Samwele 2 3:1-39
3 Jino vaze vakuzuvo yaSaulu navaze vakuzuvo yaNdavichi valizungishilenga lika. Kaha Ndavichi atwalileho lika kukwata ngolo,+ oloze vaze vakuzuvo yaSaulu vapwile nakuya nakuzeya.+
2 Halwola kanelu, Ndavichi asemene vana vamalunga muHevelone.+ Mwanenyi watwatwa apwile Amanone+ uze asemene naAhinowame+ wakuYezelele.
3 Mwanenyi wamuchivali apwile Kileyave uze asemene naAvingayile,+ pwevo lyambozo Navale wakuKalamele. Mwana wamuchitatu apwile Avasalome+ uze asemene naMaka mwanaTalamai+ mwangana waNgeshule.
4 Mwana wamuchiwana apwile Atonyiya+ uze asemene naHangite, kaha wamuchitanu apwile Shefwachiya uze asemene naAvitale.
5 Mwana wakusokesa 6 apwile Iteleyame uze asemene naEngela. Ava vakiko vana asemenene Ndavichi muHevelone.
6 Omu vaze vakuzuvo yaSaulu navaze vakuzuvo yaNdavichi valizungishilenga lika, Avanele+ akwachilenga lika ngolo muli vaze vakuzuvo yaSaulu.
7 Jino Saulu apwile nakalumbu kalisano, lijina lyenyi apwile Lijipa,+ mwanaAya. Kutwala muze, Ishe-mboshete+ ambile kuli Avanele ngwenyi: “Ika walisavalilanga nakalumbu kalisano katata?”+
8 Ngocho Avanele apihililile hamazu ahanjikile Ishe-mboshete. Ambile ngwenyi: “Kutala ngunapu ngukawa wamuYuta nyi? Kufuma kushikulu palanga nakulelo, ami ngunasololanga zangi yakwilila kuli vaze vakuzuvo yaiso Saulu, nakuli vandumbwenyi, nakuli masepa jenyi, kaha nawa kangwakuhanyine mumavoko aNdavichiko. Oloze ove lelo unguhane mulonga hali ou pwevo?
9 Shikaho Kalunga anguzangamise mwamunene ami Avanele, kachi nge kangweshi kulingila Ndavichi vyuma vino alishingile Yehova kuli ikiye ngwenyi,+
10 mwakafumisa wangana kuzuvo yaSaulu nakuzamisa litanda lyaNdavichi muIsalele namuYuta, kufumisa kuNdane swi nakuMbele-sheva.”+
11 Ishe-mboshete kahanjikile lizu numba limweko havyuma ahanjikile Avanele, mwomwo amwivwile woma.+
12 Hahaze vene, Avanele atumine valuwa kuli Ndavichi, amwambile ngwenyi: “Lifuchi lyapwa lyeya?” Ambile cheka ngwenyi: “Tulikase chivwasano, kaha ami nanguzata nangolo* ngukukafwe mangana lifuchi lyaIsalele lyosena lipwenga lyove.”+
13 Ndavichi amwambile ngwenyi: “Chamwaza. Nangulikasa chivwasano nayove. Oloze kanda nawiza kuno kuli ami nakungumona chakuzeneka Mikale+ mwanaSauluko.”
14 Kaha Ndavichi atumine valuwa kuli Ishe-mboshete+ mwanaSaulu, amwambile ngwenyi: “Nguhane puwami Mikale uze ngwambachile namivumbo 100 yakuulunga wavaFwilishite.”+
15 Ngocho Ishe-mboshete atumine vatu vakasake Mikale kuli lunga lyenyi Palachele+ mwanaLaishe.
16 Oloze uze lunga lyenyi amukavangijilenga oku ali nakulila swi nakuMbahulime.+ Kaha Avanele ambile kuli uze lunga ngwenyi: “Kinduluka.” Ngocho uze lunga akindulukile.
17 Jino Avanele atumine mazu kuli vakulwane javaIsalele ngwenyi: “Enu munasakenga Ndavichi apwenga mwangana wenu.
18 Ngocho lingenu jino vyuma mwasakile, mwomwo Yehova ambile kuli Ndavichi ngwenyi, ‘Nangukayovola vatu jami vaIsalele mumavoko avaFwilishite, namumavoko avaka-kole javo vosena kuhichila muli ngamba yami Ndavichi.’”+
19 Kaha Avanele ashimutwilile nawa navaMbenjamine.+ Kufumaho Avanele ayile kuli Ndavichi kuHevelone nakushimutwila nenyi kupenge mangana amulweze vyuma valivwasanyine vaIsalele navaze vakuzuvo yaMbenjamine vosena.
20 Omu Avanele ahetele kuli Ndavichi kuHevelone navatu jenyi 20, Ndavichi avawahishilile chiwanyino chakulya nakunwa.
21 Kufumaho Avanele ambile kuli Ndavichi ngwenyi: “Mana nguyenga ngukakukungulwile vaIsalele vosena ove mwata wami mwangana, mangana valikase chivwasano nayove. Kahove naupwanga umwangana walifuchi lyosena.” Ngocho Ndavichi asuwile Avanele ayenga mukuunda.
22 Jino Yowave navangamba jaNdavichi vakindulukile kufuma kuze vayile nakulwa jita. Vejile navyuma vyakupupa vyavivulu. Halwola kana Avanele apwile hanafumu lyehi kuli Ndavichi muHevelone, mwomwo Ndavichi amusuwile ayenga mukuunda.
23 Omu Yowave+ namaswalale vosena vaze apwile navo vahetele, Yowave vamulwezele ngwavo: “Avanele+ mwanaNele+ ezanga kuli mwangana, kaha mwangana amusuulanga ayenga mukuunda.”
24 Ngocho Yowave ayile kuli mwangana, amwambile ngwenyi: “Ika unalingila chuma kana? Vanangulweze ngwavo Avanele ezanga kuno kuli ove. Mwomwo ika unamwechelela ayenga mukuunda?
25 Ove watachikiza omu apwa Avanele mwanaNele. Ezanga kaha nakukuleleveka nakufwila atachikize okwo weji kuyanga navyuma vyosena uli nakulinga.”
26 Ngocho Yowave afumine kuli Ndavichi, kaha atumine valuwa vamukavangize Avanele. Vaze valuwa vayile, vakamuwanyine kulishima lyaShila, kaha vejile nenyi. Oloze Ndavichi katachikijile chuma numba chimweko.
27 Omu Avanele akindulukile kuHevelone,+ Yowave ayile nenyi mukachi kuchikolo changanda mangana akahanjike nenyi kupenge. Oloze kuheta kuze, Yowave amutuvile poko yamukwale hajimo, ngocho afwile.+ Chitela chafumine hakujiha* ndumbwenyi Asahele.+
28 Omu Ndavichi evwile mujimbu kana, ambile ngwenyi: “Ami nawangana wami katweshi namulongako kumeso aYehova haya myaka yosena hamanyinga+ aAvanele mwanaNele.
29 Mulonga kana upwenga hali Yowave+ nahali vaze vakuzuvo yaise vosena. Kuzuvo yaYowave kukapwenga lika lunga uze mwahitanga vyuma vimwe kuusonyi wenyi.+ Kukapwenga nawa muka-mbumba,+ namuka-kukwata kukazala,* namutu wakufwa kupoko yamukwale, namutu wakukalikiza wakuzeneka vyakulya.”+
30 Shikaho Yowave nandumbwenyi Avishai+ vajihile Avanele+ mwomwo yachitela chakujiha ndumbwavo Asahele kujita+ yapwile kuNgiveyone.
31 Kufumaho Ndavichi ambile kuli Yowave nakuli vatu vosena vaze apwile navo ngwenyi: “Pulenu uvwalo wenu nakulikasa vikeleyi mangana mulile Avanele.” Kaha Mwangana Ndavichi apwile nakukavangiza musela munyima.
32 Avanele vamufunjile muHevelone. Kaha mwangana alilile nalizu lyakukanguka hafuka yaAvanele. Navatu vosena valilile chikuma.
33 Mwangana Ndavichi embile lungungu hali Avanele ngwenyi:“Kutala chinapu chakutamo Avanele kufwa nganomu mwafwa chileya nyi?
34 Mavoko ove kavawakasangako,Mahinji ove kavawahakanga mujikuliko.*Wandumukanga nge mutu uze vanalindumuna kuvihwanga.”*+
Ngocho vatu vosena vamulilile cheka.
35 Kutwala muze, vatu vosena vejile nakuvendejeka Ndavichi mangana alyengako mbolo shimbu kanda kutoke. Oloze ikiye alishingile ngwenyi: “Kalunga anguzangamise mwamunene kachi nge nangulya mbolo chipwe vyakulya vyeka shimbu kanda likumbi lilauke.”+
36 Vatu vosena vamwene chuma kana, kaha vawahililile. Chuma kana chevwishile vatu vosena kuwaha, nge omu vevwilenga kuwaha havyuma vyeka alingilenga mwangana.
37 Ngocho vatu vosena navaIsalele vosena vatachikijile halikumbi lize ngwavo mwangana keshi ikiye ajihile Avanele mwanaNeleko.+
38 Kufumaho mwangana ambile kuli vangamba jenyi ngwenyi: “Uno kamwatachikijileko ngwenu likumbi lyalelo muIsalele munafu mutu wamulemu uze apwa chilolo nyi?+
39 Likumbi lyalelo ngunazeye, numba tuhu ngumwangana uze vawavisa.+ Ava malunga, vana vaZeluwiya+ vanakenyuka chikuma, kangweshi kuvahasako.+ Yehova ashishishilemo muka-kulinga mwamupi kweseka naupi wenyi.”+
Kwinyikila Chamwishi
^ Hepe., “kaha tala, livoko lyami nalipwa nayove.”
^ Hepe., “hamanyinga.”
^ Pamo kulumbununa chitonji uze azachilenga milimo yamapwevo.
^ Hepe., “muunenguko.”
^ Hepe., “kuvana vavilinga vyakuhenga.”
