatatu tahi,+ nyi nausaka mulifuchi lyove mwizenga musongo wachihita hamakumbi atatu tahi?+ Hunanana kanawa havyuma kana nakusakulaho chimwe chize nanguya nakulweza Ou nangutumu.”
14 Jino Ndavichi ambile kuli Ngate ngwenyi: “Chuma kana chinangukaluhwila chikuma. Nachiwaha Yehova+ atujihe, mwomwo atwama nakeke chikuma.+ Kanda navatujiha kuvatuko.”+
15 Kufumaho, Yehova anehele musongo wachihita+ hali vaIsalele kufuma kuchimene palanga nakulwola atongwele, kaha vatu 70,000 vafwile+ kufuma kuNdane swi nakuMbele-sheva.+
16 Omu kangelo olwele livoko lyenyi mangana ngwenyi anongese Yelusalema, Yehova alumwine vishinganyeka vyenyi* hamusongo uze anehele.+ Ambile kuli uze kangelo apwile nakunongesa vatu ngwenyi: “Kunahu, litwamine!” Uze kangelo kaYehova apwile kwakamwihi nachizungwilo chaAlauna+ kaYevuse.+
17 Omu Ndavichi amwene uze kangelo apwile nakujiha vatu, ambile kuli Yehova ngwenyi: “Ami yami ngunalingi shili, kaha yami nawa ngunahengesa. Nyi ava mikoko+ vanalingi ika? Nguzangamise ami navaze vakuzuvo yatata.”+
18 Ngocho Ngate ejile kuli Ndavichi halikumbi lize, amwambile ngwenyi: “Kanduka uyenga umutungile Yehova lijiko lyakulumbila hachizungwilo chaAlauna kaYevuse.”+
19 Ndavichi akavangijile mazu aYehova, ngocho akandukile nakuya nge muze amulwezele Ngate.
20 Omu Alauna andwile meso, amwene mwangana navangamba jenyi vali nakwiza kuli ikiye. Kaha hahaze vene avasesele, afukamine chameso hamavu kuli mwangana.
21 Alauna ehwile ngwenyi: “Ove mwata wami mwangana, unakave ika kuno kuli ami ngamba yove?” Ndavichi amukumbulwile ngwenyi: “Nguneza nakulanda chizungwilo chove ngutungileho Yehova lijiko lyakulumbila mangana musongo wachihita uze uneza hali vatu ukume.”+
22 Oloze Alauna ambile kuli Ndavichi ngwenyi: “Ove mwata wami mwangana, chimbate tuhu chakuzeneka ndando mangana uhanyineho vyuma vyosena unasake.* Waha nawa vangombe vapwenga wana wakulumba. Mbata nachileyi chakuzungwisa navinoma vyeka vyavangombe mangana utenge jikunyi.
23 Ove mwangana, ami Alauna ngunakuhane vyuma vyosenevi.” Alauna ambile cheka kuli mwangana ngwenyi: “Yehova Kalunga kove akwivwile uselewa.”
24 Oloze mwangana ambile kuli Alauna ngwenyi: “Nduma, ngwatela kuvilanda nandando kuli ove. Kangweshi kuhasa kuhana Yehova Kalunga kami vimuna vakuvatula vawana wakanyomboko.” Ngocho Ndavichi ahanyine jishekele* japalata 50,+ kaha alanjile chize chizungwilo navangombe.
25 Kufumaho, Ndavichi atungilile Yehova lijiko lyakulumbila+ haze hachizungwilo, kaha alumbile vimuna vakuvatula nakuhana nawa mawana akusolola kuunda. Ngocho Yehova evwililile kulembelela vamulembelelele vatu mulifuchi,+ kaha musongo uze wejile hali vaIsalele wakumine.
Kwinyikila Chamwishi
^ Chipwe “kamwanakalwiji.”
^ Chipwe “kusulo.”
^ Chipwe “chivezu chamuyanjishile.”
^ Chipwe “evwile kupihya.”
^ Hepe., “unamono ngwove vyamwaza.”
^ Shekele yimwe yapwile jingalamu 11.4. Tala Chihande B14.
